په هانگ کانگ کې په جون مياشت کې د يوه نوي قانون پر ضد چې چين ته یې د شکمنو کسانو د انتقال اجازه ورکوله، مظاهرې پېل شوې. دغه قانون بيا څو میاشتو وروسته بيرته واخیستل شو، خو مظاهره کوونکي اوس هم د بشپړې ديموکراسۍ او د پوليسو له خوا د تشدد په اړه د پلټنو غوښتنه کوي. په مظاهرو کې زور زياتی هم وليدل شو او امنيتي ځواکونه په سخت چلن تورن شول.

مظاهره کوونکو د هانگ کانگ او چين پر حکومتي مشرانو تور لگاوه چې چين د «يوه هيواد، دوه سیسټمونو» تړون په نظر کې نه نيسي او د سيمې ځانگړی مقام له پامه غورځوي. په يوه مظاهره کې تر يو ميليون زياتو خلکو گډون کړی وو.

د سويډن د پارلمان مخې ته د اقليم د بدلون پر ضد د ښوونځي د يوې نجلۍ گريتا تورنبيرگ په يوازې سر احتجاج په څو مياشتو کې په يوه نړيوال غورځنگ باندې بدل شو چې په میليونونو کسان پکې شامل شول. د «Fridays for Future» په نوم د جمعې د ورځې ۴۵۰۰ احتجاجونه د نړۍ په ۱۵۰ هيوادونو کې چې آلمان هم پکې شامل دی، ترسره شول. د تورنبيرگ د دې هلو ځلو له کبله يو شمير هيوادونو د اقليم بيړنۍ حالت اعلان کړ.

د هند پارلمان په روانه مياشت کې يو قانون منظور کړ چې له مخې به یې په هند کې د پاکستان، بنگله ديش او افغانستان څخه غير مسلمان مهاجرو ته تابعيت ورکول کيږي. د دې پر ضد په ټول هيواد کې سختې مظاهرې وشوې. د مظاهره کوونکو دریځ دادی چې قانون د مذهب په اساس تبعيض ته لار هواروي. ډېری دا ويره لري چې دا به د هند مسلمان مهاجر بې هيواده کړي.

په اکتوبر میاشت کې عراقيان د فساد، بې کارۍ او د هيواد پر حکومت د ايران د نفوذ پر ضد سړکونو ته را ووتل. احتجاجونه ژر په زرو زياتي واوښتل چې ۴۵۰ کسان پکې ووژل شول او ۲۵۰۰۰ ټپيان شول. لومړي وزير استعفا وکړه او د يوه موقتي حکومت د رامنځته کولو له پاره هلو ځلو د خلکو غوسه لا پسې زياته کړه. ځکه هغوی وايي چې دا حکومت به هم د پخواني په شان وي.

لبنان هم په اکتوبر میاشت کې پر تېلو، تمباکو او آن د ځیرک تليفونو پر واتس اپ تماسونو د ماليو د لوړولو د پلانونو له کبله د خلکو د ورته غوسې شاهد وو. دې مظاهرو ډېر ژر د حکومت ضد احتجاج بڼه خپله کړه او خلکو د فساد او د ژوند د ناوړه شرايطو پر ضد خپله غوسه ښکاره کړه.

په نومبر مياشت کې د ايران حکومت د مظاهره د سرکوب کولو له کبله د سختو انتقادونو سره مخامخ شو. دغه مظاهرې د تېلو د بيو لوړيدو پر ضد پېل شوې وې. تر ۲۰۰ زرو زيات کسان سړکونو ته راوتلي ول او په ډېرو ښارونو کې گډوډي رامنځته شوه. د امريکا د بهرنيو چارو وزارت په حواله د ايران په دې مظاهرو کې تر۱۰۰۰ زيات کسان وژل شوي دي.

د څو مياشتو احتجاج او مدني نافرمانۍ په پايله کې د سوډان واکمن عمر البشير په اپريل مياشت کې له واکه گوښه شو او دغه هيواد د سياسي بحران کړنگ ته ولويد. پوځ او ديموکراسي پلوه گوندونه له هغه راهيسې د واک ترلاسه کولو له پاره په جگړه بوخت ول. د گډوډيو په ترڅ کې يو شمیر کسان وژل شوي. په اگست میاشت کې دواړو اړخونو د يوه انتقالي حکومت جوړولو په موخه د اساسي قانون يوه اعلاميه لاسليک کړه.

په چيلي کې دوې میاشتې تر مخه د هېواد له سياسي او اقتصادي سيسټم څخه نارضايتي د مظاهرو سبب شوه. احتجاج کوونکي د روغتيا، تقاعد او زده کړو په سيسټم کې اساسي اصلاحات غواړي. په ۲۰۱۹م کال کې د جنوبي امريکا په ځينو هيوادونو لکه بوليويا، هندوراس او وينزويلا کې هم ورته احتجاجونه وشول. په وينزويلا کې د ولسمشر نيوکولاس مادورو د لیرې کولو مظاهرې په مي مياشت کې خپل اوج ته رسېدلې وې.

د فرانسې د ژيړ واسکټو غورځنگ د ولسمشر ايمانويل مکرون د سترگو اغزی ثابت شو. دغه غورځنگ د ۲۰۱۸م کال په پای کې هغه وخت رامنځته شو چې د لیرې پرتو سيمو موټروانانو پر تېلو د مالیې د پلان په اړه شکايت وکړ. له هغه راهیسې دغه غورځنگ کله نا کله احتجاجونه کوي. د فرانسې صنفي اتحادیې هم څو ورځې تر مخه د تقاعد د اصلاحاتو پر ضد سړکونو ته راوتلې وې.

له هغه وروسته چې د هسپانيا يوې محکمې د کاتالونيا نهه بيلتون غوښتونکي مشران زندان ته وليږل، د غوسې يوه نوې څپه راپورته شوه او د سيمه ایزې پلازمينې بارسيلونا ورځنی ژوند یې په ټپه ودراوه. مظاهرو چې يو وخت پکې نيم ميليون کسانو هم گډون کړی وو، شپږ مياشتې یې دوام وکړ او تاوتريخوالی هم پکې وليدل شو. يو عمومي اعتصاب وشو.