د شمالي کوریا خارجه وزارت نن یکشنبه (د می میاشتي دوهمه) د دغه هیواد پرضد د جوبایدن او امریکا د ځینو مقاماتو پر وروستیو اظهاراتو باندي سخت انتقاد وکړ.
د شمالي کوریا رسمي خبري آژانس د خارجه وزارت د یوه ویاند په حواله ویلي، چي د جوبایدن او امریکا د ځینو مقاماتو اظهارات ښکاره کوي، چي د امریکا جمهوررئیس دي د شمالي کوریا پر ضد دښمنانه سیاست پرمخ بوزي. د ویاند په خبره شمالي کوریا به د دغه ډول یوه سیاست په مقابل کي«مناسب جواب»ورکړي.
د شمالي کوریا د خارجه وزارت په یوه اعلامیه کي، کومه چي د امریکا متحده ایالاتو د دغو اظهاراتو په عکس العمل کي نشر سوې ده، راغلي دي:« په شمالي کوریا کي د بشر د حقوقو د وضعیت څخه د امریکا د حکومت انتقاد د دغه هیواد د رهبر کیم جونګ اون د حیثیت او کرامت توهین دی او دا ښکاره کوي، چي امریکا د یوې هراړخیزي مقابلې او کشمکشونو دپاره ځان اماده کوي.»
اعلاميې د امریکا په کانګرس کي د شمالي کوریا د اټومي پروګرام په باب د بایدن اظهارات د « نه زغم وړ» او یوه « لویه رسوايي» بللې ده.
انځور: picture-alliance/AP Photo/A. Young-joon جوباید څه وخت مخکي د شمالي کوریا اټومي پروګرام د «جهاني امنیت دپاره جدي تهدید» بللی ؤ او سپیني ماڼۍ هم ویلي وه، چي بایدن نیت لري، د شمالي کوریا په مقابل کي یوه« محاسبه سوې کړنلاره» پر مخ بوزي.
د شمالي کوریا خارجه وزیر، کوان یونګ ګون د جوباید اظهارات یوه «سخته اشتباه» بللې او ویلي، چي دغه هیواد هم مجبوره دی متقابل اقدامات تر سره کړي، چي د «وخت په تیریدو سره به امریکا د یوه ډیر جدي حالت سره مخامخ سي.» هغه د اټومي وسلو د تولید په برخه کي کوښښونه د « خپل حق څخه د دفاع په لار کي یو ګام وباله».
د امریکا د جمهوري ریاست دفتر د تیري جمعې په ورځ اعلان وکړ، چي د شمالي کوریا په مقابل کي یې د امریکا د سیاست څو میاشتنۍ برسي او ارزیابي پایته رسولې ده.
د سپیني ماڼۍ په حواله امریکا نیت لري د «ډیپلوماسۍ او بیرولو» د یوه ترکیبي سیاست د لاري شمالي کوریا د اټومي او بالاستیکي توغندیو د پروګرام بندیدو ته مجبوره کړی.
آ./م.ق./ا.ا.
د شمالي کوریا پوځ څومره غښتلی دی؟
نه يوازي دا چي شمالي کوریا اوس په نړۍ کي يو له تر ټولو ستر پوځ لري، بلکي د خپلو وسلو او تجهیزاتو د لا پیاوړتيا او ډېرښت لړۍ يې هم جاري ساتلې ده.
انځور: Reuters/KCNAدغه هیواد ۷۰۰۰۰۰ پوځ او ۴،۵ میلیونه ریزرف پوځ لري چې د اړتیا په صورت کې خدمت ته اماده وي. په دې توګه نو د دغه هیواد نږدې هر ۵ تن پوځي دی.
د وسلو او تجهیزاتو نړیوال شاخص د ۲۰۱۷م کال د رپوټ پر بنسټ، دغه هیواد ۷۶ اوبتلونه، ۵۰۲۵ زیري ټانکونه او ۴۵۸ جنګي الوتکې لري. په دغه انځور کې چې د ۲۰۱۳م کال دی د شمالي کوریا واکمن کم جونګ اون د قوماندې په مرکز کې لیدل کیږي.
شمالي کوریا هرکال په پلازمېنه پيونګ یانګ کې د یوه پوځي پرېډ په ترڅ کې خپلې وسلې او تجهیزات نندارې ته وړاندې کوي. د وسلو دا ډول ننداره د دغه کمونیستي هیواد له تاریخي او ملي ورځو سره مطابقت کوي.
امریکا متحدو ایالاتو د تيري سه شنبې په ورځ د شمالي کوریا له خوا، د بالستيک توغندي د آزموینې بریاليتوب تائید کړ. د امریکا د بهرنیو چارو وزیر ریکس ټیلرسن ویلي دي: دغه آزموینه د شمالي کوریا له خوا امریکا، د هغه متحدینو او نړیوالو ته د ورپیښ احتمالي نوي ګواښ جدیدت ښيي.
پر ډیرو سختو بندیزو سربیره شمالي کوریا خپل د اټومي پروګرام لړۍ جاري ساتلې ده. دغه هیواد په مجموع کې تر اوسه پورې ۵ اټومي آزمویني کړي دي. یوازي په ۲۰۱۶م کال کې یې دوې آزموینې کړي دي. د سویلي کوریا د دفاع وزیر وایي چې په ډیر قوي احتمال به شمالي کوریا ډیر ژر شپږمه آزموینه هم وکړي.
یوازي چين او روسیه تر اوسه پوري د شمالي کوریا متحدین دي. د شمالي کوریا رژیم د «امریکا متحدو ایالاتو امپریالیستي قدرت» خپل اصلي دښمن بولي او جاپان او سویلي کوریا په دویمه درجه کې ځای لري. شمالي کوریا د امریکا او سویلي کوریا د کلني ګډ پوځي مانورونو پر وړاندې په ډیر حساسیت سره غبرګون ښيي.
داسې ښکاري چې د شمالي کوریا له خوا د بالستيک توغندی تر ازموینې وروسته اوس د امریکا حوصله ختمه شوي وي. د شمالي کوریا د توغندو آزموینه د جې ۲۰ په سرمشریزه کې یوه د بحث موضوع وه.
