په میليونو مسلمانان د حج د ادا کولو له پاره د سعودي عربستان مکې معظمې ښار ته په داسې حال کې رسيدلي چې هوا سخته ګرمه ده.
د سعودي چارواکو په حواله نږدې ۱،۵ ميليونه بهرنيان د حج په کلنيو مراسمو کې د ګډون له پاره دغه هېواد ته رسېدلي دي.
زموږ د فيسبوک پاڼه هم درسره تعقيب کړئ
چارواکو تر دې دمخه ويلي ول چې دوی اټکل کوي چې د ۲۰۲۳م کال د حج له پاره به د زايرينو شمير د کرونا وبا د محدوديتونو تر مخه شمیرو ته ورسيږي. د کرونا وبا تر خپريدو وروسته دا لومړی حج دی چې د دغه ويروس له کبله د لګولو شويو بندیزونو پرته ادا کيږي.
اړونده موضوع: سعودي عربستان د يو میلیون زیارت کوونکو کوربه دی
په ۲۰۱۹م کال کې تقريباً ۲،۵ ميليونو کسانو د حج فريضي ادا کړې وه. په ۲۰۲۱م او ۲۰۲۲م کلونو کې د کرونا د محدوديتونو له کبله دغه شمیر په ترتيب سره ۶۰ زره او ۹۲۶ زرو ته راټيټ شوی وو.
د سعودي عربستان د حج او عمرې وزير توفيق الرابيعه، په روانه اونۍ کې په خپره شوې يوه ويډيو کې ويلي ول: «د حج د مراسمو په رانږدې کیدو سره د سعودي عربستان شاهي دولت هم د اسلام په تاريخ کې د دې سترې راټوليدنې له پاره چمتووالی نيسي.»
انتظار کیږي چې نور ډېر زایرين به هم د دوشنبې په ورځ د حج د مراسمو تر پېليدو د مخه مکې معظمې ته ورسيږي.
اړونده موضوع: د حج د مراسمو نوې لاتري ډیر مسلمانان په غوسه کړي
توفيق الربيعه همدا راز زياته کړې ده چې سږ کال به له ۱۶۰ هېوادونو څخه دوه ميليونه مسلمانان په دې مراسمو کې ګډون وکړي.
په دې منځ کې زايرين چې ځانګړې لباس یې اغوستی دی، په الوتکو، بسونو او ريل ګاډو کې مکې ته د رسېدو په حال کې دي. حج د اسلام له پنځو ارکانو څخه يو دی او پر هغو مسلمانانو چې امکانات یې ولري، فرض دی چې په ژوند کې یې يو ځل ادا کړي.
ب. ص/ ن. ز (AFP, AP)
زموږ له آرشيف څخه؛
په ډېرو اسلامي هیوادونو کې د سه شنبې ورځ د لوی اختر لومړۍ ورځ ده. د کرونا وبا له کبله د اختر لمانځل د نورو وختونو په پرتله له محدودیتونو سره مل دی.
انځور: Reuters/A. Awadنور کلونه پر کعبې ډېرو مسلمانانو طواف کاوه، خو سږ کال د زیارت کوونکو شمیر محدود وو. د سعودي عربستان چارواکو د کرونا له کبله سږ کال د حج د فریضې ادا کوونکو شمیر ۶۰ زره کسانو پورې محدود کړی وو. یوازې هغو کسانو ته په حج کې د ګډون اجازه وه چې په سعودي عربستان کې استوګن ول.
حج د اسلام له مهمو ارکانو څخه دی، چې هر کال په سلونو زره مسلمانان دغه فریضه ادا کوي. د حج مراسمو تر پیلیدو دمخه د کعبې شریفي شا او خوا په اساسي ډول پریمنځل شوه.
د ویروس د خپریدو د مخنیوي اړونده مقررات
دا اوس د معمول خبره ګرځیدلې ده چې د کرونا وبا اړونده ایمني مقررات مراعات شي. زیارت کوونکي د کرونا ویروس پر وړاندې پر نورو سربیره په ماسک اغوستو سره ځان مجهزوي. یوازې هغو کسانو ته په حج کې د ګډون اجازه وه چې د واکسین ټول دوزه یې تطبیق کړي ول، چې تر اوسه د سعودي عربستان یوازې ۱۲ سلنه وګړي په بشپړ ډول واکسین شوي.
د حج په اوج کې په اسلامي هیوادونو کې قرباني کیږي. دغه انځور په نایجیریا کې اخیستل شوی چې یو کس د قربانۍ له پاره څاروی اخیستی.
په دې انځور کې په بنګله دیش کې د څارویو یو پلورونکی د غوایانو ښکرونه په سره رنګ رنګوي. سور رنګ له قربانۍ سره تړاو لري. خو دغه څه د څارویو د پالني سمبولیکه بڼه نه لري، بلکې د اختر په ورځ ذبحه کیږي.
دغه انځور د ترکیې د ادیمان ښار دی چیرې چې یو څاروی په دودیز ډول ذبح شوی دی. په ځینو اروپايي هیوادونو کې له بې هوښۍ پرته د څارویو حلالول یوه شخړه ایزه موضوع ده. د بیلګې په توګه په آلمان کې یوازې هغه وخت څاروی حلالیدی شي چې دمخه بې هوښه شوی وي.
لوی اختر چې د قربانۍ اختر هم ورته ویل کیږي، تر هر څه زیات د کوچنیانو، ځوانانو، زړو او کورنیو له پاره د خوښیو جشن دی.
