د پيښور يوې محکمې په مارچ مياشت کې د «پاکستان تلیکام ادارې» ته لارښوونه کړې وه چې دغه اپليکشن د هغو موادو د خپرولو له کبله چې د پاکستان د ټولنې له پاره د »منلو وړ نه دي« وتړي.
خو نن پنجشنبه (۲۰۲۱م کال د اپريل لومړۍ) د پاکستان د تليکام ادارې يوه وکيل جهانزيب ميسود، د فرانسې خبري آژانس ته وويل: «د اپليکشن له خوا موږ ته ډاډ راکړل شوی دی چې مواد به چاڼوي او معتدله منځپانګه به خپروي.»
ټيک ټاک چې د چين تر ټولو ستر د ويډيو شريکولو اپليکیشن دی، په پاکستان کې ډېر شهرت لري، په ځانګړي توګه د ښاري سيمو په ځوان قشر کې. دې اپليکيشن په اکتوبر میاشت کې هم چې په لومړي ځل پرې بندیز لګول شوی وو، ژمنه کړې وه چې خپله منځپانګه به معتدله کړي او ټول هغه حسابونه به تړي «په تکرار سره په بد اخلاقيو کې ښکيل» وي.
د لومړي وزير عمران خان سلاکارونو هم پر دغه اپ نيوکې کړي وې او ويلي يې ول چې له ځوانو نجونو څخه «ناوړه استفادې» ته لاره هواروي.
اړونده موضوغ:آلمان: پر ټولنیزو رسنیو له نفرت ډکې تبصرې ليکوونکي جزايي شوي
ټیک ټاک په پاکستان کې پر دغه اپليکشن د بندیز لغوه کولو هرکلی کړی دی. د بیان د آزادۍ فعالان تل په پاکستان کې د حکومت له خوا پر انترنت، چاپي رسنيو او اليکرونيکي رسنيو د سانسور له کبله انتقادونه کوي.
تير کال پاکستاني منتظيمونو له يوتيوب ټولنیزې شبکې څخه غوښتنه کړې وه چې په دغه هيواد کې ټولو هغو ويديويي موادو ته لاس رسی په سملاسي توګه بند کړي چې د هغوی له نظره «د انتقاد وړ وو.» دا کار هم د سختو انتقادونو باعث ګرځيدلی وو.
زموږ له آرشيف څخه:
په يوټيوب کي په ميليونو ډالره څنګه ګټل کيږي؟
د يوټيوب له لاري زياتي پيسې هم ګټل کيدلای سي. دا چي په ۲۰۲۰م کال چا په يوټيوب کي په کومه نوې مفکوره زياتي پيسې ګټلي، په دغه انځوريز راپور کي يې موندلای سئ: انځور: Ozan Kose/AFP/Getty Images ۱۰ مقام ـ جيفري سټار، کلنی عايد ۱۵ ميليونه ډالره جيفري سټار د ۲۰۱۹م کال له جون مياشتي بيا د۲۰۲۰م کال تر جون مياشتي پوري پر انټرنټ د زياتو پيسو ګټونکو په قطار کي راغلې ده. دغه ځوانه د مک اپ يا مياج کارپوه او سندرغاړې ده او پر اړونده موضوعاتو پر يوټيوب ويډيوګاني خپروي. پر يوټيوب د هغه د سبسکرايبرز يا مينه والو شمير نژدې ۱۷ ميليونه دی. هغه په ياده موده، يعني يو کال کي ۱۵ ميليونه ډالره له دې لاري ګټلي دي.
انځور: CA Photo/Newscom/picture alliance ۹ مقام ـ ډيويډ ډوبرک، کلنی عايد ۱۵،۵ ميليون ډالره ډيويډ ډوبرک ۱۵،۵ ميليونه ډالره ګټلي دي. دغه ۲۴کلن د يوټيوب ستوری کاميدي ويډيووي جوړي چي د سبسکرايبرز شمېر يې ۱۸ ميليون دی. هغه داسي حرکات کوي چي کتونکي ورته حيران پاتيږي.
انځور: Dave Safley/ZUMA/picture alliance ۸ مقام ـ اسټيون جان، کلنی عايد ۱۷ ميليونه ډالره د سټيون چان په نوم دغه کس په يوټيوب کي د بليپي په نوم مشهور دی. هغه د ماشومانو له پاره ښوونکي ويډيووي جوړوي او دغه ويډيوګاني يې ۸،۲ ميليارد ځله کتل سوي دي. هغه د ۲۰۱۹م کال له جون څخه بيا د ۲۰۲۰م کال تر جون پوري په خپلو دغو ويډيوګانو ۱۷ ميليون ډالره ګټلي دي.
