د پیرو په مشهورې ناسکا سیمه کې د ناسکا د کرښو پر سر د سیلانیانو د لیدنې پر مهال د یوې کوچنۍ الوتکې د لوېدو له امله ۱۳ کسان وژل شوي، چې په هغوی کې آلماني سیلانیان هم شامل دي.

په برلین کې د آلمان د بهرنیو چارو وزارت د آلمان خبري اژانس ته تایید کړه چې په دې پېښه کې د آلمان دوه اتباع وژل شوي دي. د ویستا الیګري ولسوالۍ ادارې ویلي، الوتکه له بېړني حالت سره مخ شوې وه او د هغو لاملونو له امله چې تر اوسه نه دي روښانه شوي، وغورځېده.

د پیرو د آر پي پي ټلوېزیون د ملکي هوايي چلند د عمومي ریاست په حواله راپور ورکړی چې په الوتکه کې ۱۱ بهرني سیلانیان او د عملې دوه غړي سپاره وو.

د نورو سیلانیانو تابعیت تر اوسه په رسمي ډول نه دی اعلان شوی.

د ایټالیا خبري اژانس انسا د لومړنیو معلوماتو له مخې ویلي، د دوو تایید شویو آلماني وګړو ترڅنګ اووه ایټالوي سیلانیان، دوه هسپانویان، یو سیمه‌ییز سیاحتي لارښود او د الوتکې پیلوټ هم د قربانیانو په ډله کې شامل دي.

د RPP ټلوېزیون د راپور له مخې، الوتکه د ایرودیانا هوايي شرکت پورې اړوند وه او د پیسکو له بندري ښار څخه د ناسکاد کرښو د لیدنې لپاره الوتنه کړې وه. الوتکه د ناسکا ولایت د پویبلو ویخو  په سیمه کې وغورځېده.

د صحرا د لرغونو انځورونو د لیدنې الوتنه

د ناسکا کرښې د پیرو په سوېل کې د صحرا پر مخ سلګونه ستر لرغوني انځورونه دي.

دغه انځورونه د میلاد څخه   ۵۰۰ کاله مخکې  او ۵۰۰ میلادي کلونو ترمنځ جوړ شوي او د حیواناتو، بڼې شوې بوټې، افسانوي موجودات او هندسي شکلونه انځوروي.

دا لرغوني اثار د یونیسکو د نړیوال فرهنګي میراث په نوملړ کې شامل دي او له هوا څخه په ځانګړي ډول ښه لیدل کېږي.