پخوانۍ صدراعظمې انګیلا میرکل د آلمان د لومړنۍ ښځینه ولسمشرې د ټاکلو غوښتنه کړې ده. د آلمان د اوسني ولسمشر فرانک والتر شټاین‌ مایر د ځایناستي په توګه د څو ښځو نومونه مطرح شوي، خو تر اوسه د کومې نوماندې په اړه توافق نه دی شوی.

تمه ده چې په برلین کې د کیڼ ګوند استازي له سوسیال ډیموکرات ګوند او زرغون ګوند سره د ائتلافي خبرو اترو د پیل ملاتړ وکړي. دا کار ښايي د دغه ښار د لومړي ځل لپاره د کیڼ ګوند د ښاروال د ټاکل کېدو لاره هواره کړي.

په ورته وخت کې د آلمان پخوانۍ صدراعظمې انګېلا میرکل غوښتنه کړې چې د ولسمشر فرانک والتر شټاین ‌مایر ځای دې یوه ښځه ونیسي. هغې یادونه کړې چې د آلمان په ۷۷ کلن تاریخ کې تر اوسه هېڅ کله ښځه د ولسمشرۍ دې مقام ته نه ده رسېدلې.

میرکل له مجنټا په نامه آلماني تلویزیون سره په خبرو کې وویل، هر څوک باید له ځانه وپوښتي چې «ایا بالاخره د دې وخت نه دی رارسېدلی؟» هغې په خپلو خبرو کې زیاته کړه، داسې ښځې پېژني چې د دې دندې د ترسره کولو وړتیا لري، خو د چا نوم یې وانخیست.

ټاکل شوې چې د جنورۍ په ۳۰مه به د آلمان راتلونکی ولسمشر یا ولسمشره وټاکل شي. اوسنی ولسمشر فرانک والتر شټاین ‌مایر نه شي کولای د درېیم پرله ‌پسې پړاو لپاره د ولسمشرۍ څوکۍ ته نوماند شي. د آلمان ولسمشر تر ډیره تشریفاتي دنده لري.

د بایرن ایالتي پارلمان مشره ایلسه اېګنر چې ښايي یو له نومونو څخه  وي، د بایرن د مسیحي ټولنیز اتحاد (CSU) د مشر مارکوس زودر ملاتړ له ځان سره لري.

د ولسمشرۍ د دې مقام لپاره د نورو مطرح شویو کسانو په ډله کې د آلمان د فدرالي پارلمان مشره یولیا کلکنر، د پوهنې وزیره کارین پرین او د دفاع وزارت پخوانۍ وزیره اناګرېت کرامپ کارنباور هم شاملې دي. دغه درې واړه سیاستوالې د میرکل د منځني ښي اړخي مسیحي ډیموکرات اتحاد (CDU) غړې دي.

پخوانۍ صدراعظمې انګیلا میرکل د ولسمشرۍ پر سر روان بحث «عجیبه» بللی او د هغه پر «ناخوښ لحن» یې نیوکه کړې ده. هغې د خپل ګوند پر اوسني مسیر هم نیوکه وکړه او ویې ویل چې د مسیحي ډیموکرات اتحاد هویت یوازې په اقتصادي سیاست پورې محدود نه دی.

میرکل وویل: «د مسیحي ډیموکرات اتحاد تل هڅه کوله چې د ټولنې له ټولو برخو سره اړیکې جوړې کړي، او دا اصل باید بېرته د ګوند د فعالیتونو په لومړي سر کې ځای ومومي.»