هسپانیې د اروپايي سرحدي او ساحلي ساتنې له ادارې (فرونټېکس) څخه د هغو زرګونو کډوالو د پروسس په برخه کې د مرستې غوښتنه کړې چې تېره میلادي میاشت د هسپانیې «سیوتا» ته اوښتي ول او لا هم د افریقا په شمال کې د هسپانیې په دې خاوره کې پاتې دي.

د هسپانیې د کورنیو چارو وزیر فرناندو ګراندې مارلاسکا، د اروپايي کمېسیون د کډوالۍ او کورنیو چارو عمومي رییسې بېاته ګمینډر ته یو داسې درخواست لیږلی چې پکې په «سیوتا» سیمه کې د کډوالو د ارزونې په برخه کې د مرستې غوښتنه شوې ده.

مادرید همداراز د د مرستې له پاره د اروپايي سرحدي او ساحلي ساتنې له ادارې یا فرونټېکس څخه د ۱۰ نورو افسرانو غوښتنه کړې ده.

فرونټېکس د اروپايي ټولنې هغه اداره ده چې د دې ټولنې د بهرنیو سرحدونو د مدیریت او له پولې اوښتونکو جرمونو سره د مبارزې مسؤلیت لري.

ولې هسپانیه د «سیوتا» د کډوالو په اړه مرسته غواړي؟

د روان میلادي کال د جولای په وروستیو کې څه باندې ۷۰ زره کډوال په ناقانونه توګه له مراکش څخه د هسپانیې «سیوتا» ته واوښتل. دې پېښې د اروپايي ټولنې په کچه د کډوالۍ یو اضطراري حالت رامنځته کړ او د هسپانیې کیڼ اړخي حکومت یې له سختو نیوکو او ستونزو سره مخ کړ.

که څه هم یادې سیمې ته د رسیدلو کسانو له ډلې ډېری یې په چټکۍ سره بېرته مراکش ته واستول شول، خو لږ تر لږه ۵ زره کډوال لا هم د هسپانیې په دې سیمه کې پاتې دي، داسې سیمه چې شاوخوا ۸۰ زره اوسېدونکي لري.

مادرید نه شي کولای پاتې کډوال په چټکۍ سره وشړي، ځکه له انفرادي ارزونې پرته د هغوی ډله ‌ییز اخراج د مهاجرت د نړیوال قانون او همدا راز د هسپانوي محکمو د پرېکړو له مخې منع دي.