د ننګرهار ولایت د اطلاعاتو او فرهنګ رئیس وايي چې دغه اثار د اسلامي، کوشاني او بودايي دورو سره تعلق لري، چې د لرغون پېژندونکیو له لوري تر کیندنو او تشخیص وروسته یاد ریاست ته وسپارل شول.

دغه اثار له سبزاباد تاریخي سیمې تر لاسه شوي، چې کیندنه یې ۱۳۹۸ل کال کې پیل شوې او شپږ میاشتې یې دوام وکړ. د ځایي مسوولینو په خبره پر دې منقولو اثارو سربېره یې په سیمه کې ۱۱ غیر منقول اثار چې اطاقونه دي، هم ترلاسه کړل.

د ننګرهار په اطلاعاتو او فرهنګ ریاست کې د تاریخي ابداتو او لرغون پيژندنې مسئولین وايي چې تمه ده د سبز اباد په تاریخي سیمه کې ډېر نور هم د مخکنیو دورو اثار ترلاسه کړي.

دغه کیندنې د اطلاعاتو او فرهنګ وزارت د انکشافي بودیجې له مخې ترسره شوې. د ننګرهار ولایت د اطلاعاتو او فرهنګ رئیس رحیم الله خوږیاڼی وایي په ختیځ کې موزیم نشته، چې د جوړولو او منظورۍ په موخه یې هڅې روانې دي.

په همدې حال کې د سبز اباد تاریخي اثارو د کیندنې مسئول او د لرغون پيژندنې ریاست غړي محمد مبين وايي، چې د دوی په ترلاسه شویو اثارو، کې سکې، کنډولونه، ګچي مجسمې او نور بېلابېل اثار تر لاسه شوي.

د ننګرهار د اطلاعاتو او فرهنګ رئیس رحيم الله خوږياڼي وایي چې دوی غواړي په سبز اباد تاریخي سیمه کې د تاریخي اثارو کیندنو او پلټنو ته لا دوام ورکړي او دغه راز په همدې سیمه کې یو موزیم هم جوړ کړي.

د ننګرهار فرهنګي کړۍ د دغو اثارو پر موندلو خوښي ښيي او له اطلاعاتو او کلتور وزارت غواړي، چې په نورو تاریخي سیمو کې هم دغه ډول کیندنې وکړي، څو تاریخي اثار پیدا او قاچاق وژغورل شي.

د څلوېښتو کلونو جګړو له امله هېواد کې ګڼې تاریخي سیمې ویجاړې شوي، اثار یې قاچاق شوي او یا هم له منځه وړل شوي دي.