د اسوشتید پریس د رپوټ په حواله، ټويوټا نن پنجشنبه د ۲۰۲۴م کال د اګست لومړۍ رپوټ ورکړ چې د سږني مالي کال په لومړۍ ربع کې ېې ۱ اعشاریه ۳۳ تريلیون ین چې معادل د ۸ اعشاریه ۹ ملیارډه امریکايي ډالرو کیږي، ګټه درلودلې. ټويوټا دا د ريکارډ په کچه ګټه ښودلې ده. د ټويوټا د تېرکال د همدې مودې ګټه ۱ اعشاریه ۳۱ تریلیونه جاپاني ین وه.
د ټويوټا په ځانګړې توګه هایبريد موټرو ته تقاضا په خپل حال لوړه پاتې ده. هایبريد موټر د تیلو او چارچ دواړه سیستمونه لري.
که څه هم ټويوټا په وروستي ربع کې د نړۍ په سطحه د کمو موټرو خرڅلاو درلود، خو ګټه ېې ډېره کړې. اما دغه شرکت تمه لري چې په روان مالي کال کې ۲ اعشاریه ۲۵ ميلیونه موټر خرڅ کړي چې دا د تېرکال په پرتله لږ دي. تېرکال دغه شمېر ۲ اعشاریه ۳ میلیونه وو.
دا په داسې حال کې ده چې جاپان کې د یو شمیر ماډلو موټرو تولیدات په دې دلیل ودرول شول چې حکومت د تصدیق پاڼو اړوند اسنادو کې یو لړ ګډوډۍ وموندلې. ټویوټا له دې کبله بخښنه غوښتې او ويلي چې ستونزې د حل په موخه هڅې روانې دي.
په برېښنا چلېدونکو موټرو توليد او ارتقا د لويو اقتصادونو لکه امريکا متحده ايالات، جاپان، چين او آلمان لپاره د راتلونکي مهم اقتصادي د بوختيا ساحه بلله کيږي.
(AP)mks/akh
له آرشیف څخه:
د موټرو نړیوال نندارتون کې د «بي ام ډبلیو» نوې ماډل نندارې ته وړاندی کیږي
د آلمان په مونشن ښار کې د موټرو نړیوال نندارتون پېل شوی دی چې د کال نوي ماډلونه پکې ښوول کیږي. د موټر جوړولو آلماني شرکت «بي ام ډبیلو» په پام کې لري چې په دغه نندارتون کې خپلې نوې موټرې نندارې ته وړاندې کړي.
انځور: Uwe Lein/dpa/picture-allianceپه آلمان کې هر کال د موټرو نړیوال نندارتون جوږیږي
هر کال په لسگونو زره نندارچيان دغه نندارتون ته ورځي او د نقلیه وسایطو په نړۍ کې د وروستيو پرمختګونو په اړه معلومات تر لاسه کوي.
د موټر جوړونې په لسونو شرکتونه ګډون کوي
په دې نندارتون کې په نړۍ کې د موټرو جوړولو ډير شمير شرکتونه خپل تازه تولیدات په دغه نندارتون کې نندارې ته وړاندې کوي.
د آلماني موټر جوړولو شرکت «بي ام ډبلیو» اجرائیوي رئیس اولیور څیپزه، د نندارتون تر پرانیستلو دمخه د بي ام ډبلیو نوی ماډل معرفي کړ.
د بي ام ډبیلو، له خوا جوړ شوی دا موټر د دې شرکت نوی ماډل دی.
د دې موټر داخلي برخه خورا ساده ده او پر یوه لوی سکرین سمبال ده.
د «بي ام ډبليو» دا نوی ماډل چې په بشپړ ډول بریښنایی دی، په پام کې ده چې تر ۲۰۲۵م کاله پورې بازار ته وړاندې شي.
«بي ام ډبیلو» يوازینی شرکت دی چې د موټرو نړیوال نندارتون تر پیل دمخه د آلمان په مونشن ښار کې یو نمایشي ماډل نندارې ته وړاندې کوي.
په دې نندارتون کې ډېر مشهور شرکتونه ګډون کوي، خو د «ټویوټا» په څیر مشهور جاپاني شرکتونه په دغه نندارتون کې حضور نه لري.
د دغه نندارتون يوه موخه د موټر جوړولو د شرکتونو د مديرانو تر منځ د موټرو د اصلاح او له چاپيريال سره د عیاریدو په موخه د بحث رامنځ ته کول دي. تمرکز پر دې دی چې د تګ راتګ له پاره شخصي او عامه نقلیه وسایط برقي کړل شي.
د چاپيريال ساتنې فعالانو نیوکې
خو هر کال د چاپېريال ساتنې فعالان د دغه نندارتون پر ضد لاريونونه کوي او د لغوه کېدو غوښتنه يې کوي. دوی وايي چې د دغه ډول نندارتونونو له لارې خلک هڅول کېږي چې له شخصي موټرو ډېر کار واخلي او په خبره یې د موټرو ډېر تولید چاپېریال ته د ډېر زیان رسیدلو سبب ګرځي.
له څو کلونو راهیسې له پراخو اعتراضونو وروسته په دغه نندارتون کې بدلونونه ليدل کیږي. د بېلګې په توګه د ترانسپورت نورې وسيلې چې ډيري زیاتې چاپېريال دوسته دي، په دغه نندارتون کې نندارې ته وړاندې کېږي. د بیلګې په توګه، دا بریښنایی بایسکلونه نن ورځ په اروپایی ټولنو کې په پراخه کچه کارول کیږي.
دغه نړيوال نندارتون هر کال د آلمان اقتصادي مرکز فرانکفورت ښار کې پرانيستل کيده، خو د آلمان د موټرو د صنعت ټولنې دغه نړيوال نندارتون د مونشن ښار ته انتقال کړ او اوس دا دوهم کال دی چې هلته ترسره کیږي.
