په رومانیا کې روسي ډرون؛ د ناټو د هوایې حریم دویمه سرغړونه
۱۴۰۴ شهریور ۲۳, یکشنبه
د رومانیې د دفاع وزارت د شنبې (د سپټمبر ۱۳ نیټه) په ورځ ویلي وروسته له هغې چې د روسیې بې پيلوټه الوتکه یې هوایي حریم ته ننوتلې ده د دغه هیواد جنګي الوتکو پرواز او هغه ېې تعقیب کړې ده.
دغه پيښه د رومانیې پولې ته نږدې د اوکراین پر تاسیساتو د روسیې د برید په جریان کې رامنځته شوې ده. رومانیا د اروپايي اتحادیې او ناټو غړی هیواد دی او له اوکراین سره شاوخوا ۶۵۰ کیلومتره اوږده پوله لري.
په اوکراین کې د روسیې د جګړې له پیل راهیسې دغه هیواد په وار وار پخپله خاوره کې د روسي ډرونونو د پارچو را غورځیدو شاهد و.
د رویټرز په حواله د رومانیې دفاع وزیر یونوت موستئانو وویل نږدې و چې د اف۱۶ جنګي الوتکو پیلوټانو دغه ډرون را نسکور کړی وای، ځکه مخکې له دې چې د رومانیې له هوایي حریم څخه ووځي، په ډیره ټيټه ارتفاع کې یې پرواز کولو.
رویټرز لیکلي دي چې د رومانیې دفاع وزارت په یوه اعلامیه کې ویلي چې د شنبې په ورځ د روسي ډرون له داخلیدو وروسته په لومړي سر کې دوه د اف۱۶ جنګي الوتکو او بیا دوه د یورو فایټر الوتکو چې په رومانیا کې د المان د هوایي دفاع ماموریت یوه برخه ده پروازونه وکړل.
همدارنګه د اوکراین سرحد ته نږدې د دانوب رود ترڅنګ د تولچا ښاریانو ته خبرداری ورکړل شوی و چې ځانونه خوندي کړي.
په دغه اعلامیه کې راغلي چې د رومانیې جنګي الوتکو د بې پيلوټه الوتکې تر تشخیصولو وروسته تر هغې وخته پورې هغه تعقیب کړه چې له رادار څخه ووتله.
د رومانیې د دفاع وزارت په حواله دغې بې پیلوټه الوتکې د استوګنې پر کومې سیمې حرکت نه دی کړی او نه یې هم ملکي خلکو ته ګواښ پیښ کړی.
د اوکراین ولسمشر ولادیمیر زیلنسکي د ایکس په ټولنیزه شبکه کې ولیکل چې معلومات ښيې چې دغه بې پیلوته الوتکه تر ۱۰ کیلومتره پورې د رومانیې په خاوره کې داخله شوې او شاوخوا ۵۰ دقیقې یې د ناټو په هوایي حریم کې فعالیت کړی دی.
زیلنسکي دغه اقدام د روسیې له خوا «د جګړې ښکاره پراخول» وبلل او د مسکو پر وړاندې یې د بندیزونو د وضع کولو غوښتنه وکړه.
په پولنډ کې د تیارسئ حالت
رومانیا د ناټو دویم غړی هیواد دی چې تر یوې اونۍ په لږه موده کې خپل هوایي حریم ته د روسي بې پیلوټه الوتکو د داخلیدو خبر ورکوي. مخکې تر دې پولنډ په خپل هوایي حریم کې د څو روسي بې پيلوټه الوتکو د را نسکورولو خبر ورکړی و.
د دغه هیواد پوځ د شنبې په ورځ یو وار بیا د روسي بې پيلوټه الوتکو د تهدید له کبله خپلو جنګي الوتکو ته د پرواز کولو امر کړی و او هوایي دفاع یې د تیارسي په حالت کې راوستلې وه.
د پولنډ په ختیځ کې د لوبلین هوایي ډګر هم د شنبې په ورځ د پوځي فعالیتونو په دلیل د ملکي پروازونو پر مخ تړل شوی و. همدارنګه په څو ختیځو ښارونو کې د روسیې د احتمالي هوایي ګواښونو په دلیل د خطر زنګونه وهل شوي وو.
په پولنډ کې د روسي بي پيلوټه الوتکو له نسکورولو وروسته ناټو د جمعې په ورځ اعلان وکړ چې اراده لري د اروپا په ختیځ کې خپله دفاع تقویه کړي.
د رومانیې پارلمان د روان کال په لومړیو کې یو قانون تصویب کړ چې پوځ ته اجازه ورکوي چې هغه بې پيلوټه الوتکې چې د سولې پر مهال په غیر قانوني توګه د دغه هیواد له حریم څخه تیریږي او د دغه هیواد انسانانو او زیربناو ته ګواښ ګڼل کیږي، را نسکورې کړي.
خو د رویټرز د لیکنې پر اساس دغه قانون تر اوسه پورې د اجرا مرحلې ته نه دی رسیدلی.