د فرانسې جمهوررییس، ماکرون تراوسه لا تصمیم ندی نیولی، چي ایا اوکراین ته به فرانسوي جنگي ټانکونه ورکوي. خو پرهغه باندي لا د جرمني د صدراعظم غوندي د ټانکونو ورکولو د ډیر ځنډ په سبب بین المللي انتقادونه ډیر شدید نه دي.
انځور: Sgt Jerome Salles/Armee de Terre/Defense/EMACOM/AP/dpa/picture alliance
اعلان
البته دا د ماکران د وروستي ماهرانه توضیحاتو سره ډیره اړه نه لري. په پاریس کي د بین المللي او ستراتیژیکي روابطو د انستیوت ددفاعي مسایلو کارپوه، گزپارد شنیڅلر په نظر « ټولو ډیر ژر جرمني ته گوته ونیوله» او د ټانکونو ځنډونکی، صدراعظم شولڅ د انتقادونو ښکار سو.
خو یوه سلسله اساسي دلایل هم موجود دي، چی ولي د فرانسوي لوکلېغ ټانکونو لیږل د ستراتیژیکي لحاظه ډیر اهمیت نلري. شنیڅلر وايي، «فقط ۲۲۰ لوکلېغ فعاله ټانکونه موجود دي. د هغو تولید په ۲۰۰۸ م کال کي متوقف سوی دی». خو بیا د الماني لیوپارد ۲ ټانکونو تعداد تر مجموعأ ۲۰۰۰ هم اوړي. په خبره یې د ا کار د هغوی «د پُرزو او سامان الاتو تهیه کول هم اسانه کوي».
شمالی کوریا اوکراین ته د ټانکونو لیږد «بشري جنایت» بللی
له بلي خوا پداسي حال کي چي د ډیرو اروپايي هیوادونو پوځونه الماني لیوپارد ټانکونه استعمالوي، بیا لوکلېغ ټانکونه یوازي په فرانسه، اُردن او متحده عربي اماراتو کي په کار لویدلي دي.
د ټانکونو د سپارلو په موضوع کي یوه مهمه نقطه د اوکرایني عسکرو روزنه ده. د شنیڅلر په خبره «دا کار ډیر مؤثریت لري، چي د یوه سیسټم څخه کار واخیستل سي». ځکه نو د یو څو فرانسوي لوکلېغ ټانکونو لیږل بیله سمبولیک اهمیت څخه بل شی نلري. خو داچي اوکراین، لوکلېغ ټانکونه هیڅ نه غواړي، لکه څنگه چي یې یو تعداد فرانسوي سیاستمداران ادعأ کوي، هم صحیح خبره نده. تیره هفته لا د اوکراین د دفاع وزارت یوه ویدیو خپره کړه، چي د فرانسوي لوکلېغ ټانکونو توصیف یې کاوه. په ویدیو کي اوریدل کیږي، چي هغه «ډیر سپورټي او پارکینگ یې اسانه دی».
له اوکراين سره د ليوپارد ټانکونو مرسته
په حقیقت کي ۵۰ ټُنه دروند لوکلېغ ټانک کولای سي د حرکت پر وخت په څلور کیلومتره متره فاصله کي خپل هدف وولي. په اوس وخت کي فرانسې ۱۳ لوکلېغ ټانکونه په رومانیا کي په کار اچولي، تر څو هلته د ناټو د شرقي اړخ محافظت وکړي.
داچي فرانسه پخپله ډیر لږ دا ډول جنگي ټانکونه لري، دلیل یې دادی، چي دغه هیواد پراټومي وسلو باندي ډیره تکیه کړې ده. ماکران په وارو وارو دا خبره تکراروي، چي «فرانسه مجهزه» ده او ټوله پوهیږي، چي په څه شي باندي.
د آلمان د پوځ ټانکونه کومې وړتياوې لري؟
اوکراين غواړي چې آلمان ورته ليوپارډ ۲ جنګي ټانکونه ورکړي. دغه هېواد ته لا دمخه درنې توپخانې، اکشتافي وسايط او دافع هوا يا د الوتکو ضد ټانکونه هم ورکړل شوي دي. خو دغه جنګي وسلې څه توپير سره لري؟
انځور: Michael Kappeler/dpa/picture alliance
جنګي ټانک ليوپارډ ۲
«The main battle tank» (ام بي ټي) يا ليوپارډ ۲ د جګړې د ډګر «بهترين وسله وال موټر» دی چې د فاير يا ويشتو ډېر قوت لري. ليوپارډ ۲ «يوه ډېره متحرکه صحرا تلونکې نقليه وسیله بلل کيږي چې زنځير او يوه ډېره قوي ماشينداره د اصلي وسلې په توګه لري چې ۳۶۰ درجې څرخي.
