د پاکستان د کابينې د اقتصادي همغږۍ کميټې چې يوه بااختياره کميټه ده، د چهار شنبې په ورځ (۲۰۲۱م کال د مارچ ۳۱مه) په اسلام آباد کې له هندي چارواکو سره تر يوې غونډې وورسته وويل چې له هند څخه یې د پنبې او بورې وارداتو ته اجازه ورکړې ده. دا ګام د دواړو هيوادونو ترمنځ د اړيکو د نورماله کيدو له پاره ډېر مهم بلل شوی دی.
د پاکستان د مالیې وزير حماد اظهر تر غونډي وروسته د آلمان خبري آژانس «ډي پي ای» سره په خبرو کې وويل: «موږ له هند څخه د پنبې او بورې د واردولو اجازه ورکړه.»
نوموړي زياته کړه چې شخصي سيکتور ته يې له هند څخه د ۰،۵ ميليونه ټنه بورې د واردولو اجازه ورکړې ده. هغه وويل چې په هند کې د بورې بیه ټيټه ده.
حماد اظهر وويل چې حکومت د هيواد د نساجي صنعت له خوا د غوښتني او لږو سيمه ایزو حاصلاتو له وجې له ټولې نړۍ څخه چې هند هم پکې شامل دی، د پنبې د واردولو اجازه ورکړې ده.
پاکستاني وګړي په دې وروستیو کې د بيو د لوړيدو څخه شکايت کويانځور: Imago stock&people له هند سره د تجارتي اړيکو د بيرته پيلولو دا پريکړه په داسې حال کې شوې چې د دواړو هيوادونو لومړيو وزيرانو يو بل ته د استول شويو ليکونو له لارې په سيمه کې د امن او اړيکو د ښه کولو هیله څرګنده کړې وه.
د مودي ليک ته د عمران خان ځواب
د هند لومړي وزير نريندر مودي د مارچ پر ۲۳مه نېټه چې د »پاکستان جمهوريت د ورځې« په توګه لمانځل کيږي، د پاکستان لومړي وزير عمران ته په استول شوي ليک کې د دغي ورځې مبارکي ورکړې وه او له پاکستان سره یې د اړيکو د ښه کولو هیله څرګنده کړې وه.
د رسنيو په حواله عمران خان بيا د مودې دې ليک ته ځواب ورکړی دی او ليکلي یې دي: «د پاکستان وګړي هم د هند په ګډون له ټولو ګاونډيو هيوادونو سره د سوله ایزې همکارۍ غوښتونکي دي. او موږ په دې باور لرو چې په سويلي آسيا کې پايداره سوله او ثبات د هند او پاکستان ترمنځ په ځانګړې توګه د جمو او کشمير د شخړې په ګډون د ټولو شخړو په حل پورې تړلی دی.»
اړونده موضوع: جنرال باجوه: له هند سره ښې اړیکې اړیني دي
د هند او پاکستان اړيکي له اوږدې مودې راهيسې ترنګلي دي او د کشمير پر لانجې د دواړو هيوادونو ترمنځ دوې جګړې هم شوي دي.
خو په فيبرورۍ مياشت کې دواړو هيوادونو په کشمير کې د کنترول پر کرښه چې کشمير پر دوو برخو ويشي، د اوربند د هوکړې د عملي کولو هوډ څرګند کړ. په ۲۰۰۳م کال کې د دې توافقنامې تر لاسليکيدو راهيسې د کنترول پر کرښه د نښتو په ترڅ کې تر ۳۰۰ زيات پاکستانيان وژل شوي دي.
په ۲۰۱۹م کال کې د هند له خوا د دغه هيواد تر ولکې لاندې کشمير د الحاق تر پريکړې وورسته، پاکستان له هند سره سفارتي اړيکي محدودې کړي او دوه اړخیزه تجارت یې ځنډولی وو.
