هوپ هیکس د سپیني ماڼۍ پخوانۍ اطلاعاتي مدیره او اوس هم د ولسمشر دونالد ترمپ نژدې اعتمادي ده. هغې د سه شنبه په ورځ له ولسمشر سره یو ځای د انتخاباتي مبارزې له پاره په الوتکه کي کلیولینډ ته سفر وکړ تر څو ترمپ له خپل سیال جو بایدن سره وویني. یوه ورځ وروسته هغې مینیسوتا ته سفر وکړ او هلته یې حالت ښه نه وو.

د بلومبیرگ خبری آژانس رپوټ ورکوي چي نوموړې په الوتکه کي د بیرته ستنیدو پر وخت لا قرانطین سول.

ترمپ تویت کړی چي «موږ به ډیر ژر په  قرانطین او استراحت پیل وکړو او هر څه به په گډه وزغمو.»

په امریکا متحده ایالاتو کي د نوومبر پر دریمه انتخابات کیږي چی ترمپ ځان د دوهم وار ولسمشرۍ دورې له پاره کاندید کړی.

د ولسمشر مؤظف ډاکټر تمه لري چی ترمپ د کرونا ویروس په لرلو سره بیا هم پرته له وقفې خپلي د ولسمشرۍ دندي سرته رسولای سي. سین کونلي وویل چي د دونالد ترمپ او د هغه د میرمني حالت ښه دی او دواړه به په سپینه ماڼۍ کی د استراحت له پاره پاته وي.

د ماسکونو تړل یوه «فردي پریکړه» ده

د کرونا پاندیمي پر وخت پر ولسمشر باندي په بیا بیا سره تور لگیده چي دغه ویروس جدي نه نیسي. څو وخت مخکي لا هغه په وار وار سره د انتخاباتي مبارزو له پاره راظاهر سو. که څه هم د خلکو راټولیدل په آزاده فضا کي ول خو د هغه په زرونو پلویان مکلف نه ول چي ماسکونه واغوندي او ډیر یې یو بل ته نژدې ولاړ ول.

ترمپ په خپله هم په عام محضر کي زیاتره وخت ماسک نه تاړه. سپیني ماڼۍ ددې کار دلیل دا راوړی چي ترمپ او د هغه شاوخوا کسان په منظم ډول د کرونا تیست کوي. د ترمپ ویاندي کيلای میک ایناني، په جون میاشت کي د ماسک تړل یوه «فردي پریکړه» وبلله.

همدارنگه هوپ هیکس د چهارشنبې په ورځ لا په پوځي هوايي ډگر کي د ترمپ د مشاور او د هغه د زوم جارید کوشنر سره نژدې لیدل سوې وه. دغو دواړو کسانو ماسک نه وو اغوستی.