د پاکستان لومړي وزیر عمران خان ویلي دي چې که طالبان د یوه ټول شموله حکومت په جوړولو کې پاتې راشي نو افغانستان به له یوې کورنۍ جګړې سره مخامخ شي.
انځور: Saiyna Bashir/REUTERS
اعلان
عمران خان د سه شنبې په ورځ ناوخته د بي بي سي له اردو څانګې سره په مرکه کې وویل: «که هغوی [طالبان] ټول اړخونه ښکیل نه کړي نو ژر یا وروسته به یوه کورنۍ جګړه ولري.»
ښايي دا لومړۍ ځل وي چې د پاکستان لومړی وزیر عمران خان چې د طالبانو په ملاتړ تورن دی، طالبانو ته داسې یو سخت پیام ورکوي. خان په خپله مرکه کې زیاته کړې: «دا به نو د یوه بې ثباته او له هرج او مرجه ډک افغانستان په معنی او ترهګرو د خوښې سیمه وي. دا د اندیښنې خبره ده.»
خان په داسې حال کې دغه څرګندونې کړي دي چې د روسیې، چین او پاکستان دیپلوماتانو د طالبانو د دولت له مشر سره غونډه وکړه. په دې غونډه کې چې په کابل کې جوړه شوې وه د یوه ټول شموله حکومت پر رامنځ ته کیدو ټینګار شوی دی.
د پاکستان د بهرنیو چارو وزارت ویلي دي چې د افغانستان له پاره د ګاونډیو هیوادونو ځانګړو استازو همداراز له پخواني ولسمشر حامد کرزي او پخواني اجرائیه رئیس عبدالله عبدالله سره هم لیدلي دي.
دا په داسې حال کې ده چې طالبانو د سه شنبې په ورځ د خپلې کابینې ځینې پاتې غړي اعلان کړل چې پکې د افغانستان د ځینو نورو قوموند غړي هم شامل دي. خو لا تر اوسه پورې طالبانو د خپلې کابینې کومه ښځه غړې نه ده معرفی کړې. دا هم روښانه نه ده چې هغوی به ښځو ته په حکومت کې ځای ورکړي او که نه.
د پاکستان د بهرنیو چارو وزیر شاه محمد قریشي د چهارشنبې په ورځ وویل چې هیواد یې غواړي چې نړۍ له طالبانو سره اړیکه ونیسي ترڅو په افغانستان کې د یوه بشري ناورین مخه ونیول شي، خو هغه زیاته کړه چې د طالبانو د حکومت په رسمیت پیژندلو کې بیړه نه شته. د افغانستان ګاونډي او نور هیوادونه اوس په دې اړه فکر کوي چې د طالبانو له حکومت سره څرنګه اړیکه ولري.
د پاکستان لومړي وزیر عمران خان، همداراز پر طالبانو باندې غږ کړی دی چې نجونو ته ښوونځي ته تلو اجازه ورکړي. هغه وویل: «دا مفکوره چې ښځې باید تعلیم و نه کړي اسلامي نه ده. دا له دین سره هیڅ اړیکه نه لري.»
زموږ له آرشیف څخه:
په افغانستان کې د طالبانو ضد اعتراضونو انځورونه
په وروستیو ورځو کې د کابل په ګډون، په مزار شریف او هرات کې افغانانو پراخ لاریونونه وکړل او د آزادۍ، خپلو حقوقو د مراعاتولو او د افغانستان په چارو کې د «د پاکستان د لاسوهنې» د ختمیدو غوښتنه وکړه.
په دغو احتجاجونو کې د ښځو د پراخ حضور دلیل دا دی چې دغه قشر د نورو په پرتله د خپلو حقوقو له لاسه ورکولو په هکله اندېښمن دي. د دوشنبې په ماښام د هرات، کابل او مزار شریف په ښارونو کې هم لاریونونه شوي وو. په دغو لاریونونو کې هم زیاتره ښځو ونډه درلوده.
انځور: WANA/REUTERS
مظاهره کوونکو له نورو ښځو هم وغوښتل چې و نه ډار شي او د ښځو د حقوقو د ساتلو له پاره خپل غږ پورته کړي. د لاریون له ګډونوالو څخه یوې وویل: «موږ په سترو حکومتي پریکړو کې د ګډون او په ټولنه، سیاست او اقتصاد کې د فعالیت غوښتونکي یوو.»
انځور: REUTERS
تر اوسه طالبانو د ښځو د حقوقو په هکله خپل رسمي سیاست نه دی اعلان کړی او یوازې یې ویلي دي چې ښځې «د اسلامي شریعت په چوکاټ» کې کولی شي کار او تحصیل وکړي. ښځې د ټولنې د نورو قشرونو په پرته د طالبانو له حاکمیته ویره لري او اندېښمنې دي چې د زده کړو د فرصت، کار او حقوقي لاس ته راوړنې به یې له منځه ولاړې شي.
انځور: WANA/REUTERS
د مقاومت جبهې مشر احمد مسعود، له لوري په یوه غږیز پیغام کې د عمومي پاڅون، د غوښتنې وروسته یو شمیر ښځې او نارینه سړکونو ته راووتل او د آزادۍ شعارونه یې ورکول. په همدې ترڅ کې د اعتراض کوونکو د شمیر په زیاتیدو او وخت په تیریدو سره د احتجاج کوونکو پر وړاندې د طالبانو غبرګون هم تند شو.
انځور: WANA/REUTERS
تیره ورځ یو شمیر رسنیو خبر وکرړ چې خبریالان یې دغو لاریونونو ته د پوښښ ورکولو پر مهال د طالبانو له لوري نیول شوي دي. طالبانو ویلي دي چې هغه کسان چې د سوله ایزو لاریونونو ترسره کیدل غواړي، باید لومړی له چارواکو اجازه واخلي.
انځور: REUTERS
اعتراض کوونکي په دې باور دي چې طالبان د پاکستان په مرسته د افغانستان په ولکه کولو وتوانیدل، له دې کبله زیاتره شعارونه د پاکستان ضد ول. د پاکستان ضد احساسات هغه وخت لا پسې زیات شول چې د پاکستان د استخباراتي ادارې مشر په یوه ناببره سفر کابل ته ورسید.
