د آلمان خبري آژانس د ځايي پولیسو د يوه وياند په حواله ليکلي دي چې دغو وروڼو د اورګاډي د پټلۍ نه په اوښتلو غوښتل ځانونه خپل اورګاډي ته ورسوي چې بل راتلونکي اورګاډي وهلي دي.
پوليس د دغو وژل شوو وروڼو عمرونه ۱۳ او ۱۷ کاله ښودلی دی. دغه پيښه د آلمان د بايرن ايالت د مونشن ښار شمال ختيځ لور ته د بروکبرګ په نوم د اورګاډي له تم ځایه لږ بهر رامنځ ته شوې ده.
د پوليسو د وياند په خبره کوم اورګاډي ته چې دغو دوو وروڼو غوښتل ځانونه ورسوي له مخکې په خپله ليکه کې موجود وو. او دغو وروڼو هغه ته د رسيدلو په هڅه کې د اورګاډو له څو پټليو اوښتي چې په دې جريان کې يوه ځايي راتلونکي اورګاډي لاندې کړي دي.
د آلمان خبري آژانس زياتوي چې دغه پيښه په ستيشن کې ولاړو خلکو چې په هغو کې يوه ډله ماشومان هم ول، په خپلو سترګو ليدلې. زیاته شوې چې يادو ماشومانو سره اوس د متخصصو ډاکټرانو له لوري مرستې ترسره کيږي. د بروکبرګ ښاروال، رودولف راډلمائير، دغه پيښه د خپل ښار له پاره يو نهايت توره ورځ ښودلی دی.
دویچه وله ا/م.ک.ص./ن.ز.
د اروګاډو پر موضوع زموږ له آرشيف څخه يو انځوريز البوم:
په اروپا کې د اورګاډي سفر نه یوازې چټک او هوسا وي، بلکه مسافر کولی شي هیرانوونکي تاریخي او عصري تمځایونه هم وویني. د اورګاډي لس داسې ښایسته تمځایونه دلته لیدلی شئ.
انځور: picture-alliance/dpa/D. Kalker په بلجیم کې د انتوریب تمځای
که تاسو په اورګاډي کې د انتوريب ښار ته رسيږۍ نو هرو مرو يې د اورګاډي مرکزي تمځاي ستاسو پام ځان راړوي. دغه ستر تمځای د انتوريب ښار يو له مشهورو او زړه راښکونکو سیمو څخه شميرل کيږي.
په بلجیم کې له فولاد او ښيښو څخه جوړ د لیژ ګیما تمځای
د بلجيم په دغه ښکلي تمځای کې هره ورځ ۵۰۰ اورګاډي دريږي. دا له ښار څخه لږ بهر جوړ شوی او د اروپا د چټک سرعت لرونکو اورګاډو د نښلولو د يو مهم مرکز حيثیت لري. د لیژ ګیما تمځای طراح هسپانوي مشهور انجنير سنتياګو کلاتراوا دی.
د امستردام د اورګاډو مرکزي تمځای
د هالند د امستردام مرکزي تمځای هم د اروپا يو د مشهورو او ښايسته و تمځایونو له ډلې څخه شميرل کيږي. د دغه تمځای يوه ځانګړتيا دا ده چې په درو مصنوعي جزيرو کې رغول شوی. دغه تمځای د لرګيو په ۸۶۸۷ ستنو باندې ټينګ شوی دی.
پاريس کې د ګاغ دېلیون تمځای
ښايي د فرانسې د پاريس ښار «ګاغ دېليون» تمځای د نړۍ تر ټولو ښايسته تمځای وي چې یو مشهوره رستورانت هم لري. دغه ودانۍ که څه هم له بهر څخه هم ډیره ښایسته ده، خو دا چې سړی ورته دننه شي نو ډیر ښکلي جوړښتونه ویني. په دې تمځای کې یو ډیر مشهور رستورانت هم جوړ شوی.
د هيلسینکي د اورګاډي تمځای په تلويزيوني پروګرامونو کې هم ډير مشهور دی. د دې تمځای په لويه دروازه کې څلور مجسمې ولاړې دي. د هيلسينکي تمځای طرح د ايليل سارينين، له خوا جوړه شوې چې د رغولو چارې يې په ۱۹۱۹م کال کې پاې ته ورسیدې.
په لندن کې د سنت پنکراس تمځای
د لندن ښار د سنت پنکراس د اورګاډي په تمځای کې ډير شمير دوکانونه او مغازې جوړي دي او تل په کې د مساپرو ګڼه ګوڼه وي. دغه تمځای په اصل کې د نړيوالو اورګاډو د شبکې يو نښلونکی مرکز دي. د هري پوتر د فلم ځينې صحنې هم په دغه تمځای کې ثبت شوې دي.
د آلمان د لایپزیک ښار د اورګاډي تمځای په اروپا تر ټولو لوی دی. دغه ځای چې ۲۳ ليکې لري، په شاوخوا ۸۰ زره متره مربع ځمکه کې رغول شوی دی. په دغه ځای کې له ۱۴۰ ډيرې مغازې، رستورانټونه او نورې خدماتې څانګې هم شتون لري. دلته د یکشبنې په ورځ هم ډیرې مغازې پرانیستې وي.
په بوداپست کې ډیرې حیرانوونکې ودانۍ شته چې د هغو له ډلې څخه يوه يې هم د کيلاتي تمځای (د بوداپست د اورګاډو ختيځ تمځای) دی. دغه ځای په ۱۸۸۴ کال کې پرانيستل شوی چې هغه مهال دا د اروپا په کچه د اورګاډو تر ټولو عصري تمځای وو.
د هسپانيا د پلازمينې مادريد ښار د اورګاډو اتوچا تمځای د دغه ښار له دوو سترو تمخایونو څخه یو دی. د اتوچا ودانۍ د ۱۸۸۸ او ۱۸۹۲ کلونو تر منځ د «نوي هنر» په بڼه رغول شوې ده. دا د مسافرو او سيلانيانو له پاره د خوښې له ځایونونو څخه ګنل کيږي. په دغه ځای کې يو بڼ هم شته چې د نباتاتو ۷۰۰۰ بوټي په کې کرل شوي دي.
د اورګاډي يو ښايسته تمځای باید هرو مرو ډير لوی نه وي. د پرتګال پلازمينه د ليزبون ښار په زړه کې د «ليزبون روسيو تمځای» دغه شان يوه ښه بيلګه ده. دغه تمځای د «نوی مانئولین » په ډيزاين رغول شوې او په کال ۱۸۹۰ کې پرانیستل شوی ده.
