طالبانو او پاکستان يو د بل د پوستو د نيولو خبر ورکړی
۱۴۰۴ اسفند ۱۵, جمعه
د طالبانو او پاکستان د ځواکونو ترمنځ نښتې نهمې ورځې ته داخلې شوي دي.
د طالبانو د دفاع وزارت خبر ورکړی دی چې تېره شپه د طالبانو او پاکستاني ځواکونو ترمنځ د کندهار په ښورابک ولسوالۍ او همدا راز د خوست، پکتيا او کونړ ولايتونو په يو شمير سرحدي سيمو کې نښتې روانې وې.
اړونده موضوع: طالبان وايي جلال آباد کې ېې یوه پاکستانۍ جيت راغورځولې او پیلوټ ېې ژوندی نیولی
د دغه وزارت وياند ادعا کړې ده چې په دې تازه نښتو کې یې په ښورابک ولسوالۍ کې د پاکستاني عسکرو يوه اډه نيولی ده او د ماين په چاودنه کې یې ۳۰ پاکستاني عسکر وژلي دي.
هغه همدا راز زياته کړې چې د خوست ولايت په سرحدي ولسوالۍ علي شير کې یې د نښتو په ترڅ کې څلور او همدا شان په کونړ کې شپږ پاکستاني عسکر وژل شوي دي.
دا نښتې د شپې د نهو بجو په شا او خوا کې پيل شوي او تر اوسه روانې دي. د نښتو په ترڅ کې د ملکيانو د احتمالي تلفاتو په اړه دقيق معلومات په لاس کې نشته.
پاکستان ادعا کړې ده چې د طالبانو يو شمیر پوستې یې تخريب کړي
پاکستان همدا راز نښتې او د افغانستان پر خاوره د توپخانې بريدونه هم تائيد کړي دي.
پاکستان ويلي دي چې د افغان او «فتنه الخوارج» پر ضد ځمکني او هوايي عمليات په اغیزمنه توګه ادامه لري.
د پاکستان دولتي راډيو د امنيتي او استخباراتي سرچينو په خواله خبر ورکړی دی چې د پاکستان پوځ د افغان طالبانو پر وړاندې د برياليو عملياتو په ترڅ کې د پاکستان او افغانستان د پولې په اوږدو کې د کرم په سيمه کې د هغوی يو شمير قرارګاوې ويجاړې کړي دي.
اړونده موضوع: د پاکستان او طالبانو يو بل ته د درنو زيانونو اړولو ادعاوې
پاکستان ټینګار کړی دی چې دا پوځي عمليات به د ټاکل شويو اهدافو ترلاسه کيدو پورې ادامه ورلري.
په دې وروستيو کې ملګرو ملتونو او نورې نړیوالو بنسټونو د جګړې د دوام په اړه اندیښنې څرګندې کړي او د ملګرو ملتونو د بشري مرستو د همغږۍ دفتر (اوچا) په خپل تازه رپوټ کې ويلي دي چې تر اوسه د نښتو په ترڅ کې لږ تر لږه ۵۶ ملکيان وژل شوي او ۱۲۹ نور ټپيان شوي دي.
م. م: د تازه نښتو له کبله تر ۱۰۰ زرو ډېر کسان بې ځای شوي
په دې منځ کې د ملګرو ملتونو د کډوالو چارو ادارې د تازه نښتو له کبله د زرونو کسانو د بې ځايه کيدو رپوټ ورکړی دی.
ملګرو ملتونو ويلي: «د پولې په اوږدو کې د تازه شخړې له کبله په افغانستان او پاکستان کې وضعيت ترينګلی دی.» ياد سازمان زياته کړې چې په افغانستان کې د تازه نښتو له امله شا او خوا ۱۱۵ زره کسان او په پاکستان کې ۳۰۰۰ کسانو خپل کورونه پرېښي دي.
يو شمیر هېوادونو د دې ګاونډي هېوادونو ترمنځ د اوربند له پاره د خبرو اترو وړاندیز کړی دی خو تر اوسه د سولې کوم څرک نه ترسترګو کيږي. ترکیې هم په دې تېرو ورځو کې د منځګړيتوب وړاندیز کړی وو خو د ایران کړکيچ د خليج د هېوادونو توجو جلب کړې ده چې تر دې د مخه یې ورته وړاندیزونه کړي ول.