ب. ص/ ن. ز (dpa)
زموږ له آرشيف څخه:
د هند او پاکستان د پياوړتيا مقايسه
هند او پاکستان هغه هيوادونه دي چي په ۱۹۴۷ کال سره بېل سول او د هغه مخکي د لوی هند برخه ول. دغو دوو هيوادونو تر اوسه ۴ جګړې درلودلې او په لوړه اندازه پر دفاع مصرف کوي. يوه پرتله يې دلته په ۲۶ انځورونو کي کتلای سئ:
انځور: BEHROUZ MEHRI/AFP/Getty Imagesنفوس ـ هند ۱،۲ مليارد ـ پاکستان ۱۹۹ مليونه
د دغه انځوريز راپور معلومات د ۲۰۱۷ کال د مارچ په ۱۲ مه نېټه له ګلوبل فاير پاور پاڼې څخه اخيستل سوي.
نارينه ـ هند ۶۱۶ مليونه ـ پاکستان ۹۵ مليونه
دفاعي کلنۍ بوديجه ـ هند ۴۰ مليارد ډالره ـ پاکستان ۷ مليارد ډالره
د عسکرۍ وړ ـ هند ۴۸۹ مليونه ـ پاکستان ۷۵ مليونه
فعال عسکر ـ هند ۱،۳ مليون ـ پاکستان ۶۲۰ زره
ټولې الوتکې ـ هند ۲۰۸۶ ـ پاکستان ۹۲۳
جنګي الوتکي ـ هند ۶۷۹ ـ پاکستان ۳۰۴
ترانسپورتي الوتکي ـ هند ۸۵۷ ـ پاکستان ۲۶۱
نظامي خدمت وړ هوايي ډګرونه ـ هند ۳۴۶ ـ پاکستان ۱۵۱
ټانکونه ـ هند ۶۴۶۴ ـ پاکستان ۲۹۲۴
زغروال موټر ـ هند ۶۴۶۴ ـ پاکستان ۲۸۲۸
ګرځنده توپونه ـ هند ۲۹۰ ـ پاکستان ۴۶۵
څو ميله لرونکي توپونه ـ هند ۲۹۲ ـ پاکستان ۱۳۴
تجارتي کښتۍ ـ هند ۳۴۰ ـ پاکستان ۱۱
الوتکي وړونکې بېړۍ ـ هند ۲ ـ پاکستان صفر
مهم بندرونه ـ هند ۷ ـ پاکستان ۲
اوبتلونه (تحت البحري) ـ هند ۱۴ ـ پاکستان ۵
فرقاطه (وړې جنګي بېړۍ) ـ هند ۱۴ ـ پاکستان ۱۰
ګزمه کوونکې بېړۍ ـ هند ۱۳۵ ـ پاکستان ۱۲
اټومي وسلې ـ هند ۸۴ ـ پاکستان د ۲۴ او ۷۵ تر منځ
بهرنۍ قرضې ـ هند ۴۵۸ مليارد ډالره ـ پاکستان ۵۸ مليارد ډالره
کاري ځواک ـ هند ۴۹۴ مليونه نفر ـ پاکستان ۶۱،۵ مليونه نفر
تائيد سوي د تيلو ورځنۍ ځېرمي ـ هند ۵،۶ مليارد بېرل ـ پاکستان ۳۷۱ مليون بېرل
پاخه سړکونه ـ هند ۳،۳ مليون کيلومتر ـ پاکستان ۲۶۰ زره کيلومتر
اورګاډي پټلۍ ـ هند ۶۳ زره کيلومتر ـ پاکستان تقريبا ۸ زره کيلومتر
مساحت ـ هند ۳،۲ مليون مربع کيلومتر ـ پاکستان ۷۹۶ زره مربع کيلومتر
د دغه انځوريز راپور معلومات د ۲۰۱۷ کال د مارچ په ۱۲ مه نېټه له ګلوبل فاير پاور پاڼې څخه اخيستل سوي. [ترتيب کوونکی: احمدولي اڅکزی]
