د اسوشتيد پريس خبري آژانس په حواله د تيمور په نوم د کښتۍ ضد دا کروز توغندی د سې شنبې په ورځ وآزمويل شو. د پاکستان د سمندري ځواک په حواله دا توغندی په کاميابۍ سره توغول شوی دی.
پاکستان دا توغندی په داسې حال کې آزمويلی چې د پاکستان سمندري ځواک پر مهمو سمندري لارو په ځانګړي توګه له هرمز تنګي څخه د تیريدونکو تجارتي کښتيو د بدرګه کولو چارو ته دوام ورکوي.
اړونده موضوع: پاکستان له ځمکې څخه د ځمکې ويشتونکي اوږده واټن توغندي کاميابه تجربه کړې
د پاکستان د پوځ د عامه اړيکو څانګې له لوري په جاري کړل شوې بيانيه کې ويل شوي دي چې دا کروز توغندی په دقت سره خپل هدف ته رسېدلی شي.
د پاکستان د اتومي انرژۍ کمېسيون، کهوټا تحقيقاتي ادارې، سپارکو او د دفاعي علومو او تکنالوژۍ سازمان په ګډه د توغنديو پر تخنيک څېړنې پېل کړې وې. په دې ګالرۍ کې د پاکستاني توغنديو په اړه جزيات ترلاسه کولی شئ:
انځور: ISPRپاکستاني توغندي او واټن یې
د پاکستان د بالستيک ميزايل پروګرام له نزدې واټن څخه نيولې تر منځني واټن ويشتلو پوري وړتيا لرونکي ميزايل لري.
حتف ون يا حتف يو د لنډ واټن لومړی بالستېک میزايل وو چې پاکستان جوړ کړی وو او په لومړي سر کې یې له ۷۰ تر ۱۰۰ کلوميترو پورې واټن وهلای شوای. دا ميزايل د سپارکو شرکت د نورو په مرسته په ۱۹۸۹م کال کې جوړ کړی وو. دا په ۱۹۹۲م کال کې د پاکستان پوځ ته وسپارل شو.
حتف اته يا رعد دوه توربو جېټ پاور کروز ميزايل دی. پاکستان د ۲۰۰۷م کال په اګست کې د دې آزموينه پيل کړې وه. د رپوټونو په حواله تر يو شمير تجربو وروسته د ۲۰۱۶م کال په جنورۍ کې ترسره شوې تجربه یې تر اوسه تر ټولو بريالۍ وه. دا ميزايل تر ۳۵۰ کيلومترو پوري واټن وهي.
حتف شپږ، شاهين دوه توغندی
شاهين دوه د منځني واټن بالستېک توغندی په اصل کې د شاهين ون توغندي عصري شکل دی چې په لومړي سر کې د شاهين ون توغندي سره د دويمې درجې د موټور په توګه لګول شوی وو. په ۲۰۰۰م کال کې د جوړ شوي دې توغندي آزموينه په ۲۰۰۴م کال کې وشوه، په داسې حال کې چې د نصبولو وروستۍ تجربه یې په ۲۰۱۴م کال کې ترسره شوه. دا ميزايل د ۱۵۰۰ او ۲۰۰۰ ترمنځ واټن وهلې شي.
حتف دوه يا د لنډ واټن ابدالي بالستېک توغندي ته په لومړي سر کې د حتف ون میزايل د دويمې مرحلې د بڼې په سترګه کتل کيدل او دا د حتف ون میزايل په لاندنۍ برخه کې نصب شوی وو. له دې کار څخه موخه د ميزايل واټن زياتول وو. د توغندی د ۲۸۰ څخه تر ۴۰۰ کلوميترو پورې واټن وهلی شي.
د پاکستان د حتف پنځه توغندي د جوړولو کار په اتيايمه لسیزه کې پیل شوی وو چې وروسته د غوري په نوم ونومول شو او په ۱۹۹۸م کال کې و آزمويل شو. غوري دوه بالستېک میزايل کې د فولادو پر ځای المونيوم کارول شوي ول چې له کبله یې دا تر ۱۸۰۰ کلوميترو پورې واټن وهلی شي.
په ميزايل تکنالوژۍ کې د پاکستان تر ټولو مهمه وسله د ابابيل توغندی دی. دا ميزايل په يوه وخت کې تر ۲۲۰۰ کيلومترو واټن پورې څو اهدافه په نخښه کولی شي. دا توغندی د کهوټا تحقيقاتي مرکز ساينس پوهانو او انجينرانو جوړ کړی او لومړۍ آزموينه یې د ۲۰۱۷م کال په جنورۍ مياشت کې شوې وه.
حتف څلور، شاهين ون توغندی
د حتف څلور يا شاهين ون توغندي د جوړولو چارې په ۱۹۹۳م کال کې پېل شوې وې او لومړۍ آزموينه یې د ۱۹۹۹م کال په اپريل مياشت کې ترسره شوې وه. د ۲۰۰۲ او ۲۰۱۰م کالونو ترمنځ موده کې یې تخنيک عصري کړل شو او نورې آزموينې یې ترسره شوې. دا ميزايل له ۷۵۰ څخه تر ۹۰۰ کيلومتره پورې واټن وهلی شي او د ۲۰۰۳م کال په مارچ مياشت کې د پاکستان پوځ ته وسپارل شو.
په دغه اعلاميه کې زياته شوې: «دې آزموينې د پاکستان د سمندري ځواک هغه وړتيا تائيد کړې چې په سمندر کې په لېرې واټن کې پراته د دښمن اهداف لټولی او هدف ګرځولی شي او هغه په اغیزمنه توګه ويجاړولی شي.»
د هېواد ساينس پوهانو او انجينرانو ته مبارکي
په دې اعلاميه کې ويل شوي دي چې د پاکستان د سمندري ځواک دا لاسته راوړنه د ملي دفاعي وړتيا په برخه کې يوه مهمه اضافه ده چې د پاکستان د وسله والو ځواکونو د دودیزو جګړو او ګډو حملې وړتيا لا پسې پياوړې کوي.
اړونده موضوع: پاکستان د لنډ واټن ویشتونکي توغندی بریالۍ آزموینه کړې
د اعلامیې په حواله د پاکستان ولسمشر آصف زرداري، لومړي وزير شهباز شريف، د پوځ لوی درستیز جنرال آصف منیر او د پوځ نورو مشرانو د دې مهمې بريا له کبله د هېواد ساينس پوهانو او انجينرانو ته مبارکي ویلې ده.
