ستولتنبیرګ په پاریس کي د امانوییل ماکرون سره پرون جمعه (د می میاشتي ۲۱ مه) تر لیدني کتني وروسته ژورنالسټانو ته وویل چي په افغانستان کي د اوسني ماموریت تر ختمیدو وروسته به یې ددغه هیواد سره د همکاری یو نوی فصل شروع سي.
هغه وویل چي په دغو همکاريو کي به «د مشورې ورکول، د امنیتي ارګانونو د ظرفیت لوړولو ملاتړ او مالي کومکونو ادامه » شامله وي
هغه دا هم وویل چي د افغانستان څخه دباندي په یوه بل هیواد کي به افغان امنیتي قواوو د خاصو عملیاتو پخاطر روزنه او ښوونه ورکول سي.» خو دا تر اوسه پوري معلومه نده، چي دغه روزنیز پروګرام به چیري او کوم هیواد کي تر سره کیږي.
د خارجي قواوو تر وتلو وروسته د کابل د هوايی میدان د امنیت په اړه اندیښنې
دا هم تر اوسه پوري معلومه نه ده چي د خارجي سفارت خانو او کابل د هوايی میدان د امنیت د تأمین په هکله څه شي لازم دي او څوک د دغو تاسیساتو امنیت پر غاړه اخلي.
د ناټو عمومي مُنشي ویلي، په نظر کي لري چي « د دغو خدماتو ، له هغې جملې څخه د کابل د هوايي میدان د خدماتو او فعالیتونو» مالي ملاتړ کوي.
