بلوچستان؛ په وژل شويو لسو کسانو کې يو ترکی هم شامل دی
۱۴۰۵ اردیبهشت ۳, پنجشنبه
د بلوچستان ایالت د چاغي سيمې په داريګوان کې د پاکستان د «ان آر ال» شرکت د کان کېندنې د يوې پروژې پر ساحې په دې بريد کې تقريباً ۴۰ وسله والو چې پر موټر سايکلونو او موټرو کې سپاره، وو برخه اخیستې وه.
د بلوچستان پولیسو نن، پنجشنبه د پېښې په اړه د معلوماتو د ورکړې پر وخت وويل چې په پېښه کې يو ترکی وګړی وژل شوی او يو بل يرغمل نیول شوی دی.
اړونده موضوع: پاکستان: په ځانمرګي بريد کي ۳۱ کسان وژل سوي
يوه سيمه ایز دولتي چارواکي د هويت د نه ښوولو په شرط د فرانسې خبري آژانس سره په خبرو کې وويل: «په پېښه کې د يوه ترکي تبعه په ګډون لږ تر لږه لس کسان وژل شوي دي چې شپږ یې کارکوونکي او درې ساتونکي دي.»
تر اوسه هیڅ کومې ډلې د بريد پړه نه ده منلې خو سيمه ایز بلوچ بيلتون غوښتونکي د معدنونو د پروژو په ګډون په سيمه کې په بريدونو کې ښکیل وي.
چارواکي زياته کړې ده چې ترکی وګړی او درې ساتونکي هغه وخت ووژل شول کله چې په معدن کې د سون توکو يوه ټانکر د بريد په ترڅ کې چاودنه وکړه.
هغه وویل: «وسله والو د بريد په ترڅ کې يو بل ترکی وګړی تښتولی دی.»
اړونده موضوع: بلوچستان: خونړیو بریدونو کې لږ تر لږه ۱۲۵ کسان وژل شوي
د پوليسو يوه چارواکي چې هغه هم د هويت د نه ښوولو په شرط خبرې کولې، فرانسې خبري آژانس ته د پېښې جزيات تائيد کړل.
د معدنونو پاکستاني شرکت د چهارشنبې په ورځ ناوخته د دغه بريد اعتراف وکړ خو ویلي یې دي چې امنيتي ځواکونو «چټک غبرګون ښوولی او سيمه یې خوندي» کړې ده. شرکت د تلفاتو په اړه هیڅ جزيات نه دي ورکړي.
د فرانسې د خبري آژانس ژورناليستانو وليدل چې مړي او ټپيان د دالبدين روغتون ته انتقال شوي دي.
د دالبدين د روغتون د ناصر خان، په نوم يوه چارواکي د مړو شمیر تائيد کړی دی.
هغه وويل: «موږ لس جسدونه لرو، ځيني د فیرونو ټپونه لري. نور بيا سوځيدلي دي.» نوموړي زياته کړه چې دوه کسان جدي ټپونه لري.
د سيمې يوه بل چارواکي ويلي دي چې يو ترکی او دوه د جنوبي افريقا وګړي د پېښې له ساحې «په خوندي توګه تخليه» شوي دي.
«بيلتون غوښتونکی غورځنګ»
بلوچستان د پاکستان يو تر ټولو بې وزله او ستر ایالت دی. دا ايالت د زده کړو، کار او اقتصادي ودې په ګدون کابو په هره برخه کې د هېواد له نورو سيمو وروسته پاتې دی.
بلوچ بيلتون غوښتونکي د پاکستان حکومت تورنوي چې د سیمې اوسيدونکو ته د دغه ایالت د طبيعي زیرمو په شتمنۍ کې ونډه نه ورکوي. بلوچستان په ګازو او منرالونو بډایه ایالت دی.
د بلوچ لیبرېشن آرمي يا بي ال ای په نوم ډله، د دغه ایالت تر ټولو فعاله وسله واله بیلتون غوښتونکې ډله ده چې په فيبرورۍ میاشت کې یې په سيمه کې د همغږي شويو بريدونو په يوه لړۍ کې تر ۱۹۰ ډېر کسان ووژل.
بیلتون غوښتونکو په ماضي کې هم د نژاد پر بنسټ کارکوونکي وژلي دي او پنجابي او سندي کارونکي یې په نښه کړي دي.
د ان آر ال شرکت په يوه اعلامیه کې ويلي دي چې د دوی ۹۰ سلنه کاري ځواک سيمه ایز کارکوونکي جوړوي.