د برلین او مونشن ترمنځ گړندي اورګاډي پر پروژه په پیل کې نيوکي کېدلې. خو اوس چې دغي پروژې چې (VDE 8) ورته ویل کیږي او د شرقي او غربي آلمان د نښلولو اشاره ورته کیدله، پرانیستل شوې او په دې توګه د شپږو ساعتونو مزل ۴ ساعتونو ته را ټیټ شوی دی.

د ۲۰۰۰م کال له پیل راهیسې هغه مهال چې د آلمان حکومت د بودیجې له کمښت سره مخامخ وو، د اتحاد پروژه نږدې وه چې وتړله شي. سربیره پر دې هغه بودیجه چې د دې پروژې له پاره په پام کې نیول شوې وه، یوازې د دې پروژې د ساتلو له پاره وه نه د پراختيا له پاره او په پایله کې له ریل او رغیدو پرته ډیر پلونه همداسې پاتې شول.

تر ډیري مودې داسې انګیرل کیده چې د اتحاد پروژه به هم د برلین د نوي هوايي ډګر د پروژې له سرنوشت سره مخامخ شي. د هوايي ډګر پروژه هم پر ډیرو مصارفاتو سربیره، تر اوسه پوري نه ده بشپړه شوې. خو په پای کې د دې دوو سترو ښارونو ترمنځ د اورګاډي دغه۱۰میلیارد یوریې پروژه د الوتکو او بسونو د لوړو ټکټونو ځای ناستې شوه.

د د دې پروژې د ریل نیمايي برخه پټلۍ تر ځمکې لاندې تیریږي. په دې پروژه کې سترې ستونزې چې انجنیران ورسره مخامخ ول هغه د هغه غږ کنترول وو چې له تونل څخه د ریل د وتلو پر مهال تولیدیدو. هغه ریلونه چې په ډیر سرعت سفر کوي، د هوا یوه برخه په ډیر فشار ټیله کوي او هغه مهال چې اور ګاډی له تونل څخه بهر کیږي د یوه انفجار په اندازه لوړ غږ او ډیر باد تولیدوي.

د دې ستونزې د حل له پاره د پروژې انجنیرانو د تونل په خروجي برخو کې په اصطلاح «کانوپي» یا برنډې ته ورته سیمې جوړې کړې ترڅو له غږ پرته د هوا څپې په څرخ راشي او له تونلونو د وتلو پرمهال د غږ کچه ټیټه کړي.

دغه اورګاډی به په ورځ کې درې ځله د برلین او مونشن ترمنځ حرکت وکړي او سرعت یي هم په ساعت کې ۳۰۰ کیلومتره دی.

د شګو او جغل پر ځای داورګاډو نوې پټلۍ پر کانکریټ ایښول شوي دي. د دغو کانکریټي تختو وزن شاوخوا ۵ ټنو ته رسیږي او دا آسانتیا برابروي چې پټلۍ ان د میلیمتر په اندازه په دقت سره نصب کړل شي.

د آلمان د اورګاډو شرکت هیله من دی چې د مسافرو د شمیر په زیاتیدو سره به د دې سترې پروژې د مصارفو یوه برخه بیرته تر لاسه کړي. ویل کیږي چې د سفر ټکټونه به هم لوړ شي او ممکن ارزښت یې تر۱۵۰ یورو پورې لوړ شي. په دې ترتیب د ټکټونو تعرفه به ۱۳ سلنه لوړه شي.

د آلمان د چاپیرال ساتنې او طبعیت نادولتي سازمان د دې پروژې په ترڅ کې چاپیریال ته د زیان رسولو له امله نیوکې کړي. په ځواب کې د اورګاډي شرکت ویلي چې د دې پروژې له پاره ۴ زره هکټاره طبعیت یې بیرته ژوندی کړی او۶۰۰ نیالګي یې کښینولي دي.

د پروژې د پلي کولو پرمهال تاریخ پوهان هم بیکاره نه ول. د ریل نوې لیکه له داسې سیمو تیریږي چې۳۵۰۰ کاله مخکې د سوداګرۍ یوه لار وه. د پروژې د پلي کولو په ترڅ کې د ۷۰۰۰ کلونو پخوانی یو کلی هم کشف شوی او ورڅخه ۲۰ زره تاریخي توکي له خاورو راايستل شوي دي.

د دې پروژې په تکمیل سره، اوس چارواکي غواړي د برلین او مونشن ترمنځ سفر کوونکي دې ته وهڅوي چې له دې پټلۍ استفاده وکړي. دوی همدا راز هیله څرګنده کړې چې په مسیر کې د نوي نسل اورګاډي یا ICE4 به مسافرین دې ته وهڅوي چې له دې اورګاډو ډیره کار واخلي او تګ راتګ له دې لارې وکړي.