عمران خان تر وخت مخکې ټاکنو غوښتنه کړې
۱۴۰۱ تیر ۲۷, دوشنبه![Videostill | DW News | Imran Khan](https://static.dw.com/image/62334085_800.webp)
عمران خان د دوشنبې په ورځ (۲۰۲۲م کال د جولای ۱۸) له هغه وروسته چې ګوند یي د پنجاب ایالت په پارلمان کې اکثریت چوکۍ ترلاسه کړې، د ټول هیواد په کچه د تر وخت مخکې ټاکنو غوښتنه وکړه.
د پنجاب په ایالتي ټاکنو کې ۲۰ چوکۍ په پام کې نیول شوې وې چې په حقیقت کې د کريکټ د دغه پخواني ستورې د محبوبیت له پاره چې په اپریل میاشت کې د مرکزي پارلمان له خوا د سلب اعتماد کیدو وروسته له خپلې دندې لیري شوی و، یوه آزموېنه وه.
د عمران خان په مشرۍ د تحریک انصاف ګوند د پنجاب ایالت په پارلمان کې ۱۵ چوکۍ ترلاسه کړې. دا په داسې حال کې ده چې د شهباز شریف په مشرۍ د مسلم لیګ ګوند یوازې ۴ چوکۍ او د احرار په نوم یو مستقل ګوند بیا یوه چوکۍ په لاس راوړله.
هغه ضمني انتخاباتو ته چې د یکشنبې په ورځ په پنجاب ایالت کې ترسره شول، د ملي انتخاباتو له پاره چې ټاکل شوې ده د راتلونکي کال په اکتوبر میاشت کې ترسره شي ډیر مهم ګڼل کیږي.
عمران خان وروسته له دې چې د صدارت له مقام څخه لیري کړای شو، د ټول هیواد په کچه یي د تر وخت مخکي ټاکنو له پاره کمپاین کړی دی.
عمران خان د دوشنبې په ورځ د رایو تر شمیرل کیدو وروسته په خپل تویتر کې ولیکل: «د پرمختګ یوازنۍ لاره د آزاد او شفاف ټاکنو ترسره کول دي. بله هره لاره به یوازې د سیاسي نامعلوم وضعیت او اقتصادي بې نظمۍ سبب شي.»
عمران خان د لومړي وزارت څخه تر لیري کیدو وروسته خپل زرګونه پلویان مظاهرو ته ور وبلل او په خپلو تفصیلي ویناو کې یې ادعا کوله چې نوی حکومت د امریکا متحده ایالاتو د یوې توطيې په وسیله پر پاکستان تحمیل شوی دی.
نوموړي اوسنی حکومت د روان انفلاسیون یا پیسو د پاړسوب مسئول وباله، په داسې حال کې چې اکثره شنونکي په دې بارو دي چې شهباز شریف ته اقتصادي ستونزې له تیر حکومت څخه په میراث پاتې دي.
تیره اونۍ د پيسو د نړیوال صندوق په موافقې سره د ژغورنې بستو له طریقه، په دې هیواد کې د انفلاسیون کچه یو څه راکمه شوه.
پاکستاني ورځپاڼو لیکلي دي چې د اوسني انتخاباتو نتیجه په هیواد کې د روان اقتصادي ستونزو پایله ده چې د عاید نږدې نیمایي یې د درنو بهرنیو پورونو د ادا کولو له پاره لګول کیږي.
شهباز شریف د دې له پاره چې د پيسو له نړیوال صندوق څخه ۷،۲ میلیارده ډالره مرستو بسته ترلاسه کړي، د دې صندوق د شرایطو پوره کولو په خاطر مجبوره شو چې د سوون توکو سبسیډي لغوه کړي او له دوو میاشتو څخه په کمه موده کې قیمتونه تر ۵۰ سلنې لوړ کړي.
د پنجاب ایالت پارلماني ټاکنې وروسته له هغې ترسره شوې چې د ټاکنو کمېسیون د تحریک انصاف ګوند ۲۰ تنه غړي، ګوند ته د وفادارۍ د تغیر په دلیل، سلب صلاحیت کړل.
په پنجاب کې د ټاکنو پایلې په دې ایالت کې د پاکستان د لومړي وزیر د زوی حمزه شریف د وزیر اعلی په توګه د لنډ مهالې دورې د احتمالي پای په معنا ده.
د فرانسې خبري آژانس: ش.ن/ ن.ز