له سوډانه د رايستل شویو افغانانو دویمه ډله کابل ته رسېدلې
۱۴۰۲ اردیبهشت ۱۵, جمعه![سوډان / ولسي خلک سعودي عربستان ته لېږدول کیږي](https://static.dw.com/image/65441851_800.webp)
د طالبانو د بهرنیو چارو وزارت وايي، په سوډان کې د بند پاتې شویو افغانانو دا دویمه ډله څو ورځې وړاندې سعودي عربستان ته لېږدول شوې وه.
د دغه وزارت یوه ویاند حافظ ضیا احمد تکل د کابل نړېوال هوايي ډګر کې رسنیو ته وویل: «نن جمعه د اسلامي امارت د بهرنیو چارو وزارت د سعودي عربستان په همکاری سره وکولای شول چې د سوډان په جګړه کې د بند پاتې افغانانو دویمه جوپه چې ۴۳ تنه کیږي د آریانا هوايي شرکت په مرسته خپل هېواد ته په خوندې شکل رانقل کړي.»
تکل په خپله ټویټرپاڼه د رايستل شویو افغانانو له ډلې د ډاکټر ایمل په نوم د یو رايستل شوي افغان ویډیو خپره کړې.
هغه په دې ویډیو کې ویلي: «د سعودي عربستان په جده کې زموږ د اسلامي امارت سفارت او قونسلګري زموږ ډېره ښه پذیرايي وکړه.»
د طالبانو د بهرنیو چارو وزارت ویلي دي چې د سوډان په جګړه کې ۱۲۰ افغانان بند پاتې دي چې له دې ډلې ۴۳ یې کابل ته ورسېدل.
اړوند مطالب:طالبان له سوډان څخه افغانان تخلیه کوي
تکل وايي چې د سوډان په جګړه کې د بند پاتې نورو افغانانو د خوندې رايستنې هلوځلو ته هم دوام ورکوي.