اسوشيېتد پريس خبري آژانس په پيښور کې د پوليسو په حواله ليکلي دي چې پېښه د دوشنبې په ورځ (۲۰۲۱م کال د فبروري ۲۲مه) هغه مهال رامنځته شوه چې د افغانستان پولې ته نژدې د شمالي وزيرستان په قبايلې سیمه کې د دغو ښځو موټر تر وسله وال بريد لاندې راغلی.

د ځايي پولیسو يوه ویاند، اقبال خان وويل چې پر دغو ښځو باندې برید د ميرعلي ښار اړوند په ايپې کلي کې شوی دی.

د يادې سيمې د پولیسو مشر، شفيع الله خان هم پېښه تاييد کړې ده او ويلي يې دي چې پولیسو د حمله کوونکو د نيولو په موخه لټون پیل کړی دی.

زیاته شوې ده چې حمله کوونکې نژدې غرونو ته تښتېدلي دي او د پيښې مسؤليت کومې ډلې پر غاړه نه دی اخیستی.

چارواکو ويلي دي چې وژل شوو ښځو د سباوون په نوم يوې پاکستانۍ خیريه موسسې کې کار کاوه. د دغې موسسې په اړه ويل شوي دي چې دوی هغو ښځو ته د سوداګرۍ په برخه کې روزنې ورکوي چې په خپلو کورونو کې کار کوي او دغه راز هغوی ته د ښځو د حقونو په اړه پوهاوی هم ورکوي.

وژل شوې ښځې د خيبر پښتونخوا ایالت له بنو ښار څخه ميرعلي ته پر لاره د وسله والو په کمين کي ختلي. پولیس وايي، داسې ښکاري چې وسله والو د مخه معلومات درلودل او سيمې ته د دغو ښځو رسيدو ته په انتظار ول.

د پاکستان د بشري حقونو فعالانو په ټولنيزو رسنيو کې دغه پېښه غندلې او د عاملینو پر وړاندې يې د جدي اقداماتو غوښتنه کړې ده.

په وروستيو میاشتو کې وسله والو په شمالي وزيرستان کې خپل فعاليتونه ډير کړي، چې له امله يې په دغه سیمه کې يو ځل بیا د پاکستاني طالبانو د بيرته منسجم کيدو اندېښنې راپورته شوي دي.

آژانسونه/م.ک.ص./ن.ز.