د روسیې ولسمشر ولادیمیر پوتین د چهارشنبې په ورځ (دسمبر میاشتې ۱۷) ویلي دي چې مسکو به په اوکراین کې خپل اهداف «بې له شکه» ترلاسه کوي، په کوم کې چې هغه سیمې هم شاملې دي چې روسیه یې خپلي ګڼي.

ولادیمیر پوتین زیاته کړه چې که سیال هیواد او بهرني ملاتړې یې له «معنا لرونکو خبرو اترو» څخه انکار وکړي، نو روسیه به دغه سیمې په پوځي ځواک سره هم ترلاسه کړي.

ولسمشر پوتین په مسکو کې د دغه هیواد د دفاع وزارت له یو شمیر چارواکو سره د ملاقات پر مهال وویل: «د ځانګړو پوځي عملیاتو اهداف به په یقیني ډول ترلاسه کړای شي. موږ ترجیح ورکوو چې دا کار د دیپلوماسۍ له لارې وشي، خو که داسې ونه شول، نو له نظامي سرچینو څخه به کار واخستل شي.