په هندي کشمېر کې چاودنه؛ لږ تر لږه ۹ کسان وژل شوي
۱۴۰۴ آبان ۲۴, شنبه
پولیسو د شنبې په ورځ (د نومبر ۱۵مه) وویل چاودنه د کشمیر ناوګام علاقې د پولیسو په مرکز کې شوې ده. پر وینا ېې چاودنه د هغو چاودېدونکو موادو وه چې د روانې اوونۍ په سر کې د شمالي ایالت هریانا په فرید آباد علاقه کې کشف او بیا دغې قوماندانۍ ته راوړل شوي ول. د فرانس پریس خبري آژانس په حواله دغه مواد ناڅاپی چاودېدلي.
په سیمه کې د پولیسو مشر نالین پرابهټ وویل چې د پنجشنبې ورځې راهیسې د دغو کشف شوو موادو نمونې د لازیاتو معایناتو په موخه مسلکي ټيم ته استول کېدې او دا چې دغه مواد ډېر «حساس او ناثابته» دي د معایناتو په پروسه کې ېې له «نهایت احتیاط» استفاده شوې ده.
پرابهټ چې خبریالانو سره غږېده وویل «خو له بده مرغه د جمعې په ماسخوتن شاوخوا ۱۱ بجې او ۲۰ دقیقې د دندې پر مهال یوه چاودنه رامنځ ته شوه. د دغې پېښې د علت په هکله هر ډول شک کول غیرضروري دی.»
په چاودنه کې د وژل شوو کسانو په ډله کې د پولیسو پرسونل، د تخنيکي ټيم غړي، دوه تنه جنايي عکاسان او د سیمیزې ادارې غړي شامل دي.
د پولیسو مشر دا هم وویل چې په چاودنه کې د پولیسو مرکز زیات تخریب شوی او شاخوا ته نژدې ساختمانونو ته هم زیانونه اوښتي دي.
د همدې اوونۍ د دوشنبې په ورځ په پلازمېنه نوي ډیلي کې هم یوه ځواکمنه چاودنه وشوه چې په کې ۱۲ کسان ووژل او ۳۰ نور ټپیان کړل. د هندوستان حکومت د چهارشنبې په ورځ ژمنه وکړه چې دحملې عاملانو، د هغو ملګرو او مالي ملاتړکونکو ته به جزا ورکړي او دا ېې یوه تروریستي حمله وښوده.
وسله والو کسانو د روان کال د اپریل په ۲۲مه د هندي کشمېر په پهلګام علاقه کې ۲۶ تنه سیلانیان چې اکثریت ېې هندوان ول په ډزو ووژل. دغه حمله د هندوستان او پاکستان تر منځ د څو ورځنۍ جګړې سبب واقع شوه. تر هغې جګړې وروسته د روانې اوونۍ دوه چاودنې په هند کې تر ټولو مهمې امنيتي پېښې دي چې رامنځ ته کيږي.
له آرشیف څخه: