د رويټرز خبري آژانس د راپور له مخې حسین امیرعبداللهیان او شهزاده محمد بن سلمان په بندري ښار جده کې سره وليدل. دواړو هيوادونو په دې تړاو د جمعې په ورځ (د ۲۰۲۳ کال د اګست ۱۸ نېټه) اعلاميې خپرې کړې.
د محمد بن سلمان او امیرعبداللهیان تر منځ ملاقات د څو مياشتو د نژدې کېدو د هڅو د پېل راهيسي د تر ټولو لوړپوړو مشرانو ليدنه ده. د ايران پرس تلويزيون سعودي ته له تهران څخه د ورغلي پلاوي په حواله ويلي دي چې دغه ملاقات «په ډېره ښه توګه» ترسره شو. د سعودي عربستان دولتي خبري آژانس اس پـي اې راپور ورکړی، چې شهزاده محمد بن سلمان او امیرعبداللهیان په سيميزو او نړيوالو چارو خبرې وکړې.
د نژدې کېدو هڅې
د اکثريت شيعه مذهبو هيواد ايران او د اکثريت سني مذهبو هيواد سعودي له يوې لسيزې څخه زيات وخت کيږي چې يو د بل دښمن بلل کيږي. دغو هيوادونو په يمن او سوريه کې نيابتي جګړې هم ولرلې. خو په تيرو مياشتو کې دواړه اړخونه بېرته سره د نژدې کېدو هڅې کوي. د دواړو هيوادونو تر منځ ترينګلې اړيکې لږ سمې شوي دي.
د روان کال په مارچ مياشت کې دواړو هيوادونو د چين په منځګړيتوب پر دې تفاهم وکړ چې خپلمنځي دپلوماتيکې اړيکې به بېرته برحالې کړي. دواړو هيوادونو په ۲۰۱۶ کال يو د بل ترمنځ دپلوماتيکې اړيکې پرې کړې وې. ايران د روان عيسوي کال د جون مياشتې په پېل کې په سعودي عربستان کې خپل سفارت بېرته پرانست. د جون مياشتې په منځ کې د سعودي عربستان د باندنيو چارو وزير، شهزاده فيصل بن فرحان په تهران کې مېلمه و. په ملاقات کې پر دې تفاهم وشو چې دواړه اړخونه به د سيمې سره مربوطو امنيتي پوښتنو کې همکاري بهتره کوي.
خو د دواړو هيوادونو تر منځ لاپه خليج فارس کې نفتو د ممکنه زېرمو تر څنگ پر يو شمېر نورو موضوعاتو لا اختلافات موجود دي.
آ./ا.ا./ن.ص.
په سعودي عربستان کې د «حجاب لرونکي موډ» انځورونه
د مسلمانو ښځو له پاره موډ کیدای شي له رنګارنګیو ډک، خو په عین وخت کې ستونزې زیږونکی وي. په تازګۍ سره د سعودي عربستان او اروپايي ګډ موډ یوه ننداره په ریاض کي وړاندي شوه. ځينې انځورونه يې دلته لیدلی شئ.
انځور: Reuters/T. Hanaiد سعودي د شاهي کورنۍ شهزادګۍ صفیه حسین غراس او د موډ بلجیمۍ طراحې کریستوف بیوفایس، په ریاض کې د بلجیم د سفارت په انګړ کې د مسلمانو ښځو له پاره د جامو د موډ ننداره وړاندې کړه. په سعودي عربستان کې د لومړي ځل له پاره ښځو او نارينه وو په ګډه د ښځو د موډ د نندارې اجازه درلوده.
د سعودي عربستان د شاهي کورنۍ د سختګیرانه قواعدو پر اساس د بیوفایس او شهزادګۍ غراس طرحه کړې جامې باید ساده او د مسلمانو ښځو له پاره مناسبې وای. خو برخلاف د دغه نمایش اکثره نندارچیانو بیا د لویدیځوالو په موډ جامې اغوستې وې.
په ریاض کې د «خلیکې شیک» په نامه د طراحۍ په دې مجموعه کې روښانه او نقش لرونکي ډیزاینونه لږ لیدل کیږي. دا چپنې ته ورته کریمي لباس په عربي هیوادونو کې دود لباسونو ته ډیر ورته والی لري.
یو شی چې له ساده او متواضع فیشن سره یې ورته والی نه درلود د کاوبایي خولې پر سرول وو. دې موډلې له تورو جامو سره کوبایي سپينه خولې پر سر کړې ده.
د دې نندارتون برخلاف په ۲۰۱۷م کال کې د دوبی موډ اونۍ کې د جامو موډ زیاتره عربي شکل درلود او پکښې له ډیرو مختلفو رنګونو څخه کار اخیستل شوی وو. دغه ماډله د «مسلمه وییر» لیبل د جامو نمایش وړاندې کوي. دا لیبل یا مارک د ترکیې دی چې په متحده ایالاتو، اروپا، بریتانیا، روسیه او دوبی کې هم نمایندګۍ لري.
د مسلمانو ښځو د جامو برانډ
همدارنګه د «مسلمه وییر» یا د مسلمانو ښځو د جامو موډ مارک چې زیاتره د ځوانو نجونو له پاره جامې برابروي له روښانه رنګونو نه استفاده کوي. دغه مارک په اینستاګرام کې تر۴۰ زرو ډیر کارونکي تعقیبوي.
د اسلامي مود مشهوره ماډله
د دوبۍ موډ اونۍ ۲۰۱۷م کال په نمایش کې مشهورې عربي موډلانې هم راڅرګندې شوې وې. د هغو له ډلې مشهوره امریکایي ماډله حلیمه عدن هغه د ترکي مارک مسلمانو ښځو لباس موډ سره په دغه ننداره کې را ښکاره شوې وه.
د محجوب موډ په هکله د نظر اختلاف
د مسلمانانو له پاره محجوب موډ نه یوازې د سکولارو، بلکې د عقیدوي مسلمانانو له خوا هم له نیوکو سره مخامخ شوی دی. سومالیې الاصله امریکایي ماډله چې د دې نندارې یوه له مشهورو څیرو څخه وه، په ۲۰۲۰م کال کې د فیشن له ریشتې سره یي خپلې اړیکې پرې کړې، ځکه په خبره یي په دې برخه کې د هغې عقیدې ته په لازمه توګه درناوی نه کیږي. نوموړۍ د «یونیسف» د سفیرې په توګه له خپل موقعیت څخه هم لاس په سر شوې ده.
