د کاناډا د سي ټي وي نیوز په نامه تلویزیون د یوه رپوټ پر اساس، متقاعد عسکر ډیويډ لاوري د يکشنبې په ورځ د کابل په هوايي ډګر کې تر ناستې لږ وروسته د طالبانو له خوا «ونیول شو.»

یاد تلویزیون د یوې بې نومه سرچينې له قوله ويلي چې معلومه نه ده چې نیول شوی کاناډايي عسکر چېرته بیول شوی دی.

د کاناډا صدراعظم وویل: «زه مخکې له هر څه تاسو ته ډاډ درکوم چې د کاناډا حکومت دغه پېښه او وضعیت ډېر زیات جدي نیولي ده.» جستین ترودو دغه څرګندونې د پيرو په لیما ښار کې د اسیا پسفیک اقتصادي همکاریو (APEC) د سرمشريزې په پای کې هغه وخت وکړې چې د نیول شوي عسکر په هکله وپوښتل شو.

ترودو زیاته کړه چې د لاوري کورنۍ له پاره کونسلي مشورې چمتو شوي خو «د عملیاتي او شخصي حریم دلایلو» پر اساس ېې د جزئیاتو له ورکړې ډډه وکړه.

لاوري په ۲۰۲۱م کال کې د دې له پاره د رسنیو د خبرونو په سرټکو کې راغی چې له کابل څخه یې د امریکا او د هغه د متحدینو د ځواکونو د وتلو په ګډوډيو کې ېې د کابو سلو افغانانو په اېستلو کې مرسته وکړه.

د فرانسې خبري آژانس ليکي ډيويډ لاوري د کاناډا په پوځ کې لسیزې تېرې کړي او د دغه پوځ د ځانګړو ځواکونو د عملیاتي واحد «جاینت تاسک فورسز ۲» یو مهم غړی وو.

د لاوري په هکله ويل شوي چې په وروستيو کې ېې په کابل کې یو خصوصي امنتيي شرکت درلود.

(AFP)mks/akh