انځور: youtube.com/Blippi ۷ مقام ـ شپږ کلنه ناستيا، کلنی عايد ۱۸،۵ ميليونه ډالره شپږ کلنه روسۍ نجلۍ انستاسيا رادزينسکايا چي په يوټيوب کي په ناستيا مشهوره ده، په دې توانېدلې ده چي پر يوټيوب ۱۸،۵ ميليون ډالره وګټي. پر يوټيوب د هغې د مينه والو شمير ۱۹۰،۶ ميليونه دی او د هغې ويډيوګاني تر ۳۹ ميلياردو څخه زيات ځلي کتل سوي دي. هغه په تېر کال په تر ټولو زياتو پيسو ګټونکو کي پر ۷ مقام ده.
انځور: youtube.com/Like Nastya ۶ مقام ـ پريسټن آريمينټ، کلنی عايد ۱۹ ميليونه ډالره پريسټن آريمينټ پر يو ټيوب څو چېنلونه چلوي او په ټوليزه توګه يې د سبسکرايبرز شمير دمګړی ۳۳،۴ ميليونه دی. هغه د ۲۰۱۹م کال له جون څخه بیا د ۲۰۲۰م کال تر جون پوري نژدې ۱۹ ميليونه ډالر ګټلي دي.
انځور: youtube.com/Preston ۵ مقام ـ مارک فشباک، کلنی عايد ۱۹،۵ ميليونه ډالره مارک فشباک د کمپيوتري لوبو ويډيوګاني جوړوي او بيا يې پر يوټيوب خپروي. نوموړي له دې لاري د ۲۰۱۹م کال له جون څخه بيا د ۲۰۲۰م کال تر جون مياشتي پوري ۱۹،۵ ميليونه ډالره ګټلي دي. هغه پر يوټيوب باندي ۲۷،۸ ميليونه سبسکرايبر لري او د هغه ويډيووي ۳،۱ ميليادر ځله کتل سوي دي.
انځور: Ethan Miller/Getty Images/AFP ۴ مقام ـ ريټ اينډ لنک، کلنی عايد ۲۰ ميليونه ډالره دغه دوه ځوانان په تيرو دوو کلونو کي په يوټيوب کي په شل ميليونه ډالره ګټلو بريالي سوي دي. هغوی له تيرو اتو کلونو راهيسي پر يوټيوب خپل چېنل چلوي او په دې توګه په اصطلاح له سابقه لرونکو يوټيوبرانو څخه دي. ريټ جېمز مکلوګن او د هغه ملګری چارلز لنکن عموما د بحث پروګرامونه جوړوي خو طرز يې ځانګړی دی.
انځور: Frederick M. Brown/Getty Images/AFP ۳ مقام ـ ډوډ پرفېکټ، کلنی عايد ۲۳ ميليونه ډالره د ډوډ پرفېکټ په نوم يوټيوب چېنل لرونکی دمګړی ۵۷،۵ ميليونه سبسکرايبر لري او ويډيووي يې تر ۲،۷۷ ميليارد ځله زيات کتل سوي دي. هغه د ۲۰۱۹م کال د جون له لومړۍ نېټي بيا د ۲۰۲۰م کال د جون تر لومړۍ نېټي پوري ۲۳ ميليونه ډالره ګټلي دي. هغه د پېنټ بال، د مصنوعي پوپنچو د لوبو او نورو لوبو ويډيوګاني جوړوي او پر يوټيوب يې خپروي.
انځور: Photoshot/picture alliance ۲ مقام ـ مسټر بيسټ يا جيمي ډونلډسن، کلنی عايد ۲۴ ميليونه ډالره مسټر بيسټ چي اصلي نوم يې جيمي ډونلډسن دی، د يوټيوب نوی ستوری دی. د هغه د سبسکرايبر شمير ۴۷،۸ ميليونه دی او د هغه ويډيووي درې ميليارده ځله کتل سوي دي. هغه د ۲۰۱۹م کال له جون مياشتي څخه د ۲۰۲۰م کال د جون مياشتي تر لومړۍ نېټي پوري ۲۴ ميليون ډالره ګټلي دي.
انځور: youtube.com/MrBeast ۱ مقام ـ ريان کاجي، کلنی عايد ۲۹ ميليونه ډالره د ريان کاجي په نوم ۹ کلن هلک د ۲۰۱۹م کال له جون مياشتي څخه تر ۲۰۲۰م کاله پوري ۲۹ ميليون ډالره ګټلي دي. په يوټيوب کي د هغه ويډيوګاني تر ۱۲ ميليارده زيات ځله کتل سوي دي. په يوټيوب کي د هغه د سبسکرايبر ښمېر تر ۴۱ مليونو زيات دی. د هغه پر يوټيوب چېنل د ماشومانو پر حرکاتو او شيانو ويډيوګاني خپريږي.
انځور: youtube.com/Ryan's World
