روسيې د اوکراين له سرحده د ځواکونو په ايستلو پيل کړی
۱۴۰۰ اردیبهشت ۳, جمعه
د روسیې د خپلو معلوماتو په حواله دغه هيواد د اوکراين له سرحد او کريميا نيمه ټاپو څخه د خپلو عسکرو په ايستلو پېل کړی دی. د روسیې د دفاع وزير سرګې شوېګو د اپريل پر ۲۲ نېټه کريميا ته د سفر پر وخت وویل چې د پوځي مانورونو هدفونه سر ته رسېدلي دي.
خو تر اوسه لا دا روښانه نه ده چې اوکراين ته له نژدې پرتو سيمو څخه به ټول نوي ځای پر ځای شوي عسکر او تجهیزات وايستل شي او نوي پوځي کمپونه وتړل شي او که نه. خو شوېګو وويل چې ځيني تجهیزاتي سیسټمونه به د «لويدیځ ۲۰۲۱» په نوم پوځي تمرينونو پورې چې له سپينې روسيه سره په ګډه ترسره کيږي، ورونيژ ته څېرمه پوځي اډه کې پاتې وي.
د اوکراين پر پوله او د روسیې له خوا په الحاق شوي اوکرايني نيمه ټاپو کريميا کې د روسي ځواکونو د مارشونو له کبله يو شمير څارونکو اټکل کاوه چې روسیه يوه پوځي بريد ته چمتووالي نيسي.
د يوه بريد له پاره کافي عسکر نه شته
په بروکسل کې د بحران نړيوالې ډلې (ICG) د څېړنيزې موسسې کارپوهانو د اپريل پر شلمه نېټه په خپاره شوي يوه رپوټ کې ويلي: «سرحد ته د روسیې د ټانکونو پر ليږد سربیره هم ډېر لږ احتمال شته چې هغه خونړۍ نښتې چې په ۲۰۱۴ او ۲۰۱۵م کلونو کې د دونباس سيمه لړزولې وه، ژر تکرار شي.»
په دې رپوټ کې زياته شوې وه که څه هم چې د عسکرو شمير او ځای پر ځای کول یې د اندیښنې وړ خبره ده خو د يوه پوځي بريد د کولو شرايط نه پوره کوي.
د بحران نړيواله ډله دې ته اشاره کوي چې څارونکي ډېره موده په دې آند ول چې مسکو د اوکراين له اوسني وضعيت څخه راضي ده ځکه د مينسک تړون چې په ۲۰۱۵م کال کې یې خونړيو بريدونو ته د پای ټکي کیښود او هغه وخت رامنځته شوی چې د کيف حکومت د روسیې تر سخت پوځي فشار لاندې وو، په دونباس کې د روسیې د «استازو» په ګټه وو.
خو د بحران د نړيوالې ډلې په حواله د روسي ځواکونو تازه مانورې او لهجه دې ته اشاره کوي چې روسیه مخ پر زياتيدونکي توګه له وضيعته ناراضي ده او له دې کبله اوکراين د لا زياتو امتيازاتو ورکړې ته مجبوروي.
څومره روسي عسکر په سیمه کې دي؟
اوکراين ويلي دي چې پر سرحد او په کريمیا نيمه ټاپو کې تر ۸۰ زرو زيات روسي عسکر موجود ول او بيا د اپريل پر ۱۴نېټه د اوکراین د دفاع وزير اندرې تاران وويل چې ښايي د عسکرو شمير ډېر ژر ۱۱۰ زرو ته ورسيږي. خو د اروپايي ټولنې د اټکلونو پر اساس ښايي د دې عسکرو شمير ۱۰۰ زره وي.
ناټو د اوکراین پر سر روسيې ته خبرداری ورکړ
په کيف کې د دفاع وزارت د معلوماتو په حواله د روان کال په فيبرورۍ مياشت کې د اوکراين د ټولو عسکرو شمير ۱۹۵ زره وو چې له دې څخه ۴۰ زره په دونباس سيمه کې د ماموريت برخه ده. د اپريل پر ۲۱ نېټه د اوکراین ولسمشر يو قانون لاسليک کړ چې له مخې يې ريظرف عسکر ژر تر ژره پوځي دندې ته رابلل کیدلی شي. اوکراين ډېر زيات ريظرف عسکر لري ځکه کابو ۴۰۰ زرو اوکرايني وګړو په دونباس کې په جنګي ماموريتونو کې برخه اخیستې وه.
د روسیې نوې پوځي اډې
خو په اوسنيو عصري جګړو کې د عسکرو شمير ډېر مهم نه دی. مهم د وسلو ډول، شمير، د عسکرو منظمول او د هغوی لوژيستک او همدا راز د سوند توکو او تجهیزاتو زېرمې دي. روسیې په دې برخه کې هم ځان مجهز کړی، د مثال په توګه اروپایي ټولنې ويلي چې روسیه ساحوي روغتونونه جوړوي. همدا راز په کريميا نيمه ټاپو کې د جنګي الوتکو د ځای پر ځای کولو خبر هم ورکړل شوی دی.
د ستېلايت انځورنه ښيي چې په دغه سیمه کې هوايي ځمکني پوځيان، جنګي الوتکې، اکتشافي بې پېلوټه الوتکې او د اليکترونيکي جګړې وسايل ځای پر ځای شوي دي.
روسيه به ژر د بريد وړتيا ولري
پخوانی امريکايي جنرال بن هوجز له دويچه ویله سره په خبرو کې د روسیې او اوکراين ترمنځ په دونباس سيمه کې د زور زياتي د پراخيدو امکان نه ردوي.
نوموړي چې اوس د «اروپايي ټګلارې ارزونې د مرکز» کارپوه دی، وويل: «زه فکر نه کوم چې دا دې يوازې د زور ښوول وي. که سړی د ځواکونو ترتيب، د تجهیزاتو او نورو وسايلو ډول، لوژيستک او تورې بحيرې ته د کښتيو انتقالولو ته نظر واچوي نو څرګنديږي چې دا يوازې مانورې نه دي.»
م م: روسیه دې د کریمیا «مؤقت اشغال» پای ته ورسوي
د «پوټوماک فاونديشن» په نامه څيړنیزې موسیې مشر فيليپ کارپر هم په دې آند دی چې دا يوازې د قدرت څرګندونه نه ده. نوموړي وويل: «دا يوې سترې حملې ته چمتوالی دی.» نوموړي ټینګار وکړ چې هغه د يوه بريد وړاندوينه نه کوي خو په دوو اوونيو کې به دا يو داسې انتخاب وي چې روسیه به یې ولري.
ب. ص/ ن. ز (Iurii Sheiko)
زموږ له آرشیف څخه: