ناټو وايي که روسیه پر اوکراین برید هم وکړي سرتیري نه ور لیږو
۱۴۰۰ بهمن ۱۱, دوشنبه![Ukraine-Konflikt](https://static.dw.com/image/60595533_800.webp)
لویدیځ هیوادونه بیا هم پر اوکراین باندې د روسیې پوځي برید له امکانه لیري نه بولي. امریکا او بریتانیا، کیف ته وسلې استوي او د ناټو څو هیوادونو هم خپل پوځي ځواکونه د اروپا په ختیځ کې ځای پرځای کړي دي.
په عین حال کي د ناټو سرمنشي ینس ستولتنبرګ له بي بي سي سره په خبرو کې ویلي چې حتی پر اوکراین باندې د روسیې د پوځي برید په صورت کې به هم د ناټو اتحاد په یوه نظامي عملیات کې برخه وانخلي.
د دغي پوښتنې په ځواب کې چې آیا هغه به د روسیې د دغه ډول اقدام په صورت کې اوکراین ته د ناټو د پوځي واحدونو استول له امکانه لیري وبولي، ینس ستولتنبرگ وویل: «موږ اوکراین ته د ناټو د جنگي واحدونو د استولو کومه طرحه نلرو.»
د ناټو سرمنشي وویل چې تمرکز د یوه برید پر وړاندې د اوکراین د »دفاعي وړتیا« د ښه کولو پر ملاتړ باندې دی.
ستولتنبرگ ټینگار وکړ چې د ناټو د یوه غړي او «د اوکراین په ډول یو قوي او ارزښتناکه شریک» ترمنځ توپیر موجود دی. د ناټو مشر واضح کړه چې روسیه به د یوه پوځی برید په صورت کې له سختو تحریمونو سره مخامخ سي. خو ناټو دې ته تیاره ده چي د اروپا په ختیځ کې خپل پوځي ځواکونه یو وار بیا تقویه کړي.
بریتانیا: اوکراین ته د پوځي ځواکونو د استولو امکان لږ دی
د بریتانیا خارجه وزیرې، لیز تراس د یکشنبې په ورځ »جنوري ۳۰ مه« پر اوکراین باندې د روسیې د پوځي برید په صورت کې د خپل هیواد د ځواکونو د استولو امکان »ډیر کمزوری« بللی دی.
لیز تراس ټینگار وکړ چې د بریتانیا له پاره دا مهمه ده چې د اوکراین د پوځي ځواکونو د اړتیاوو له پوره کولو څخه ډاډه سي. خو د بریتانیا خارجه وزیرې بیا پر اوکراین باندې د روسیې پوځي حمله » ډیره ممکنه« وبلله. د بریتانیا صدراعظم بوریس جانسن، غواړي د اروپا په ختیځ کې خپل د پوځي واحدونو شمیر دوه برابره کړي.
روسیې تیره میاشت، له ناټو او امریکا سره د یوه توافق یوه داسې طرحه وړاندې کړه چي پکښې کریملن د امنیتي ضمانت غوښتونکی سوی دی. د کریملن رهبري ټینگار کوي چې لویدیځ هیوادونه باید دا تضمین کړي چې د ناټو پوځي اتحاد به ختیځ ته پرمختگ نه کوي، دا ځکه چې دا کار د روسیې له پاره امنیتي گواښ حسابیږي.
کریملن په پام کې لري چې د ناټو په اتحاد پورې د اوکراین د یوځای کیدو مخه ونیسي. له همدې کبله روسیې خپل څه د پاسه ۱۰۰ زره پوځي ځواکونه له اوکراین سره پر گډه پوله کې ځای پرځای کړي او په دې ډول یې لویدیځ هیوادونه تر فشار لاندې راوستي دي.
د امریکا متحده ایالات او ناټو قوي گومان کوي چي د روسیې ولسمشر ولادیمیر پوتین، پر خپل گاونډي هیواد اوکریان باندي د نظامي برید قصد لري خو مسکو دغه ډول یو قصد ردوي.
GP/NZ/AG