نايجيريا: د کښتۍ په حادثه کې تر ۱۰۰ ډېر کسان مړه شوي
۱۴۰۲ خرداد ۲۴, چهارشنبه
د پوليسو او سيمه ایزو چارواکو په حواله د نايجيريا د شمال په کوارا ايالت کې د دوشنبې په ورځ په نايجر سيند کې يوه کښتۍ د یوه لرګي سره تر ټکر کيدو وروسته دوه ټوټې شوې ده. په دې پېښه کې تر سلو ډېر کسان مړه شوي دي.
د کښتۍ دغه مسافرين په يوه واده کې تر ګډون وروسته راستانه شوي ول. چارواکو ويلي دي چې په کښتۍ کې تر ۳۰۰ ډېر کسان سپاره ول.
د ژغورنې عمليات روان دي
د کوارا ايالت د پوليسو وياند اوکاسانمي اجای، د فرانسې خبري آژانس ته د تليفون له لارې ويلي دي: «د کښتۍ په پېښه کې تر اوسه د ۱۰۳ کسانو مړينه تائيد شوې ده او کابو سل تنه ژوندي ژغورل شوي دي.«
نوموړي وويل چې د «چهارشنبې په ورځ به هم د لټون او مرستې عملیات دوام پيدا کړي او د مړو شمير د ډيريدو انديښنه موجوده ده.»
اړونده موضوع: نايجيريا: د کښتۍ د ډوبېدو په پېښه کې د ۱۵۰ کسانو د مړينې ويره
يوه سيمه ایز مسئول غبدلغنا لکپاړا وويل چې «په کښتۍ کې تر اندازې ډېر تقريباً ۳۰۰ کسان سپاره ول» او دا پېښه د دوشنبې په ورځ د سيمې پر وخت درې بجې د شپې رامنځته شوې ده او د ژغورنې عمليات تر پېښې څو ساعته وروسته پېل شول.
زموږ د فيسبوک پاڼه هم درسره تعقيب کړئ
د کوارا د ایالتي مشر د دفتر له خوا په جاري کړل شوي اعلاميه کې ويل شوي دي چې اغیزمن شوي کسان په پتيګي سيمه کې د يوه واده په مراسمو تر ګډون وورسته راستانه شوي ول.
په اعلاميه کې ويل شوي: «ګورنر ته د پتيګي د بېلا بېلو سيمو د اوسيدونکو د مړينې خبرونه را رسيدلي دي. زه د دې پيښې له اغیزمنو سره ژوره خواخوږي څرګندوم.»
په نايجيريا کې د کښتيو حادثې ډېرې رامنځته کيږي
د نايجير سيند د نايجيريا له سترو سيندونو څخه يو دی. خو په کښتيو کې د حده ډېرو مسافرينو ليږدول، د حفاظتي اقدامات کمښت او د اورښتونو پر وخت د سېلابونو له وجې په دغه هېواد کې د کښتۍ ډېرې پېښې رامنځته کيږي. دلته د تګ راتګ له پاره د کښتيو کارول عام دي.
ځينی سرچېنې وايي چې په نايجيريا کې پر سړکونو د وسله والو ډلو له خوا د اختطاف کیدو له ويرې زياتره خلک نزدې سيمو ته د سفر له پاره کښتۍ کاروي.
اړونده موضوع: نايجيريا: د مدرسې په لسونو ماشومان تښتول شوي
تېره مياشت په شمال لویدیځ سوکوتو ايالت کې يوه کښتۍ ډوبه شوې وه چې په پايله کې یې د ۱۵ کسانو مړينه تائيده شوې وه او نور ۲۵ تر اوسه لادرکه دي. دا کسان په لرګيو ټولولو پسې تللي ول.
تر دې کابو يو کال د مخه په همدې سيند کې ۲۹ ماشومان ډوب شول. دوی هم تر لرګيو ټولولو وروسته بيرته کورونو ته ستنېدل.
په تېر دسمبر میاشت کې د سيلاب له کبله په جنوب ختیځ امبارا ايالت کې هم يوه کښتۍ ډوبه شوله چې پکې سپاره لږ تر لږه ۷۶ کسان مړه شول.
د نايجيريا د اوبو د لارو د تنظيم ملي اداره د کښتيو د حادثو د مخنيوي په موخه د شپې د کښتيو پر چلولو د بندیز لګولو هڅه کوي. همدا راز تر حده ډېرو مسافرينو ليږدول هم جرم بلل شوی دی خو قانون ماتوونکي تل له دې مقررات سرغړونه کوي.
ب. ص/ ن. ز (Reuters, AFP,AP)
زموږ له آرشيف څخه: