د سي آی اې په «ورلډ فېکټ بُک» کي له ۲۱۹ هيوادونو څخه غزه تر ټولو کمه برېښنا توليد کوونکې اداره بلل سوې ده. په دغه سيمه کي هر کال صرف ۵۱ زره واټ ساعت برېښنا توليديږي. په دې توګه غزه په ټوله نړۍ کي تر ټولو کمه برېښنا توليدونکې سيمه ده.

د ورلډ فېکټ بُک د ۲۰۱۶ کال د معلوماتو پر اساس په افغانستان کي هر کال ۱،۲ مليارد کلو واټ ساعته برېښنا توليديږي. د کارپوهانو په حواله افغانستان د خپلو سيندونو په مهارولو سره د برېښنا توليد څو چنده زياتوالی او د خپلي اړتيا برېښنا په خپله د توليد کولو وړتيا لرلای سي.

د هغه باوجوده چي پاکستان ۱۰۴ مليارد کلو واټ ساعت کلنی برېښنايي توليد لري، خو په دغه هيواد کي د نفوس د زياتوالي او نورو لاملونو له کبله بيا هم د برېښنا سخت قلت دی.

د ۲۰۱۵ کال د شميرو له مخي په ترکيه کي د برېښنا کلنی توليد ۲۴۵ مليارد کلو واټه ساعته ؤ. په دې توګه نو دغه هيواد له ۲۱۹ هيوادونو څخه ۱۹ تر ټولو زياته برېښنا توليد کوونکی هيواد دی.

د افغانستان ګاونډي هيواد ايران چي په لوړه اندازه د تيلو ځيرمي لري، د برېښنا په توليد کي هم مخکي دی. دغه هيواد هر کال ۲۶۵ مليارد کلو واټ ساعت برېښنا توليدوي.

سعودي عربستان په نړۍ کي يو له تر ټولو زياته برېښنا توليد کوونکو هيوادونو څخه شميرل کيږي. دغه هيواد هر کال ۳۱۸ مليارد کلو واټ ساعته برېښنا توليدوي.

جنوبي کوريا هر کال ۵۲۸ مليارد کلو واټ ساعت برېښنا توليدوي او په دې توګه په نړۍ کي پر لسم مقام راځي.

اټومي قدرت او د اروپايي اتحاديې دويم لوی اقتصادي قدرت فرانسه هر کال ۵۳۶ مليارد کلوواټ ساعت برېښنا توليدوي او په دې توګه په ليسټ کي پر نهم مقام هيواد دی.

د جنوبي امريکا برازيل هيواد هر کال ۵۷۸ مليارد کلو واټ ساعت برېښنا توليدوي او په اتم مقام دی.

د اروپايي اتحاديې تر ټولو ستر اقتصادی قدرت آلمان/جرمني هر کال ۵۸۸ مليارد کلو واټ ساعت برېښنا توليدوي.

پر شپږم مقام د کاناډا هيواد دی چي په ۲۰۱۵ کال يې ۶۴۳ مليارد کلو واته ساعت برېښنا توليد کړې وه.

جاپان په کال کي ۹۷۶ مليارد کلو واټ ساعت برېښنا توليدوي او په دې توګه په دغه ليسټ کي پر پنځم مقام دی.

پر څلورم مقام د روسيې هيواد دی چي هر کال ۱۰۰۸ مليارد کلو واټ ساعته برېښنا توليدوی.

اټومي قدرت هند په نړۍ کي له تر ټولو زياته برېښنا توليد کوونکو هيوادونو څخه پر ۳ مقام دی. دغه هيواد هر کال ۱۲۸۹ کلو واټ ساعت برېښنا توليدوي.

د امريکا متحده ايالات چي په زياتوساحو کي د نړۍ تر ټولو لوی قدرت بلل کيږي، د برېښنا په توليد کي هم مخکي دی. دغه هيواد هر کال ۴۰۸۸ مليارد کلو واټ ساعت برېښنا توليدوي او په دې توګه په دغه ليسټ کي پر دويم مقام دی.

چين په نړۍ کي تر ټولو زياته برېښنا توليد کوونکی هيواد دی. د سي آی اې فېکټ بُک په حوال چين هر کال ۵۸۸۳ مليارد کلو واټ ساعت برېښنا توليدوي.