د نړۍ په سطحه په تر ټوله لوړه ارتفاع کې د پيسو اتومات ماشين په پاکستان کې دی. دغه ماشين د ګلګټ بلتستان اړوند د خنجراب په لوړه چې د سمندر له سطحې ۴۶۹۳متره لوړه سیمه ده، د پاکستان د ملي بانک له خوا کيښودل شوی دی.

په تر ټولو کم عمر کې د نوبل جايزې د ګټلو مقام هم پاکستان ګټلی دی. په ۲۰۱۴م کال کې چې کله ملالې يوسفزۍ ته د نوبل جايزه ورکول کيده، عمر يې ۱۷ کاله وو.

د قراقرم لار، په دنيا کې تر ټولو لوړه لار ده. دغه لار د قراقرم او همالیا د غرونو له منځه تيره شوې چې د چين سنکيانګ ایالت د پاکستان له شمال سره نښلوي. د خنجراب لوړه په دغه مسير کې تر ټولو لوړه نقطه ده.

د ټولې نړۍ د فوټبال توپونو ۶۰ تر ۷۰ سلنه برخه په پاکستان کې تولیديږي. سيالکوټ د نړۍ په سطحه هغه يوازينی ښار دی چې تر ټولو ډیرې (نژدې ۲۰۰) د فوټبال توپونو د توليد کارخانې لري.

د کانال له طریقه د ځمکو د خړوبولو په برخه کې هم پاکستان د تر ټولو اوږد کانال په درلودلو سره د نړۍ په سطحه لومړی مقام لري. دغه کانال په مجموع کې ۱۴ اعشاريه ۴ ميلیون هکټاره ځمکې ته اوبه ورکوي.

د دويچه وله اردو څانګې په حواله، د امبولانسونو تر ټولو لويه شبکه پاکستان لري. دغه نړیوال مقام، د پاکستان خصوصي سازمان «ايدهي فاونډیشن» ترلاسه کړی دی.

د کريکټ په نړيوالو سياليو کې د تر ټولو کم عمره لوبغاړي د ګډون مقام هم پاکستان ترلاسه کړی دی. حسن رضا په ۱۹۹۶ کال کې د زيمبابوې سره په نړيوالې لوبه کې ګډون وکړ چې عمر يې ۱۴ کاله او ۲۲۷ ورځې وو. دغه لوبه د پاکستان په فیصل آباد کې وه.

د کريکټ په تاريخ کې د تر ټولو چټک يا تيز توپ اچونې ريکارډ پاکستاني لوبغاړي شعیب اختر ګټلی دی. هغه په ۲۰۰۳م کال د انګلستان خلاف لوبې پر مهال توپ په ساعت کې د ۱۶۱ اعشاريه ۳ کيلومترو په سرعت باندې وار کړی وو.

محمد الیاس په کال ۱۹۵۲ کې شل کلن وو چې د مدني قاضي آزموينه يې پاس کړه. خو شرط کيښودل شو که هغه کاميابه کيږي هم، نو د ۲۴ کلنۍ څخه د مخه به کار نه کوي. خو ۸ میاشتې وروسته په دغه شرط کې نرمي راوستل شوه او هغه ته د کار کولو اجازه ورکړل شوه. په دې حساب محمد الیاس په تر ټولو کم عمر کې مدني قاضي شو.