د سيمې قدرتونه به د« ثبات» له پاره له طالبانو سره ګډکار وکړي
۱۴۰۰ مهر ۲۹, پنجشنبه
روسيې پرون، چهار شنبه د دغه هېواد په پلازمينه روسيه کې له طالبانو سره د خبرو اترو کوربتوب وکړ. دغه هېواد په سيمه کې د خپل نفوذ پياوړي کولو په لټه کې دی او غواړي چې د اسلامي دولت يا داعش ډلې پر ضد ګامونو پورته کولو باندې ټینګار وکړي چې د دوی په وينا یې ډېر غړي په افغانستان کې راټول شوي دي.
د لسو هېوادونو استازو چې چين او ايران هم پکې شامل دي، د غونډې په پای کې په يوه شريکه اعلاميه کې وويل چې «د سيمه ایز ثبات له پاره به په افغانستان کې امنيت ته وده ورکولو ته دوام ورکړي.»
د غونډې ګډونوالو پر طالبانو غږ وکړ چې «معتدل او رغنده کورنی او بهرنی سیاست» وکړي او د «افغانستان له ګاونډيو سره د دوستۍ اړيکي غوره کړي.»
د داخلي سياست په برخه کې د کنفرانس ګډونوالو پر طالبانو غږ وکړ چې «اقليتونو، ښځو او ماشومانو حقونو ته درناوې وکړي.» د طالبانو تر واکمنۍ لاندې د ښځو د حقونو په اړه اندیښنې ډېرې دي.
همدا راز د طالبانو د کورنيو چارو د وزير سراج الدين حقاني له خوا د ځانمرګو بريدګرو د «اسلام د اتلانو» په توګه ستايلو هم غبرګونونه پارولي دي او لوېديځ يې هم ناآرامه کړی دی.
خو اوسمهال طالبان متحدينو ته شديده اړتيا لري. د بهرنيو مرستو د بنديدو له وجې د افغانستان اقتصاد په ډېر ناوړه وضعيت کې دی. د خوراکي توکو بیې ډېرې لوړې شوي دي او بې کاري خپل اوج ته رسېدلې ده.
د مسکو د غونډې ګډونوالو «د افغانستان د بيارغونې له پاره له افغانانو سره د بيړنيو بشري او اقتصادي مرستو په موخه د ګډو هلو ځلو غږ وکړ.»
د غونډې برخه والو همدا راز «ژر تر ژره » د افغانستان له پاره د ملګرو ملتونو د بسپنه ورکوونکو هېوادونو د يوه کنفرانس د رابلل غږ وکړ.
په اعلاميه کې ويل شوي چې د بيارغونې او پراختيا په برخه کې هغه هېوادونه بايد مخکښ واوسي چې په تېرو شلو کلونو کې په افغانستان کې پوځي ماموریت ترسره کړی دی. دا د امريکا متحده ايالاتو په مشرتوب نړيوالو ځواکونو ته چې په اګست مياشت کې له افغانستانه ووتل، څرګنده اشاره وه.
ب. ص/ ک. ص (AFP)