له آلمان څخه افغانستان ته د هغو کسانو د ستنولو دوو ډله‌ییزو الوتنو هرې یوې چې له هېواده وتلو ته مکلف وو، له ۳۰۰ زره یورو څخه ډېر د الوتنې لګښت درلود. دغه الوتنې د روان کال په اپرېل او جون میاشتو کې ترسره شوې. دا معلومات د آلمان د فدرالي حکومت له هغه ځواب څخه څرګندېږي چې د کیڼ اړخي ګوند پارلماني ډلې یوې پوښتنې ته یې ورکړی دی. یادې پارلماني ډلې له حکومت څخه د ۲۰۲۶ کال په لومړۍ نیمايي کې د ډله‌ییزو ستنونو د لګښتونو په اړه هم معلومات غوښتي وو.

د حکومت له خوا وړاندې شوي لېست ښيي چې په همدې موده کې تر ټولو ګران د ستنولو پرواز، د الوتکې د لګښت له پلوه، له لایپزیګ ـ هاله هوايي ډګر څخه پاکستان ته د مې میاشتې الوتنه وه. د دې الوتنې لګښت شاوخوا ۵۱۸ زره یورو و. خو د دې چارټر الوتنې مالي لګښت د اروپايي ټولنې د سرحدونو د ساتنې ادارې فرونټکس تمویل کړی و. د معلوماتو له مخې، په الوتکه کې ۳۳ هغه کسان وو چې له آلمان څخه وتلو ته مکلف وو او ورسره ۷۵ فدرالي پولیس هم ملګري وو.

د افغانستان د دوو ډله‌ییزو ستنونو په برخه کې بیا د فرونټکس مالي مرسته نه وه شوې. د اپرېل او جون د دغو دوو الوتنو هرې یوې د الوتنې له ۳۰۰ زره یورو څخه ډېر لګښت درلود.

په ورته وخت کې نایجیریا ته د څو الوتنو لګښت هم هره یوه شاوخوا ۴۰۰ زره یورو و. فرونټکس له دغو الوتنو سره مالي مرسته کړې وه. په ځینو مواردو کې د نایجیریا ترڅنګ نورو افریقايي هېوادونو، لکه ګانا، ګامبیا، ګینه بیساو او سینیګال ته هم د کډوالو د اخراج له پاره الوتنې شوې وې.

د ستنولو لګښت یوازې په الوتکو پورې نه محدودېږي. د ۲۰۲۶ کال په لومړۍ نیمايي کې د ستنونو د امنیتي ملتیا لپاره فدرالي حکومت شاوخوا ۵،۹۳ میلیونه یورو لګښت درلود.

د خپلې خوښې وتل تر جبري ستنونو ډېر دي

د فدرالي حکومت د معلوماتو له مخې، له آلمان څخه د خپلې خوښې د وتلو شمېر د جبري ستنونو په پرتله لوړ دی. د روان کال په لومړیو شپږو میاشتو کې ټولټال ۱۷۸۹۲ بهرنیان له آلمان څخه ووتل چې د پولې د تېرېدو تصدیق یې د ثبوت په توګه ترلاسه کړی و. خو په همدې موده کې یوازې ۹۲۷۶ کسانو د خپلې خوښې د وتلو لپاره د فدرالي حکومت مالي ملاتړ ترلاسه کړ.

په ورته وخت کې د جبري ستنونو شمېر د تېر کال د همدې مودې په پرتله ۱۸،۲ سلنه کم شوی دی. د کال په لومړۍ نیمايي کې ټولټال ۹۶۶۳ کسان جبري ستانه شوي دي.

د دې کمښت بېلابېل لاملونه شته دي، خو یو لامل دا دی چې د ۲۰۲۵ کال له پیل راهیسې په آلمان کې د پناه غوښتونکو شمېر د پام وړ کم شوی دی.

د جبري ستنونو اصلي مسؤلیت د آلمان د ایالتونو د بهرنیانو د چارو پر ادارو دی. فدرالي پولیس له دغو ادارو سره په دې برخه کې مرسته کوي.

ټول په وتلو مکلف کسان رد شوي پناه غوښتونکي نه دي

د آلمان د حکومت د معلوماتو له مخې، د کال تر نیمایي پورې په آلمان کې نږدې ۲۵۹ زره کسان اوسېدل چې له هېواده وتلو ته مکلف وو. له دوی څخه ۷۷ سلنه د لنډمهاله زغم یا «Duldung» سند درلود.

دا ډول سند هغه وخت ورکول کېږي چې د یوه کس ستنول په لنډمهاله توګه ممکن نه وي. د بېلګې په توګه، د سفر د سند نشتوالی، امیندوارۍ یا ناروغي د دې لامل کېدای شي.

د جون میاشتې په پای کې په آلمان کې د وتلو مکلفو کسانو څه باندې ۶۰ سلنه رد شوي پناه غوښتونکي وو.

خو د وتلو مکلفیت یوازې پر رد شویو پناه غوښتونکو نه عملي کېږي. هغه کاري مهاجر چې نور کار نه لري، هغه سیلانیان چې ویزه یې پای ته رسېدلې وي او پخواني محصلان چې د استوګنې نوی سند یې نه وي ترلاسه کړی، هم له هېواده وتلو ته مکلف کېدای شي.

ځینې پلان شوې ستنونې ناکامېږي

پلان شوې جبري ستنونې په بېلابېلو دلایلو ناکامېدای شي. په ډېرو مواردو کې اړوند کس نه موندل کېږي. حقوقي دلایل او روغتیايي ستونزې هم د ستنولو مخه نیولی شي.

د روان کال په لومړۍ نیمايي کې ۷۳۴ داسې ستنونې چې فدرالي پولیسو یې مسؤلیت اخیستی و، ناکامې شوې. په ۱۳۰ مواردو کې د مقاومت کړنې د ناکامۍ لامل شوې او په ۵۶ مواردو کې روغتیايي اندېښنې موجودې وې.

کله چې پیلوټ د انتقال مخالفت کوي

د حکومت د معلوماتو له مخې، د هغو پیلوټانو شمېر هم زیات شوی چې د عادي مسافر وړونکو الوتنو له لارې د وتلو مکلفو کسانو له انتقال څخه ډډه کوي. د ۲۰۲۶ کال په لومړۍ نیمايي کې په ۲۸۰ مواردو کې پیلوټانو د دغو کسانو له انتقال څخه انکار کړی دی. د پرتله کولو لپاره، په ټول ۲۰۲۵ کال کې ۵۱۴ داسې موارد ثبت شوي وو. فدرالي حکومت د پیلوټانو د دغو پرېکړو لاملونه په احصایوي ډول نه ثبتوي.

د ۲۰۲۶ کال په لومړۍ نیمايي کې د ۷۸۶ کسانو د جبري ستنولو پر مهال د فزیکي ځواک کارول د مرستندویه وسیلې په توګه ثبت شوي دي. په معمول ډول په دغو طریقو کې د تړلو او ثابت ساتلو وسایل شامل دي. دا اقدامات په ځانګړي ډول الجزایر، مراکش او نایجیریا ته د ستنولو پر مهال ډېر کارول شوي دي.