د سوریې نويو چارواکو دا خبره نن، سه شنبه (۲۰۲۴م کال د ډسمبر ۲۴) وکړه. په هغه عکسونو کې چې SANA دولتي خبري آژانس خپاره کړي دي، د سوریې نوی مشر احمد الشرع، چې په ابو محمد الجولاني، مشهور دی، د يو شمير وسله والو ډلو له مشرانو سره يوځای ليدل کيږي، خو د کردانو په مشرتوب د سوریې په شمال ختيځ کې د ځواکونو استازي پکې موجود نه دي.

د همدې خبري آژانس او په تیلګرام کې د چارواکو له خوا ويل شوي دي چې غونډه «د ټولو ډلو د منحليدو او د دفاع وزارت تر نظارت لاندې د هغوی د ادغام پر يوه توافق باندې پای ته ورسېدله.»

اړونده موضوع: د امریکا ډیپلوماټان د نوو واکمنانو سره د لیدو لپاره سوریې ته تللي

د یکشنبې په ورځ احمد الشرع، ويلي ول چې نوي چارواکي به «په هیڅ صورت کې داسې وسلو ته اجازه ور نه کړي چې د دولت له کنتروله بهر وي.»

هغه وويل چې دا څه د کردانو په مشرتوب د سوریې پر ديموکراتيک ځواک هم صدق کوي.اړونده موضوع: تېره اوونۍ د هيئت تحرير الشام ډلي مشر الشرع، د فرانسې خبري آژانس ته ويلي ول چې د کردانو سيمې به د نوي مشرتابه تر کنترول لاندې راوستل شي او دا چې «سوريه به نه ويشل کيږي.»

په سوريه کې د ديارلس کلنې کورنۍ جګړې په ترڅ کې تر نيم ميليون ډېر انسانان وژل شوي او دغه هېواد یې د نفوذ پر دوو ساحو ويشلی وو چې يوه یې د سيمه ایزو قدرتونو او بله یې د نړيوالو قدرتونو له ملاتړه د برخمنو وسله ډلو له خوا کنتروليدله.

خو د اسد تر سقوط او د هيئت تحرير الشام ډلې په مشرتوب ډلې له خوا د واک تر نيولو وروسته د سوریې په شمال کې د کردي ملېشو او د ترکیې له ملاتړه د برخمنو وسله والو ترمنځ سختې نښتې وشوې. کردي مليشې د امريکا متحده ايالاتو سره په ګډه د داعش ترهګر سازمان پر ضد جګړه کوي.