نیویارک ټایمز ورځپاڼې د اسرائیل او متحده ایالاتو د پوځي سرچینو په حواله رپوټ ورکړی دی چې د امریکا بې پيلوټه الوتکې د اسرائیلیانو په خوښه په غزې تړانګه کې د میداني فعالیتونو انځورونه اخلي.

دغه بې پيلوټه الوتکې د اسرائیل په سویل کې د امریکا متحده ایالاتو د همغږۍ مرکز د فعالیتونو ملاتړ کوي چې د تیرې اونۍ راهیسې د بشردوستانه ضرورتونو او اوربند مراعتولو نظارت کوي.

په ورته وخت کې رپوټونه وایي چې امریکایي لوری ترجیح ورکوي چې د اسرائیل پر معلوماتو د تکیه کولو پر ځای د وضعیت د ارزونې له پاره د خپلو بې پيلوټه الوتکو په وسیله له اخیستل کیدونکو ویډیوګانو یا انځورونو څخه استفاده وکړي.

په داسې حال کې چې د غزې جګړه د زیاتیدو په حال کې ده، د اسرائیل او امریکا د حکومتونو ترمنځ په پرله پسې ډول اختلافات رامنځته شوي دي. د متحده ایالاتو دفاع وزارت او د اسرائیل پوځ هیڅ یوه یې د نیویارک ټایمز پوښتنو ته ځواب نه دی ورکړی.

په ورته وخت کې په غیر رسمي ډول ویل کیږي چې د اسرائیل حکومتي چارواکو له بې پيلوټه الوتکو څخه استفاده نسبتاً غیر معمول ګڼي.

سربیره پر دې په روانه اونۍ کې د متحده ایالاتو د حکومتي منابعو په نقل ویل شوي چې هغوي شک لري چې اسرائیل دې د اوربند ټولو موافقو ته درناوی وکړي.

یوه پخواني امریکایی دیپلومات د بې پيلوټه الوتکو د ماموریت په اړه یو څه واضح خبرې کړې دي. د امریکا د پخواني ولسمشر بارک اوباما د حکومت پر مهال په اسرائیل کې د امریکا متحده ایالاتو پخواني سفیر دانیل بی شاپیرو، دغې ورځپاڼې ته وویل: «دا د متحده ایالاتو د څارنې یوه خورا مداخله کوونکې نسخه ده، په هغه جبهه کې چې اسرائیل یې یو فعال ګواښ بولي.»

نوموړي زیاته کړه: «که د امریکا متحده ایالاتو او اسرائیل ترمنځ بشپړ شفافیت او اعتماد شتون درلودلې، نو دې کار ته اړتیا نه وه، خو څرګنده ده چې امریکا غواړي د هر ډول سوء تفاهم احتمال لمنځه یوسي.»