دا خبره د امریکا متحده ایالاتو د بهرنيو چارو وزير انتوني بلينکن د چهار شنبې په ورځ (د اپريل ۱۴مه نيټه) په بروکسل له افغانستان څخه د سپتمبر مياشتي تر ۱۱ نيټې پورې د امريکايي عسکرو د را ايستلو په اړه تر رسمي اعلان دمخه وکړه.
دمګړۍ په افغانستان کې کابو ۷۰۰۰ غير امريکايي عسکر چې زياتره یې د ناټو له غړيو هيوادونو څخه دي، ميشت دي. پر دې سربيره په دغه هېواد کې د استرليا، نوي زيلند او ګورجستان يو شمير عسکر هم ماموريت لري. دا عسکر د خپلو روزنیزو ماموريتونو د طرحه کولو او چارو پر مخ وړولو له پاره د امريکا د هوايي ځواک په ملاتړ تکيه کوي.
د امريکا متحده ايالاتو د بهرنيو چارو وزير انتوني بلينکن په بروکسل کې وويل چې اوس وخت را رسېدلی دی چې ناټو هغه اصل تعقيب کړي چې متحدين يې يوځای افغانستان ته تللي ول او يو ځای به ترې را وزي.
نوموړي زياته کړه: «زه دلته راغلی يم څو له خپلو متحدينو او د ناټو له عمومي منشي سره په ژوره همکارۍ هغه پرنسيپ تعقيب کړم چې له سره مو خپل کړی وو: دا چې يوځای ننوځو، يوځای عملي کوو او يو ځای ترې را وځو.»
اړونده موضوع:جرمني له افغانستانه د عسکرو د وتلو په هکله د ناټو د یووالي تمه لري
بلينکن په داسې حال کې چې د ناټو عومي منشي ينس ستولنتبيرګ یې ترڅنګ ولاړ وو، وويل: «موږ به په راتلونکو مياشت کې له افغانستان څخه د خپلو عسکرو د يوه خوندي، سنجول شوي او منظم اخراج د عملي کولو له پاره ژوره همکاري ولرو.«
د ناټو د بهرنيو چارو او دفاع وزيران به د چهار شنبې په ورځ ناوخته د يوه ويديويي کنفرانس له لارې پر خپلو طرحو وغږيږي.
د ناټو يوه لوړ پوړي ديپلومات رويترز خبري آژانس ته وويل چې داسې تمه نه کیږي چې ګني د ناټو يو متحد دې هم د سپتمبر تر ۱۱ نيټې پورې له افغانستانه د امريکايي ځواکونو د اخراج د رسمي اعلان سره چې بايدن به یې نن د چهار شنبې د ورځې په اوږدو کې وکړي، مخالفت ولري.
ب. ص/ ن. ز (Reuters)
زموږ له آرشيف څخه:
په افغانستان کې د المان د پوځي ماموریت لوړې ژورې
آلماني سرتیري کابو له ۲۰ کلونو راهیسې په افغانستان کې د ناټو ماموریت په چوکاټ کې حضور لري. که څه هم د آلماني ځواکونه د ماموریت نیټه د مارچ مياشتي پر ۳۱مه ختمیږي، خو په پام کې ده چې وغځول شي.
انځور: Deshakalyan Chowdhury/AFP/Getty Imagesد ۲۰۰۱م کال په دسمبر کې د آلماني ځواکونو ماموریت تائید شو
د آلمان فدرال پارلمان د ۲۰۰۱م کال په دسمبر میاشت کې له هیواده د باندې د آلماني ځواکونو ماموریت تائید کړ. د آلمان د پارلمان د پریکړې له مخې، آلماني ځواکونه د «آیساف» نړیوال ماموریت په ترڅ کې په افغانستان کې ګمارل شوی وو.
۲۰۰۳: آیساف د ماموریت پراخیدل
د ملګرو ملتونو امنیت شورا، له کابله د باندې د آیساف ماموریت د غځولو پریکړه وکړه. د آلمان فدرال پارلمان هم په کندز ولایت کې د خپل هیواد د ځواکونو ماموریت تائید کړ. آلمان په ۲۰۰۶م کال کې د افغانستان په نهو شمالي ولایتونو کې د آیساف قومانداني پر غاړه واخیسته.
۲۰۰۹: په کندز کې د تیلو پر دوو ټانکرونو بمباري
د ۲۰۰۹م کال د سپتمبر پر څلورمه، د امریکا متحده ایالاتو هوایي جنګي الوتکو د یوه آلماني قوماندان ګیورګ کلاین، په دستور دوه هغه ټانکرونه بمبار کړل چې طالبانو تښتولي ول. په دغه پيښه کې د ملکیانو په کډون تر سلو زیات کسان ووژل شول.
۲۰۱۱: په مزار شریف کې افغان امنیتي ځواکونو ته د مسوولیت سپارل
په ۲۰۱۱م کال کې افغان امنیتي ځواکونو په مزار شريف ښار کې امنیتي مسؤلیت پر غاړه واخیست. په دغه ولایت کې د آیساف په چوکاټ کې د آلماني ځواکونو سترې پوځي اډې موقعیت درلود.
۲۰۱۳: افغان امنیتي ځواکونو ته د کندوز د امنیتي مسؤلیت سپارل
افغان ځواکونو ته د امنیتي مسؤلیتونو د سپارلو په لړ کې، د ۲۰۱۳م کال په اکتوبر میاشت کې د کندوز ولایت امنیتي چارې له آلماني ځواکونو څخه افغان ځواکونو ته وسپارل شوې.
۲۰۱۴: د قاطع ملاتړ ماموریت پېل
په ۲۰۱۴م کال کې په افغانستان کې د نړیوالو ځواکونو جنګي ماموریت پای ته ورسید. خو په افغانستان کې په زرونو بهرني عسکر د ناټو د «قاطع ماموریت» په چوکاټ کې په افغانستان کې پاتې شول، چې دنده یې د افغان امنیتي ځواکونه روزنه ده. په لومړي سر کې آلمان تر ۸۵۰ عسکرو پورې په افغانستان کې د دغه ماموریت په چوکاټ کې د خپلو ځواکونو ونډه تائید کړه.
۲۰۱۸: د قاطع ماموریت غځیدل
د ناټو شریکانو په ۲۰۱۸م کال کې پریکړه وکړه چې د دغه هیواد د امنیتي وضعیت تر ښه کیدو پورې، د قاطع ماموریت په چوکاټ کې خپلو فعالیتونو ته ادامه ورکړي.
۲۰۲۰: د امریکا او طالبانو ترمنځ توافق
امریکا متحده ایالات له طالبانو سره د څو میاشتو مذاکراتو وروسته د ۲۰۲۰م کال په فبرورۍ میاشت کې یو تړون لاسلیک کړ چې له مخې د ۲۰۲۱م کال تر می میاشتې پورې له افغانستانه د خپلو ځواکونو د وتلو ژمنه کړې. د دې په بدل کې طالبانو ژمنه کړې وه چې د افغانستان له خاورې د ترهګرو فعالیت ته اجازه ورنه کړي.
۲۰۲۰: ترمپ د ځواکونو کمولو اعلان وکړ
د ۲۰۲۰م کال په نومبر میاشت کې د امریکا متحده ایالاتو پخواني ولسمشر اعلان وکړ چې په افغانستان کې د خپلو عسکرو شمیر تر ۲۵۰۰ راټیټوي. په دې ترتیب د سږکال تر جنورۍ میاشتې پورې په افغانستان کې د امریکایي ځواکونو شمیر ۲۵۰۰ ته راټیټ شوی دی.
