د طالبانو محکمې د یوې خبر پاڼې په خپرولو سره د افغانستان په پلازمېنې کابل کې د ۱۱ کسانو د بدني مجازات کولو خبر ورکړی دی.
د خبرپاڼې په حواله دغه کسان د کابل ولایت د نشه یي توکو او مسکراتو د مخنیوي ابتدائیه محکمې د پریکړې له مخې د نشه یي تابلیوتونو، الکولي مشروباتو او چرس خرڅلاو او قاچاق په تور مجازات شوي دي.
محکمې ویلي دي چې دغه کسان هر یو یې له ۱۰ تر ۳۰ پورې درو وهل شوي او له اوو میاشتو تر درو کلونو پورې د بند په سزا محکوم شوی دي.
د نیوکو له پامه غورځول او د مجازاتو دوام
طالبان یو وار بیا په افغانستان کې واک ته له رسیدو راهیسې د خپل رهبر په امر د تورنو کسانو بدني مجازات اجرا کوي او د نړیوالې ټولنې او بشري حقونو سازمانونو له خوا په پرله پسې ډول له غندل کیدو سربیره هم د دا ډول سزاګانو د عملي کولو لړۍ په شدت سره دوام لري.
د طالبانو ادارې په تیرو څه باندې څلورو کلونو کې څو کسان د مرګ په سزا محکوم او د خلکو په عام محضر کې «قصاص» کړي او سلګونو نور یې په درو وهلي دي.
طالبانو د شنبې په ورځ هم د څلورو ښځو په ګډون ۹ کسان په بامیان او کاپيسا ولایتونو کې په درو وهلي ول.
تیره اونۍ هم د طالبانو محکمې په کابل کې ۱۸ کسان د نشه یي تابلیتونو، الکولي مشروباتو او مخدره موادو د قاچاق او خرڅلاو په تور د خلکو په عام محضر کې په درو ووهل.
د حقوقي چارو کارپوهان نیوکه کوي چې د طالبانو په اداره کې محاکمې په عادلانه توګه نه ترسره کیږي او تورن کسان مدافع وکیل او حقوقي ملاتړ ته لاس رسی نه لري.
انځورونه: د فرخندې د قتل د عاملینو د جزا راکمولو پر ضد لاریون
په پلازمینه کابل کې په سلونو کسانو لاریون وکړ او د فرخندې په حق کې یې د عدالت د تطبیقدو غوښتنه وکړه. په وروستیو کې د استیناف محکمې د فرخندې د قتل د څلورو عاملینو د اعدام سزا په شل کاله بند واړوله.
انځور: DW/H. Siratاحتجاج کوونکي د شاه دوشمشیره زیارت مخې ته چیرې چې فرخنده وژل شوې وه راټول شوي وو او له هغه ځای څخه یې د ښار د مرکز د پل باغ عمومي پر لور لاریون وکړ.
لاریون کوونکي حکومت پر دې تورناوه چې د ښځو د حقوقو په برخه کې بې پروايي کوي او د فرخندې په دوسیه کې عدالت نه تطبیقوي.
په دغه لاریون کې گډون کوونکو ښځو او نجونو د استیناف پر محکمې نیوکه کوله چې د فرخندې د قتل د عاملینو د اعدام سزا یې لغوه کړې ده.
فرخنده د روان میلادي کال په مارچ میاشتې کې د شاه دوشمشیره زیارت مخې ته د قهریدلو خلکو د یوې ډلې له لوري د قرآن د سوځولو د بې اساسه تور له کبله ووژل شوه.
احتجاج کوونکو ویل چې د دغه قتل له اصلي عاملینو څخه یوه تن ته برائت ورکړل شوی او نور درې کسه چې د فرخندې په قتل کې یې لاس لاره، لا نه دي نیول شوي.
هغو ښځو او نجونو چې په دغه لاریون کې یې گډون کړی وو، پر دې ټینگار کاوه چې د خپلې راتلونکي په هکله اندیښمنې دي.
د ملي همبستگۍ گوند ویاندې سیلۍ غفار وویل: «د پغمان د قضیې او نورو لسگونو قضیو په څیر اصلي عاملین پریښول کیږي او د دوهمې او دریمې درجې څو تنه چې زور او واسطه نه لري، محاکمه کیږي. د فرخندې په قضیه کې همداسې شوي دي.»
د دغه لاریون په زیاترو تابلو گانو کې چې د ملي همبستگۍ د گوند له لوري ترتیب شوي ول، د فرخندې په قضیه کې پر حکومت باندې نیوکه تر سترگو کیده.
د ښځو او نجونو تر څنگ، یو شمیر سړیو هم په دغه لاریون کې گډون کړی وو.
د فرخندې قضیه د افغانستان د قضایي دستگاه له پاره په یوه ازمیښت اوشتې ده. ولسمشر ژمنه کړې ده چې عدالت به پلي کیږي او د محکمې کار نهایي شوی نه دی.
