د رسنیو د رپوټونو په حواله دمګړۍ د تهران او واشنګټن ترمنځ د ایران د يورانيمو د زيرمو او هرمز تنګي د کنترول پر سر اختلافات همداسې پر ځای پاتې دی.

د پاکستان د حکومت له لوري د پيغام تر رسولو دوې ورځې وروسته د پاکستان د کورنيو چارو وزير سيد محسن نقوي، په تهران کې د ایران د بهرنیو چارو له وزير عباس عراقچي، سره يو ځل بيا وليدل. د ایران د نيمه دولتي خبري آژانس تسنيم په حواله په دې ليدنه کتنه کې د دواړو مشرانو ترمنځ نورې خبرې اترې هم وشوې.

اړونده موضوع: ترمپ: د ایران جواب باید سل په سلو کې سم وي

د امريکا متحده ایالاتو د بهرنيو چارو وزير مارکو روبيو د پنجشنبې په ورځ خبريالانو ته وويل چې له مذاکراتو څخه «ځينې مثبتې اشارې» ترلاسه شوي دي خو که چېرې تهران د هرمز تنګي د محصول نظام نافذوي نو يوه حل ته به رسېدل امکان ونه لري.

نوموړي زياته کړې چې ایران د فبرورۍ پر ۲۸مه نيټه د جګړې د پيلیدو وروسته د هرمز تنګي تر ډېره د کښتيو پر مخ عملاً تړلی وو.

مارکو روبيو، وويل: «يو څه مثبتې اشارې مو ترلاسه کړي خو زه نه غواړم له حده ډېر هیله من شم. په راتلونکو څو ورځو کې به وګورو چې وضعيت کوم لوري ته ځي.»

بل پلوه ته ولسمشر ډونالد ټرمپ، ويلي دي چې متحده ایالات به بالاخره د ایران په لوړه کچه غني شويو يورانيمو زيرمې ولکه کړي. واشنګټن په دې آند دی چې دا زیرمې د اتومي وسلو د جوړلو له پاره کاريدلی شي خو تهران وايي چې دا يوازې د ملکي موخو له پاره دي.

ولسمشر ترمپ، د پنجشنبې په ورځ له خبريالانو سره په خبرو کې وويل: «موږ به یې ترلاسه کړو. موږ ورته اړتيا نه لرو او نه هم غواړو له ځانه سره یې وساتو. غالب امکان دا دی چې موږ به یې د ترلاسه کولو وروسته له منځه يوسو خو پرې به نږدو چې ایران یې ولري.»

د ټرمپ، تر څرګندونو د مخه دوو لوړپوړو ایراني سرچینو رويترز خبري آژانس ته وويل چې د ایران مذهبي مشر آيت لله مجتبی خامنه اي، لارښوونه کړې ده چې يورانيم بايد له هېواده دباندې ونه ليږدول شي.

اړونده موضوع: ترمپ: له ایران سره به جگړه ډیره ژر پای ته ورسوو

امريکايي ولسمشر د دې ترڅنګ د ایران پر هغه پلان هم نيوکې کړي چې له مخې یې ایران د هرمز تنګي څخه له تیرېدونکو کښتيو څخه د فيس د اخیستو اراده ښوولې ده.

ټرمپ، په دې اړه وويل: «موږ غواړو چې دا لاره پرانېستې او آزاده پاتې شي. موږ محصول نه غواړو. دا يوه د اوبو یوه نړیواله لاره ده.»

ټرمپ، په نومبر میاشتې کې د کیدونکو منځنۍ دورې د ټاکنو له کبله د داخلي فشار سره مخامخ دی. په امريکا کې د سون توکو بیو لوړيدو له کبله د خلکو غوسه مخ پر ډيرېدو ده او د ټرمپ، د محبوبيت کچه راټيټه شوې ده.

په همدې ترڅ کې تهران د روانې اونۍ په پېل کې امريکا ته خپل نوی وړاندیز هم ليږدولی دی.