په آلمان کې د کريستمس بازارونو په هکله سروې د یوګاو (YouGov) په نوم انستیتیوت کړې ده. د سروې ۲۲ سلنه ګډونوالو په وروستیو کلونو کې پر کرسمس بازارونو خونړيو حملو ته په کتو، ويلي دي چې دوی د کرسمس پر بازارونو د احتمالي حملو له بابته «ډېره» اندېښنه لري.
د سروې ۴۰ سلنه ګډونوالو ويلي چې دوی د امنيت له اړخه «تر یو حده» اندېښنه کوي او ۳۵ سلنه نورو بیا ویلي چې دوی په دې تړاو اندېښمن نه دي.
ښارونه د کرسمس بازارونو له پاره شديد امنيتي تدابېر نیسي. د کرېسمس بازارونو پر لور د تللو لارو پر سر موانع لګول کيږي تر څو د موټرو د تلو مخنیوی وشي او له تېر کال راهیسې پکې د ټول هېواد په سطحه د چاقوګانو بنديز هم لګول شوی دی.
آلمان د کرسمس بازارونو له پاره امنيتي تدابیر په وروستیو کلونو کې پر دغو بازارونو د مرګونې حملو وروسته زیات کړي دي.
د تېرکال په دسمبر کې د آلمان په شرقي ښار ماګديبورګ کې پر خلکو موټر وځغلول شو چې په کې ۶ کسان ووژل شول. په ۲۰۱۶ کې په برلین کې دکرسمس پر بازار یوه افراطي اسلامپاله حمله وشوه چې په کې ۱۳ کسان ووژل شول.
دا چې یوازې د شديدو امنيتي تدابيرو نیول به کافي وي او که نه په دې هکله آلمانیان په دوو برخو وېشل شوي دي. ۴۱ سلنه ګډونوال په دې باور دي چې کلک امنيتي تدابېر کفایت کوي خو ۳۷ سلنه نورو بیا د نه ځوابونه ورکړي.
په ټوله کې ۵۹ سلنه آلمانیانو ويلي چې دوی پلان لري چې د سږکال کرسمس بازارونو ته ولاړ شي، خو ۳۳ سلنه نورو ويلي چې نه ځي.
د نه تلو ېې مختلف دلایل ښودل شوي دي. تر ټولو عمده دلیل د کرسمس په بازارونو کې د خوړو او څښاکو لوړه بیه یاده شوې چې دا د ۵۳ سلنه ګډونوالو نظریه ده. ۵۰ سلنه ګډونوالو ېې دلیل په دغو بازارونو کې د خلکو ډېره ګڼه ګوڼه ښودلې، ۳۶ سلنې یې لږه علاقمندي او ۳۲ سلنې ېې بیا د ناخوندیتوب موضوع یاده کړې ده.
دا وخت په آلمان کې د کرسمس بازارونو پر جوړېدو چټک کارونه روان دي. ځینې بازارونه د دسمبر میاشتې له رسېدو مخکې خلاصيږي. د کرسمس بازارونه چې په څراغونو او رنګونو ښایسته شوي وي، معمولا د ښارونو په لویو مېدانونو کې په موقتي ډول جوړيږي. په دغو بازارونو کې له رستورانتونو او خوږو خوراکونو نېولې تر لاسي صنایعو او د لوبو وسایلو پورې موجود وي.
له آرشیف څخه:
انځوریز رپوټ: په برلین کې د کريسمس پر بازار د برید په ویر کې
په داسې حال کې چې اروپایان او آلمانان د کريسمس په تیاریانو بوخت دي په برلین کې د کريسمس پر بازار برید چې مسئولیت یې هم د اعش پرغاړه اخیستي آلمانان اندیښمن کړي دي. سه شنبه له دغو قربانیانو سره د پیوستون او ویر ورځ وه.
انځور: Twitter/Ville de Niceد فرانسې د نیسه ښار چې مخکې تر دې د ورته برید شاهده وه، په تویتر کې له دغه انځور سره د برلین له خلکو سره خپله همبستګي او همدردي ښکاره کړه.
دا هم هغه لارۍ ده چې بریدګر په برلین کې د کرسمس په بازار کې پر خلکو وخیژوله. د دغه برید په پایله کې ۱۲ تنه ووژل شول او ۴۸ تنه ټپیان شول. دا لارۍ د یوه پولنډي شرکت وه. اټکل کیږي چې د لارۍ موټروان د بریدګر په وسیله وژل شوی دی.
