حزب الله پر تل ابيب توغندی فېر کړی
۱۴۰۳ مهر ۴, چهارشنبه
د اسرائيل پوځ تائيد کړې ده چې د حزب الله يو توغندی د تل ابيت ښار شا او خوا سيمې ته رسېدلی دی.
د پوځ يوه وياند د فرانسې خبري آژانس ته وويل: «دا لومړی ځل دی چې د حزب الله يو توغندی د تل ابيب سيمې ته رسېدلی دی. دا د اسرائيل د دفاعي ځواک له خوا خنثی کړل شوی دی.»
د حزب الله وسله والې ډلې تر دې دمخه ويلي ول دوی يو میزايل یې فېر کړی چې تل ابيت ته څېرمه د اسرائيل د موساد په نوم استخباراتي ادارې مقر یې هدف دی. حزب الله پر موساد د خپلو مشرانو د وژلو او همدا شان پر خپلو غړيو باندې د مخابراتي وسايلو د چاودنو مسئول ګڼي.
د اسرائيل د پوځ وياند ناداو شوشاني، پر تل ابيب باندې له ځمکې څخه ځمکې ته د وار کوونکي میزايل د فېر کولو په اړه وويل: «حزب الله يقيناً د جګړې د لمن د پراخولو هڅه کوي....دا [برید] یې يوه برخه ده.»
نوموړي وويل: «دوی هڅه کوي چې لا ډېر خلک ترور کړي.»
د اسرائيل پوځ ويلي دي د لبنان په جنوبي نفاخيه سيمه کې یې هغه لانچر ويشتلی چې دغه میزايل یې فېر کړی وو.
د اسرائيل برید د بيروت په عیسوي ميشته سيمه کې درې کسان وژلي
لبنان ويلي دي چې د اسرائيل پوځ د چهار شنبې په ورځ د بیروت د شمال غرنۍ سيمه کې چې زياتره اوسيدونکي یې عيسويان دي، يو کلی په نخښه کړی دی.
دا لومړی ځل دی چې د اسرائيل او حزب الله ترمنځ د سرحدي نښتو په ترڅ کې چې له کابو يوه کال راهېسې دوام لري، دا کلی ویشتل کيږي.
د لبنان د روغتيا وزارت ویلي دي چې د کسروان سيمې ماېشره کلي کې د اسرائيل بريد درې کسان وژلي او نهه یې ټپيان کړي دي.
اسرائيل په لبنان کې د خپلو بريدونو ساحه پراخه کړې ده او په لومړي ځل یې د بیروت په جنوب کې د الجيه تفريخي ساحلي ښارګوټي باندې هم بريد کړی دی.
مصر، عراق او اردن د «جګړې له پراخېدو» خبرداری ورکړی
د مصر، عراق او اردن د بهرنيو چارو وزيرانو په نيويارک کې د ملګرو ملتونو د عمومي اسامبلۍ د ۷۹مه غونډې په څنډه کې په لبنان کې د وضعيت په اړه بحث کړی دی.
دې دريو هېوادونو د چهار شنبې په ورځ په يوه شريکه اعلاميه کې د لبنان پر وړاندې د اسرائيل «تیری» وغندی او خبرداری ورکړ چې دا «سيمه د يوې بشپړې جګړې لوري ته وړي.»
دې وزيرانو وويل چې «په سيمه کې د دې خطرناکې جګړې د خپريدو مخه نيول په غزه کې د اسرائيل د تیري د مخنيوي سره پيليږي.»
دوی پر نړيواله ټولنه او پر امنيت شورا باندې د جګړې د ختمولو له پاره د مداخلې غږ کړی دی. دې وزيرانو همدا راز د اوسني وضعيت پړه پر اسرائيل ور اچولې ده او خبرداری یې ورکړی دی چې دا به د ټولې سيمې له پاره ناوړه عواقب ولري.
زموږ له آرشيف څخه: