شهزاده هېرې او د هغه مېرمنې شهزادګۍ مېګن اعلان کړی چي غواړي د شاهي کورنۍ له موقف او په دې توګه د پلاز له تدريجي متسحقو کسانو له قطار څخه ووځي. له دې مخکي هم د بريتانيې په شاهي کورنۍ کي يوه همداسي فيصله رامنځ ته سوې وه کله چي هغه وخت هم د شاهي کورنۍ يو غړي د امریکايي مېرمني سره واده وکړ.

د بريتانيې پاچا او د هند قيصر ايدوارد اتم په ۱۹۳۶ کال د زياتو مخالفتونو باوجوده د واليس سمپسن په نوم دوه ځله طلاقه سوي امريکايي مېرمني سره واده وکړ. په شاهي کورنۍ کي انتقادونه د دې لامل سول چي اېدوارد د ۱۱ مياشتي پاچهۍ وروسته له پلاز څخه لاس پر سر سو. هغه خپل پاته ژوند د خپلې مېرمني سره په فرانسه کي تېر کړ.

د بريتانيې د يارک سيمي ډيوک (موروثي اشرافي لقب) شهزاده اندريو چي د برحالې ملکې اليزابېت دويم زوی دی، د امريکايي تجار جېفري اېپشتين سره تړلې يوه لانجه/رسوايي کي ښکېل سو او په نتيجه کي له شاهي کورنۍ څخه ووت. اېپشتين د جنسي کاروبار د تورونو د لګېدو له کبله ځان وژنه وکړه او يوې مېرمني تور ولګاوه چي د شهزاده اندريو سره درې ځله و جنسي اړيکو ته مجبوره کړل سوې وه.

د جاپان شهزادګۍ اياکو به په آينده کي شهزادګۍ او ورسره مل مراعات لرونکې نه وي. دا ځکه چي هغه د کښتۍ جوړونې په سيکتور کي کارګر او په دې توګه د يو غير شاهي او ولسي کس سره واده کول غواړي. د جاپان د قانون له مخي هغه شهزادګياني چي د ولسي کسانو سره واده کوي، د پلاز له مراعاتو څخه خلاصيږي. خو که يو نارينه شهزاده د ولسي مېرمني سره واده وکړي نو مراعات يې له منځه نه ځي.

د سوېډن پاچا کارل ګستاف شپاړسم خپل يو زوی، د هغه مېرمنه او پنځه لمسيان او لمسياني يې له شاهي مراعاتو څخه بهر کړې. د دې معنی دا هم ده چي دغه غړي به نور هغه شاهي مراعات چي د ولسي کسان په پرتله يې د شاهي کورنۍ غړي د بېلګي په توګه د ماليې په ساحه کي لري، نور ونه لري. خو دغه غړي به د دې وروسته هم د شهزاده او شهزادګۍ القاب وساتلای سي.

د ناروې پاچا هارالد پنځم خپل لور مارتا په ۲۰۰۲ کال له شاهي مراعاتو څخه خارجه کړه. دا د هغه وروسته چي مارتا پرېکړه وکړه چي خپل مسلکي او شخصي ژوند د خپلو شخصي شرايطو پر اساس پر مخ بيول غواړي.

د هالند ملکه بېتريکس په رضا له پلاز څخه لاس پر سره سوه. اصلي وجه يې د عمر زياتوالی ؤ. نوموړې ۳۳ کاله د هالند ملکه وه او په ۲۰۱۳ کال يې پلاز خپل زوی ويليم اليکزاندر ته پرېښود. په بريتانيا کي پاچا يا ملکه د ژوند تر آخره پوري بايد پر پلاز ناست وي خو د نړۍ په نورو شاهي کورنيو کي پاچا يا ملکه له مرګ څخه تر مخه هم خپل پلاز خپل کوم اولاد ته پرېښودلای سي.

د کېلانتان سلطان محمد پنځم د روسي ماډلې ريحانا اوکسانا سره د واده له پاره په ۲۰۱۷ کال د خپل پلاز سره مخه ښه وکړه. هغه له دغې مېرمنې څخه يو زوی هم لري. خو د څو مياشتو وروسته هغه بېرته له دغې مېرمني څخه د شريا باهوګنا رسنۍ د راپور له مخي جلا سو.

شاهي جوړې ته د لومړي ځل لپاره د برانډنبورګ په دروازه کې له نظامي تشریفاتو سره هر کلی وویل شو. د آلمان د ولسمشر دفتر په وینا، تر دې مخکې د برلین په دې تاریخي ځای کې هیڅ دولتي میلمه ته ښه راغلاست نه دی ویل شوی. ځانګړی ښه راغلاست د آلمان او انګلستان ترمنځ د نږدې اړیکو سمبول دی. چارلس او کمیلا په ۲۰۱۹ کې د برانډنبرګ په دروازه تم شوي ول.

پاچا چارلز او د آلمان ولسمشر فرانک والټر شټاین مایر د خپلو ډیری ناستو په جریان کې دوستانه اړیکې رامینځته کړي. دلته د ۲۰۱۹ په مۍ میاشت کې د ولسمشر رسمي استوګنځي، بیلیوو ماڼۍ مخې ته دواړه د خبرو په حال کې ليدل کيږي. په همدې ځای کې دوی د مارچ پر ۲۹مه نیټه هم سره وليدل.

د بريتانيا پاچا چارلز آلمان ته د خپل لومړي رسمي سفر په ترڅ کې د آلمان پارلمان ته وينا وکړه. نوموړي له اوکراين څخه د ملاتړ له کبله د آلمان ستاينه وکړه او د آلمان او انگلستان کلتوري اړيکي یې وستايلې.

پاچا چارلس په برانډنبرګ کې د آلمان - برتانوي نظامي واحد څخه هم لیدنه کوي چې د پلونو په انجینرۍ کې تخصص لري. د آلمان له ولسمشر سره به بیا هامبورګ ته هم سفر وکړي. د هامبورګ په بندر کې به پاچا ته چې له لسیزو راهیسې د چاپېریال ساتنې له برخې سره لېوالتیا لري، ځینې سیمه ییزې اقلیم دوسته ټیکنالوژي ور وښودل شي.

د ۱۹۴۳ کال د جولای په میاشت کې بریتانیې او امریکا په هامبورګ باندې پراخ هوایي بریدونه وکړل چې د ګوموره عملیاتو تر کوډ نوم لاندې ترسره شوي ول. په اصطلاح د هامبورګ آزادولو په نوم دې هوايي بريدونو په پايله کې تر ۳۵۰۰۰ ډیر کسان ووژل شول او نږدې یو ملیون خلک بې کوره شول. پاچا چارلز او شټاین مایر به په یاده کلیسا کې د ګلونو ګیډۍ کېږدي.

د دوی د سفر په جریان کې ، پاچا چارلس او کمیلا به د هامبورګ ښار په تالار کې د ښار طلایی کتاب هم لاسلیک کړي. چارلس د نومبر په ۱۹۸۷ کې کله چې هغه له خپلې پخوانۍ میرمنې شهزادگۍ ډیانا سره د آلمان له دې بندري ښار څخه لیدنه کړې وه، دا کتاب یې لاسلیک کړی وو.

پاچا تر دې مخکې په ۲۰۰۹ کال کې د آلمان د پخواني ولسمشر هورست کوهلر په بلنه بیلويو ماڼۍ ته هم تللی و او په هغه وخت کې هم کمیلا هم ورسره وه.

له ۱۹۶۲ راهیسې، چارلز آلمان ته له ۴۰ څخه زیات سفرونه کړي. د هغه ډیری لیدنې شخصي وې، که څه هم هغه ډېر کم له خپلو مینه والو سره د ليدلو چانس له لاسه ورکوي. دلته په ۱۹۹۵م کال کې [په انځور کې] هغه په مونشن کې مخکې له دې چې د مونشن له مشهور مارکيت څخه ليدنه وکړي، له خپلو مينه والو سره گوري.

د فورسا د یوې سروې له مخې چې د پاچا د لیدنې په بهیر کې ترسره شوې، ډیری آلمانان له لیرې څخه د شاهي کورنۍ هرکلی کوي، خو دوی د شاهي کورنۍ درلودو ته ليواله نه دي. یوازې ۸ سلنه آلمانان غواړي د آلمان پاچاهي وګوري. ډیری آلمانان خوښ دي چې يو فدرالي ولسمشر د دولت د استازي په توگه لري.

د انگلستان شاهي کورنۍ ژورې تیوټونیک يا پخوانۍ جرمنۍ رېښې لري. په ۱۷۱۴ کې د هانوور اشرافي کورنۍ څخه جارج لويس لومړی آلماني توکمه پاچا شو چې د انګلستان تاج یې ترلاسه کړل. له تیرو ۳۰۰ کلونو راهيسې د انګلستان سلطنت او د آلمان د اشرافي کورنیو ترمنځ قوي اړیکې دوام لري. پاچا چارلس هم آلماني رېښې لري. هغه حتی په روانه آلماني ژبه خبرې کوي چې لږه انګلیسي لهجه ورسره مل وي.