ملگرو ملتونو افغانستان ته د چټکو غذايي مرستو غوښتنه کړې
۱۴۰۰ شهریور ۳, چهارشنبه![Afghanistan UN-Welternährungsprogramms (WFP) in Kabul](https://static.dw.com/image/45899910_800.webp)
د خوراک نړیوال پروگرام «ډبلیو اف پي» د سې شنبې په ورځ له نړیوالي ټولني څخه غوښتي دي چي ۲۰۰ میلیونه ډالر دي افغانستان ته ورکړي تر څو وکولای سي تر ژمي مخکي لا لیري پرتو سیمو ته د اړتیا وړ مواد ورسوي.
د آسیا له پاره د خوراک نړیوال سازمان سیمه ایزه مرستیاله آنیتا وب، د ملگرو ملتونو په یوه غونډه کي وویل: «د خوراک نړیوال پروگرام خبرداری ورکوي چي په ژمي کي د افغانستان خلک یو انساني ناورین په مخکي لري، مگر دا چي نړیواله ټولنه د هغوی ژوند ته اولویت ورکړي».
هغه زیاتوي چي نړیوال غذايي پروگرام باید د ژمي او غرنیو لارو تر بندیدو مخکي لا غذايي مرستي لیرو پرتو سیمو ته ورسوي: «کله چي واوري و اوریږي، بیا به نو ډیر ناوخته وي. هر ډول ځنډ کیدای سي لا زیات تلفات رامنځته کړي.»
د ملگرو ملتو نوموړي چارواکي وویل، هغه هیوادونه چي د طالبانو د راتگ له امله له افغانستانه د توده یی احتمالي مهاجرتونو څخه په اندېښنه کي دي، باید د دغه هیواد له خلکو څخه د خپلو مرستو د ماموریتونو له لاري ملاتړ وکړي تر څو په خپل هیواد کي پاته سي.
GP/NZ/AG