د اسرائیلو د دفاع وزارت اعلان کړی دی چې له امریکا متحده ایالاتو سره د میلیاردونو ډالرو وسلو د خریدارۍ معاملې پر سر توافق ته رسیدلي دي. په دې موافقه کې د لاکهید مارتین شرکت CH-53K ډوله ۱۲ هلیکوپترونه او په هوا کې جنګي الوتکو ته دوه تیل رسوونکي د بوئینګ ساخت KC-46 الوتکې شاملې دي، چې د خریدارۍ تړون یې لاسلیک شوی دی.
د آلمان خبري آژانس د رپوټ پر بنسټ د وسلو د خریدارۍ د دغې معاملې ارزښت ۲ میلیارده او ۷۰۰ میلیونه یورو اټکل شوی دی. ویل کیږي چې لومړني هلیکوپترونه به په ۲۰۲۶م کال کې اسرائیلو ته وسپارل شي.
څه موده مخکې د نیویارک ټایمز ورځپاڼې رپوټ ورکړی و چې اسرائیل له امریکا څخه غوښتي دي چې د تیل رسوونکو الوتکو په سپارلو کې دې بیړه وکړي.
دغه ورځپاڼه زیاتوي، دا کار کیدای شي د ایران پر اټومي تاسیساتو د برید کولو په برخه کې ټاکونکی رول ولوبوي. خو سره له دې هم امریکایي چارواکو ویلي دي چې امکان نه لري له ۲۰۲۴ م کال مخکې دې دوی وتوانیږي دغه هیواد ته تیل رسوونکي الوتکې اماده کړي.
اسرائیل د داسې یوه ایران چې پر اټومي وسلو سمبال وي په مقابل کې خپل موجودیت په خطر کې ويني.
همدا اوس په ویانان کې د ایران او نړۍ د سترو قدرتونو ترمنځ د ایران د اټومي پروګرام په هکله خبرې اترې روانې دي، څو امریکا او ایران دواړه په ۲۰۱۵م کال کې شوې اټومې موافقې ته بیرته را وګرځول شي.
د اسرائیلو لومړي وزیر نفتالي بنت، د ۲۰۲۱م کال د دسمبر میاشتې په اوایلو کې په دغو مذاکراتو کې د ګډون درلودونکو سترو قدرتونو له استازو وغوښتل چې د ایران پر وړاندې دې له غوڅ دریځ څخه کار واخلي.
آژانسونه: ش.ن/ ن.ص
په فارس خلیج کي د ایران د توغنديو د نوې اډې انځورونه
د ایران د سپاه پاسداران انقلاب عمومي قومندان ددغه هیواد د سمندري ځواک د قومندان په ملګرتیا د فارس خلیج په سواحلو کي د ایران د توغنديو نوي اډې ته ورغلي. هغوی دغه تأسیسات او توغندي ستراتیژیکي وسلې وبللې.
انځور: YJC
د جنورۍ پر ۸مه د ایران د سپاه پاسداران انقلاب عمومي قومندان، حسین سلامي ددغه هیواد د سمندري ځواکونو د قومندان، علیزضا تنګسیري په ملګرتیا د فارس خلیج په سواحلو کي د دغه هيواد د توغنديو د نوي اډې ليدنه وکړه.
انځور: YJC
حسین سلامي په خپلو خبرو کي وویل: «هغه څه چي په دغه کلکسیون کي وینی، د سپاه د سمندري ځواک د ستراتیژیکي توغنديو د څو ساتل سوو تاسیساتو له جملې څخه يو دی چي په هغه کي موږ د توغنديو او دافع هوا یوه مجموعه وینو.
انځور: YJC
د سپاه قومندان وویل: «ددغي مجموعې اوږدوالی کیلومترو ته رسیږي او ددغي مجموعې اکثره وسلې د سپا په سمندري ځواک کي هم موجودي دي.
انځور: YJC
د هغه په خبره «دغه توغندي په سونو کیلومتره واټن وهي، ډیر دقیق او تخریبونکي دي او کولای سي د دښمن له جنګي الکترونیکي تجهیزاتو څخه تیر سي».
انځور: YJC
حسین سلامي د سپاه د سمندري ځواک دغه توغندي «ډیر پيشرفته» وبلله او زياته یې کړه چي دغه توغندي له ساحل څخه سمندر، له مځکي څخه مځکي، له هوا څخه اوبو او د اوبو څخه هوا ته د جهان د بهترینو راکټانو د جملي څخه دي.
انځور: YJC
فارس خلیج په تیرو څلورو لسیزو کي د ایران او امریکا او دهغه د منطقه وي متحدینو ترمنځ د تشنج شاهد وو.
انځور: YJC
د دواړو خواوو ترمنځ د قدرت ښکاره کول په دې وروستيو کي زور اخيستی دی. په تیرو ورځو کي د قاسم سلماني د وژل کیدو له تلین سره سم د فارس پر خلیج باندي د امریکا متحده ایالاتو لخوا B52 ډوله جنګي الوتکو پروازونه وکړل او د جورجيا په نوم جنګي اوبتل یې فارس خليج ته ولېږه.
د تشنج د ډیریدو په منځ کي ایران اعلان وکړ چي ډیر ژر به د یورانیمو ۲۰ فیصده غني کیدل شروع کړي او په فارس خلیج کي یې د نوو توغنديو او بې پیلوټه الوتکو څخه پرده پورته کړه.
انځور: YJC
د ایران روحاني رهبر، علي خامنه اي هم د جمعې د ورځي په خبرو کي د توغنديو پر سیاست باندي ټینګار وکړ او ویې ویل: «نن ورځ د ایران دفاعي قدرت داسي دی چي زموږ دښمنان مجبوره دي زموږ پر توانايي باندي حساب وکړي.»