تر برید مخکې د بازار انځور
تر برید مخکې دغه بازار پر رنګه رانګه څراغونو او ګرپونو سینګار شوی وو، خو تر پيشې یو شپه وروسته په فضاء کې خاموشي حاکمه وه.
د براندنبورگ تاریخي دروازه
په برلین کې د کرسمس پر بازار تر برید وروسته له قربانیانو سره د همبستګي په موخه د براندنبورګ دروازه د څراغ په وسیله د آلمان د بیرغ په رنګ روښانه شوی وو.
د پيښې ځای ته نږدې سړک کې هر لور ته د ګلانو ګیډۍ لیدل کیدل. د سیمه ییزو خلکو سربیره د مختلفو هیوادونو اتباعو له قربانیانو سره د همدردۍ ښکاره کولو په موخه د ګلانو ګیډۍ ایښې وي.
تر دغې پيښې وروسته د آلمان بیرغ په نیمه زوړند حالت کې وو. نه یوازې اروپا بلکې د نړۍ مختلفو هیوادونو له آلمان سره خپله غم رازي ښکاره کړه.
د اروپایې اتحادیې غم رازي
اروپایې اتحادیې له برلین سره د خپل غم رازۍ ښکاره کولو په موخه د دغې اتحادیې په مقر کې خپل بیرغونه نیمه زوړند حالت ته راوستلي ول.
د فرانسې په پارلمان کې د یوې دقیقې چپتیا
د فرانسې لومړي وزیر د خپل هیواد د پارلمان له استازو سره یوځای د برلین د پیښې قربانیانو په یاد د یوې دقیقې له پاره چپتیا اختیار کړه. دغه هیواد مخکې تر دې له آلمان سره خپل پیوستون او همدردي اعلان کړی وه.
د هسپانیې چارواکو غم رازي
د هسپانیې ټول لوړپوړي چارواکي یوځای سره ودریدل او په برلین کې د کرسمس بازار د پيښې له قربانیانو سره یې خپله غم رازي ښکاره کړه.
یوازې په برلین کې د سه شنبې په ورځ د کرسمس بازارونه تړلي ول. که څه هم آلمانان ډیر اندیښمن ول، خو په نورو ښارونو کې د کرسمس بازارونه خلاص ول.
په جوپو جوپو خلک راتلل او په برلين کې د کرسمس په بازار کې يې د قربانیانو په یاد شمعې لګولې.
د آلمان د کورنیو چارو وزیر توماس دیمیزیر، د قربانیانو د یادون په کتاب له هغو سره د همدردۍ ښکاره کولو په موخه په دغه کتاب کې د لاسلیک کولو په حال کې لیدل کیږي.
تر برید مخکې د کرسمس په دې بازار کې ملکي خلک د خندا او خوشحالۍ په حالت کې لیدل کیدل، خو اوس په دغه ساحه کې وسله وال پولیس لیدل کیږي.
د دورتموند د فوټبال لوبډلې یو تن مینه وال د دغه پلاکاټ په لیږدولو سره د برلین د پيښې له قربانیانو سره خپله همدردي څرګندوي.
د آلمان صدراعظمه انګلا میرکل، د آلمان د کورنیو چارو وزیر توماس دیمیزیر او د دغه هیواد د بهرنیو چارو وزیر فرانک والتر شټاینمایر، د برلین په کرسمس بازار کې د قربانیانو په یاد ګلان ږدي.
د موټر مالک آریل زوراوسي، په خپل مبايل کې د دغې لارۍ د اصلي موټروان انځور ښکاره کوي. ویل کیږي چې نوموړی شخص(اصلي موټر چلونکی) د دغې پيښې لومړنې قرباني وو. اټکل کیږي چې بریدګر لومړی د موټر چلونکی وژلی او بیا د هغه له موټر څخه په استفادې یې دغه برید ترسره کړی. د اصلي موټر چلونکي جسد د دغه لارۍ موټر په کابین کې موندل شوی.
د آلمان لوړپوړي چارواکي د یو بل تر څنګ
د آلمان د ولسمشر یواخیم ګاوک او صدراعظمې انګلا میرکل په ګډون د دغه هیواد ټول سیاستوال د برلین په یوه کلیسا کې سره را ټول شوي ول او قربانیانو ته یې دعا وکړه.
د دغه بازار په هر قدمۍ کې پولیس اوږه په اوږه ولاړ دي او هر یو کوچني حرکت څاري. دوی په بازار کې ګزمه وهي او د شواهدو راټولو هڅه کوي.
