د روسیې، امریکا متحده ایالاتو، چین او پاکستان چارواکو په مسکو کې د افغانستان د سولې د خبرو اترو له ګډونوالو غوښتي دي چې د فوري اوربند په هکله بحثونه وکړي. دغه خبر د تاس خبري آژانس د یوې ګډې اعلامیې له قوله ورکړی دی.

د افغانستان د ملي مصالحی د عالي شورا مشر په مسکو کې په خپله وینا کې ټینګار وکړ چې «جګړه د حل لاره نه ده.» هغه وویل چې هیڅ ډله او جریان نه شي کولی په جنګ او زور سره خپله اراده پر نورو تحمیل کړي.

د هغه په خبره «سوله بایلونکی نه لري او جګړه ګټونکی.» د عبدالله په خبره د افغانستان حکومت د مذاکراتو ادامې او د اسلامي او ملي ارزښتونو په حفظولو سره ټولو لورو ته د منلو وړ سیاسي حل لارې موندلو ته پابند دی.

د افغانستان د سولې په تړاو د مسکو غونډه د پنجشنبې په ورځ (د ۲۰۲۱م کال د مارچ ۱۸مه) د روسیې په کوربتوب وشوه. په دغه یوه ورځنۍ غونډه کې د افغان چارواکو او سیاستوالو او همداشان د طالبانو یوه پلاوي ګډون درلود. همداشان په غونډه کې د روسیې، امریکا متحده ایالاتو، چین او پاکستان استازو هم حضور درلود.

د افغانستان د ملي مصالحې د عالي شورا د معلومات له مخې عبدالله عبدالله، د مسکو په غونډه کې ویلي دي چې د دواړو لورو له خوا د بندیانو په آزادولو او د مذاکراتو په پیلیدو سره خلکو تمه درلوده چې جګړه ودریږي او تاوتریخوالی راکم شي، خو برخلاف د ټول هیواد په کچه جګړه ادامه لري او هدفي وژنې او تاوتریخوالي له ملکیانو قرباني اخلي. د ملي مصالحي د عالي شورا مشر «د مذاکراتو د بهیر د ګړندي کیدو او د فوري اوربند غوښتنه کړې» ده.

عبدالله عبدالله د مسکو دغه جلسه او په راتلونکي کې په ترکیه کې پلان شوې غونډه د دوحې د مذاکراتو د ادامې په توګه یاده کړې ده.

د طالبانو څرګندونې

د طالبانو له لوري په قطر کې د طالبانو د سیاسي دفتر مشر ملا عبدالغني برادر په مشرۍ یوه لس کسیز پلاوي هم په دغه غونډه کې ګډون کړی وو.

د طالبانو د سیاسي دفتر ویاند محمد نعیم د یو لړ تویتونو په ترڅ کې د ملا برادر او د طالبانو د مرکچي پلاوي د مشر شیح عبدالحکیم حقاني، څرګندونې خپرې کړي. په دغه تویتونو کې د ملا برادر له قولي راغلي دي چې «موږ داسې یو افغان شموله اسلامي نظام غواړو چې د ولس استازیتوب وکړی شي او شته ستونزې هوارې کړي.»

ملا برادر ویلي دي چې طالبانو په «کافي کچه عملیات راټیټ کړي، برعکس مقابل لوري خپلو مسؤلیتونو ته پوره التزام نه دی کړی.»

په وروستیو کې د امریکا متحده ایالاتو ځینو چارواکو طالبان په دې تورن کړي چې خپلې ژمنې یې نه دي عملي کړي.

د مسکو د غونډې په پيل کې د روسیې د بهرنیو چارو وزیر سیرګي لاوروف وویل: «په تاسف سره د افغانستان د سولي په اړه د دوحې خبرو اترو تر اوسه مثبتي پايلي نه دي لري.» هغه هیله مندي وښوده چې د مسکو غونډه به بین الافغاني مذاکراتو ته لاره هواره کړي.

د افغانستان د دولت د پلاوي او طالبانو ترمنځ په دوحه کې مذاکرات په تیر سپتمبر کې پېل شول، خو دغه مذاکرات له بن بست سره مخامخ شوي او د پام وړ پرمختګ پکې نه لیدل کیږي.