د امریکا ولسمشر جو بايدن د سې شنبې په ورځ (د جولای ۹ نیټه) په واشنګټن کې د ناټو د سرمشریزې غونډه پرانیستله. بایډن په خپله وینا کې د امریکا او د دغه هیواد د څلورو متحدینو د نوي هوایي بستې خبر ورکړ.

جو بایدن د شمالي اتلانتیک تړون (ناټو) د پنځه اویایمې کلیزې په مراسمو کې وویل: «د اوکراین ملاتړ قوي او دوامداره دی.»

د امریکا، المان، ایټالیا، هالنډ او رومانيا رهبرانو د یوې ګډې اعلامیې په خپرولو سره اعلان وکړ چې د اوکراین د ملکي وګړو او ښارونو د حفاظت له پاره به د هوایي دفاع پاتریوت سیستم په روان میلادي کال کې کیف ته وسپارل شي.

په اوکراین کې جګړه په واشنګټن کې د ناټو د سرمشریزې یوه له اصلي موضوعاتو څخه ده.

د شمالي اتلانتیک تړون د ۳۲ غړو هیوادونو مشران په واشنګټن کې د دې تړون ۷۵مه کلیزه لمانځي.

د ناټو او اوکراین پر سر د بایدن او ترمپ بحث

په اوکراین کې د روسیې تیری کوونکې جګړه د بایدن او ترمپ د مناظرې یو له تر ټولو محوري موضوعاتو څخه وه. ترمپ ادعا وکړه چې د واشنګټن له خوا د اوکراین ملاتړ، اقتصاد ته زیان رسوي او که امریکا یو پیاوړی رهبر درلودلی، نو په اوکراین کې به هیڅکله هم جګړه نه وای پیل شوې.

بایدن په دې برخه کې د ترمپ پر سیاست نیوکه وکړه او وې ویل، چې ترمپ هغه څوک دی چې غواړي امریکا له ناټو څخه ووځي.

بایدن په مناظره کې د خپل سیال ترمپ په مقابل کې کمزوری وو او د هغه د روغتیایي وضعیت او استعفا په هکله قیاسونه یې لا زیات کړل.

د امریکا د ملي امنیت شورا ویاند جان کربي، د دې موضوع په اړه خبریالانو ته وویل چې د ناټو متحدین چې په دې اونۍ کې په واشنګټن کې سره را ټوليږي، د بایدن د رهبرۍ د توان په هکله اندېښنه نه لري.

پر کیف د روسیې د بریدونو په اړه د ستولټنبرګ خبرداری

روسیې د ناټو له کلیزې سره هم مهاله په کیف او د اوکراین په نورو برخو کې پر ملکي اهدافو بریدونه ډیر کړي دي.

د ناټو سرمنشي ینس ستولتنبرګ د دغه سازمان د ۳۲ غړو هیوادونو د مشرانو په مخاطب کولو سره خبرداری ورکړ چې له اوکراین سره دې خپلو کړو ژمنو کې کمی نه راولي. 

هغه ټینګار وکړ چې که روسیه په اوکراین کې بریالۍ شي، ډیر زیات تاوان او ریسک رامنځته کیږي او د ایران، شمالي کوریا او چین د استبدادي رهبرانو د هڅونې سبب به شي.

پیستوریوس: ناټو باید خپل دفاعي اقدامات پياوړې کړي

د المان د دفاع وزیر بوریس پیستوریوس هم په ناټو کې له خپلو شریکانو وغوښتل چې له اوکراین سره دې لا زیاتې پوځي مرستې وکړي.

د المان د دفاع وزیر په واشنګټن کې د غونډې په څنډه کې وویل چې دا یې ګډ مسئولیت دی چې که اوکراین په هره برخه کې اړتیا ولري ورسره مرسته وکړي.

پیستوریوس ټینګار وکړ چې ناټو باید د خپلو دفاعي اقداماتو کچه د پام وړ اندازې ته پیاوړې کړي. المان او د بالتیک سمندر له سیمې څخه د ناټو پنځو نورو شریکانو د مخنیوي یا دفاعي وسلې په توګه د سمندري ماینونو پر تامینولو موافقه وکړه.  

د هوایي دفاع بستې له کبله د ناټو له غړو څخه د زیلنسکي مننه

د اوکراین ولسمشر ولادیمیر زیلنسکي په ایکس (پخوانی تویتر) شبکه کې له خپلو شریکانو څخه مننه وکړه چې د اوکراین د هوایي دفاع سیستم ملاتړ یې کړی دی. هغه ولیکل چې د لا زیاتو امنیتي ضمانتونو د ترلاسه کولو له پاره مبارزه کوي چې په هغې وسلې، مالي او سیاسي ملاتړ شاملیږي.

د اوکراین ولسمشر د سه شنبې په ورځ واشنګټن ته ورسید او ټاکل شوې ده چې د پنجشنبې په ورځ به د امریکا له ولسمشر سره لیدنه وکړي.

زیلنسکي ویلي دي چې لږ تر لږه د پاتریوت هوایي دفاع سیستم اوو دستګاو ته اړتیا لري چې د نویو سیستمونو په ترلاسه کولو او د نوي هوایي دفاع بستې په وړاندې کولو سره دې هدف ته رسیدلی دی.

آژانسونه: ش.ن/ ن.ز