انځور: Michael Kappeler/dpa/picture alliance
زغروال خودکاره هاوبڅ ۲۰۰۰ ټانکونه
«هاوبڅ ۲۰۰۰ ټانک» زنځير لرونکی یا چین داره د توپخانې سیسټم دی چې راکټونه یې تر ۶۰ کيلومتر اوږد واټن پورې فاصله په نخښه کولی شي. دا چې مرمۍ یې په اتوماتيک ډول ډکيږي نو دا د مسلسل فاير ډېره زياته وړتيا لري.
انځور: Sven Eckelkamp/IMAGO
ماردر ټانکونه
دا ټانکونه زياتره وخت د جګړې په لومړۍ کرښه کې د سپکو وسلو څخه د دفاع په موخه کارول کيږي او همدا راز د درنو ټانکونو په مقابل کې هم دفاع کوي. د دې ټانکونو اصلي دنده د جګړې ډګر ته د عسکرو انتقال دی. دا پياده جنګي وسايط يا ټانکونه درانه يا جګړه ایز ټانکونه د جګړې تر میدانه بدرګه کوي او ساتنه ترې کوي. دا ټانکونه په سپکو وسلو او زیاتره وخت په هدایت شويو توغنديو سمبال وي چې زغروال ټانکونه سوري کوي.
انځور: Philipp Schulze/dpa/picture alliance
زغره وال پوما ټانکونه
پوما د لا ډېر جګړه ايز ځواک په لرلو سره له ماردر ټانکونو لا عصري دي. دا ټانک د ۳۰ ملي متره کاليبر لرونکی بشپړ قوي توپ لري. د ټانک پر سر د توپ د کنترول له پاره پرسونل ته اړتيا نه وي ځکه چې وسله له لیرې کنتروليږي.
انځور: picture alliance/dpa/H. Hollemann
پرسونل انتقالوونکې فوکس ټانکونه
زغره وال پرسونل انتقالوونکي فوکس او بوکسر ټانکونه د ځمکنيو قطعاتو، تلفاتو او يا د تجهیزاتو د انتقال له پاره طرحه شوي دي او يوازې په سپکو وسلو سمبال دي. دا په دې معنا چې دا ټانکونه په عمومي ډول يوازې د سپکو او منځنيو ځمکنيو وسلو پر وړاندې مقاومت کولی شي.
انځور: Sven Eckelkamp/IMAGO
اکشتافي زغره واله نقليه وسيله
کوچنۍ، چټکه، خاموشه او يوازې په سپکو وسلو سمباله دا نقليه وسیله چې «فينک» نوميږي د لولکس ټانکونو ځای ناستي او د آلمان د پوځ اصلي اکتشافي ټانک دی. دا د دريمې کچې زرې محافظت لري او په بيلا بيلو وسلو سمباليدلای شي.
انځور: picture-alliance/dpa
بفل؛ ځانګړې زغره والې نقليه وسيلې
د «Büffel» زغره وال د حصول يا بيا موندنې دا ټانکونه د هغو ټانکونو او نورو درنو وسلو او ابزارو په بيا موندلو او ترلاسه کولو کې مرسته کوي چې د جګړې په ډګر کې د بريدونو له کبله ويجاړ شوي وي.
انځور: picture-alliance/dpa/P. Schulze
پل جوړونکي ځانګړي زرې ټانکونه «بيبر»
«بيبر» پل جوړونکي ټانکونه دي چې د سيندونو او خندقونو څخه د تیرېدو له پاره ډیزاين شوي. دغه ټانکونه په صعب العبور سیمو کې ډیر ګټور بلل کیږي او نورو نقیله جنګي وسایطو ته د پل په توګه نقش لوبوي.
انځور: Patrik Stollarz/AFP via Getty Images
دافع هوا لرونکي فلاک ګيپارد ټانکونه
ګيپارد په هر ډول آب و هوا کې کار ورکونکی خودکاره د الوتکې ضد ټانک دی چې په ۱۹۶۰م لسیزه کې جوړ شوې او په ۱۹۷۰م لسیزه کې ميدان ته کښته کړل شو. دا ټانکونه څو ځلي عصري شوي او په نويو او پرمختللو وسايلو سمبال شوي دي. دا د آلمان د پوځ او د ناټو د يو شمير نورو هېوادونو د هوايي دفاع اساس بلل کيږي.
