اروپايي اتحاديه شرکتونه د مصنوعاتو په ترميم مکلف کول غواړي
۱۴۰۱ اسفند ۲۰, شنبه![Sortierung von Elektroschrott](https://static.dw.com/image/57181554_800.webp)
په پام کې ده چې دغه پلان شوی قانون به په ټوله اروپايي اتحاديه کې قابل عمل وي. د اروپايي اتحاديې کميسيون غواړي چې اړونده مسوده د روان ۲۰۲۳ کال د مارچ په ۲۲ نېټه وړاندې کړي. د «وېلټ ام زونټاګ» په نوم آلمانۍ رسنۍ د راپور په حواله د ياد قانون د مسودې په تړاو معلومات په بروکسل کې د چارواکو له خوا ورکول شوي دي. د دغه مسودې له مخې به د مصنوعاتو توليد کوونکي شرکتونه او کمپنۍ په دې مکلفې کړل شي، چې خپلو مشتريانو ته د ګارنټي يا ضمانت د وخت تېرېدو وروسته لا هم د خرابو شوو آلاتو د ترميم حق ورکړي. عموما د ګارنټي ميعاد دوه کاله وي. خو اروپايي اتحاديه غواړي چې د مشتري له خوا د مثال په توګه د يوې اليکترونيکې آلې له رانيولو څخه دوه کاله وروسته لا هم د دغې آلې شرکت جوړونکی اړيني پُرزې مهيا کړي او مشتري ته د دغې آلې د ترميم امکانات برابر کړي.
دغه هم ولولئ: آيا پاکستان د خطرناکو کثافاتو په زيرمتون بدليږي؟
د اروپايي اتحاديېکميسيون غواړي چې د ترميم مصارف هم راکم کړي. د دغه مقصد لپاره په پام کې نيول شوي چې د ترميم سره تړلو موضوعاتو لپاره يو معلوماتي پلېټ فارم جوړ کړل شي. پر دغه پلېټ فارم به بيا رانيوونکي د ترميم په تړاو د اړونده ځان مکلف کوونکي توليدي شرکت د ترميمي معيارونو او قيمتونو په هکله معلومات ترلاسه کړلای شي. د اروپايي کميسيون د پلان له مخې به دغه پلېټ فارم په مجموع کې د ترميم د معيارونو او قيمتونو په تړاو د زيات شفافيت او رغنده سيالۍ لامل شي.
دغه هم ولولئ: د پلاستیک ککړتيا پر وړاندي د ملگرو ملتونو غونډه
د اروپايي اتحاديې د عدلي چارو کميسار، ديدير راندرس و «بلډ ام زونټاګ» رسنۍ ته ويلي دي چې په تيرو کالونو کې د توليد کوونکو او مشتريانو لپاره تر ټولو آسانه لاره د زړو آلاتو د ترميم پر ځای د نوو مصنوعاتو رانيول وه. راندرس زياته کړېده چې البته د ترميم پر ځای د نوو آلاتو رانيول او له کبله يې د کثافاتو زياتېدل د چاپيريال ساتنې په پار د پايېدنې د پرنسيپ ضد کار دی. دغه کميسار وويل چې کميسيون غواړي چې د نوې آلې رانيولو پر ځای د زړې آلې ترميم «ترويج او عادت» شي. د هغه په وينا مستهلکين بايد چې انتخاب ترلاسه کړي چې ايا خپل زاړه آلات د نوي قانون له خوا مکلف شوي توليد کوونکي شرکت له خوا ترميم کوي او که د نورو بېطرفه خدمات وړاندي کوونکو لخوا يې ترميم کوي. هغه وويل چې د ترميم لپاره د بېطرفه خدمات وړاندي کوونکو په تړاو معلومات ترلاسه کول به هم آسانه کړل شي.
د اروپايي کميسيون په وينا د سامان آلاتو او مصنوعاتو د خرابېدنې له کبله هر کال ۳۵ ميليون ټنه غير ضروري کثافات رامنځته کيږي. په وينا يې د دغو کثافاتو زياته برخه هغه مصنوعات وي چې ترميم يې په اکثرو مواردو کې ممکن وي.
آ./ا.ا./ن.ص.