اوس هم په نایجیریا کي په سونو کوچنیان له کانونو څخه د سرو زرو په راايستلو بوخت دي. د روان کال په می میاشت کی لا ۲۸ کوچنیان چي شپږ کلنۍ ته لا نه ول رسېدلي مړل سول. د هغوی خویندو او وروڼو په زهری موادو ککړی خښتې خپلو کورونو ته یووړې تر څو هلته یې صیقلې کړي. ددې کار په نتیجه کي زهري مواد خپاره سول. د هغو ډیره کمه اندازه هم د کم عمره کوچنیانو له پاره د ژوند په بیه تمامیږي.

کله چي د کوچنیانو کالي هم د دغه ډول زهري موادو سره تماس پیدا کړي ، نو د هغوی د وینی جریان نامنظم کیږي. که څه هم درې میاشتی مخکي لا په دغه ځای کی یوه غمجنه پیښه رامنځته سوه ، خو بیا هم پکښي کوم بدلون نه دی راغلی. زیاتره کوچنیان شپږکلن دي چی له سهاره تر ماښامه پوري د زرو ټوټو په پيدا کولو بوخت دي. په دغه ځای کی لویان ډیر کم تر سترگو کیږي.

د دې له پاره چي کوچنیان په ښه ډول د ځان ساتنه وکړي، یوه مرستندویه ټولنه په کلي کي هغوی ته توضیحات ورکوي: کوچنیان باید د کار کالي له ځانه سره کورته یو نه سي.هغوی باید کیمیاوي مواد ونه کاروي او خطرناکو کانونونو ته نژدې نه سي. خو مرسته کوونکي هم نه سي کولای چی له دې کار څخه په بشپړ ډول، د کوچنیانو مخه ونیسي.

دغه نجلۍ چي هابي نومیږي وایی «زما کورنۍ پیسو ته اړتیالري». دا په دې نه پوهیږي چي څو کلنه ده خو له دوو کلونو راهیسي په دغه کان کي کار کوي. خو د نورو کوچنیانو برعکس دا لږترلږه کله کله ښوونځي ته هم ځي.

د سرو زرو زیاتره کانونه د نایجیر په ایالت کي پراته دي.د باراني موسمونو پر وخت د دغه ځای اړیکي د هیواد له نورو سیمو څخه پرې کیږي. دغه ځای ته یوازینۍ لاره په یوه ویاله تبدیلیږي. موټران ورباندي تگ راتگ نه سي کولای. موټرسایکلونه باید په سختۍ سره له اوبو څخه تیر سي. ساعتونه وخت نیسی چی سړی دي ځان هغه سړک ته ورسوی چی کلو ته ځي.

له هغه وروسته چي ۲۸ کوچنیانو د زهری موادو سره د تماس په نتیجه کي مړه سول، نو د دغه کار د مخنیوي له پاره ځانگړي ځواکونه وگومارل سول.خو د محلي حکومت په مقر کي بیا پر دې کار سترگي پټیږي چي گواکي دلته کوچنیان استثمار کیږي. د دغي کاري ډلي مشر الحاجي عبدالاحي عثمان وايي د کوچنیانو له پاره شاقه کار: یعنی څه؟

د کانونو په دغه سیمه کي د شاوخوا اتیا سلنه کوچنیانو په وینه کی په لوړه اندازه سُربي مواد اندازه سوي دي. خو له بلي خوا کافي ډاکټران هم نه سته چی د دغو کوچنیانو درملنه وکړي. کانونو ته نژدې یوازی یو مؤقتی کلینیک سته چي ډاکټر یې هم د طب سم تحصیل نه دی کړی.

د شیکیرا د کلي په یوه مکتب کي یوازي یو ښوونکی ، ۱۴۳ زده کوونکو ته د ټولو مضامینو درس ورکوي. عبدالحی غربه وايي چي زیاتره کوچنیان له مکتبه تښتي او کانونو ته د کار له پاره ځي.د هغه په نظر زیاتره کورنۍ نه سي کولای چي خپلو کوچنیانو ته د مکتب یونیفورم رانیسي.

نایجیریایی ژورنالیست اروکاینو اوموکورو ، له هغه وروسته چي ۲۸ کوچنیان د کانونو قرباني سول، ددغې سیمې د یوې مشهورې ورځپاڼي له لاري یې په دې اړه رپوټونه خپاره کړل. هغه وایی بیا هم په دې اړه کوم بدلون نه دی راغلی. برعکس نور کانونه هم اضافه سوي دي.