د ماشومانو د ملاتړ صندوق یونیسیف د ۲۰۲۲م کال له پاره بې سارې بودجې ته اړتیا لري. دغه صندوق د سه شنبې په ورځ په ژنیو کې د ۹،۴ میلیارده ډالرو بسپنې ورکولو غوښتنه وکړه. دغه څه د ۲۰۲۱م کال په پرتله ۳۱ سلنه زیاتوالی ښيې. په ټوله کې یونیسف غواړي د نړۍ په ۱۴۴ هیوادونو کې د ۱۷۷ میلیونه کم سنه ماشومانو او د هغوی له کورنیو سره مرسته وکړي.
د یونیسف په خبره د ماشومانو برخلیک چې د شخړو او د اقلیم د بدلون په پایله کې اغیزمن شوی، د کرونا وبا او مخ پر زیاتیدونکې بې وزلۍ له کبله رامنځ ته شوي ناوړه اقتصادي وضعیت له وجې به نور هم خراب شي. د یونیسف مشرې هینریتا فوره ویلي دي چې «د تل په څیر ماشومان په دې کړکیچ کې تر ټولو زیات اغیزمن شوي دي. هغوی عاجلې مرستې ته اړتیا لري.»
د یونیسف د مشرې په خبره یوازې په افغانستان کې د کم سنه ماشومانو له پاره دوه میلیارده ډالرو ته اړتیا ده. زیاته شوې ده چې هلته په میلیونونو ماشومان له سختې لوږې سره مخامخ دي.
د سوریې د مهاجرو له پاره یونیسف ۹۰۰ میلیونه ډالر په پام کې لري. پر دې سربیره نور ستر بشري ماموریتونه په یمن، د کانګو دیموکراتیک جمهوریت او ایتوپیا له پاره پلان شوي دي.
زموږ له آرشیف څخه:
په دغو ۱۲ هیوادونو کې ماشومان ابتدايي ښوونځیو ته له تګه محروم دي!
د ماشومانو له پاره د ملګرو ملتونو د ملاتړ صندوق یا یونیسف د نړۍ په ډيرو هیوادونو کې د هغو ماشومانو په هکله معلومات او شمیرې را ټولې کړي دي چې د مختلفو عواملو له کبله ابتدايي ښوونځي ته له تګ څخه محروم دي.
انځور: DW/I. Jabeenد یونیسف د شمیرو له مخې په سومالیا کې د ابتدايي ښوونځي پر شرایطو برابر د ټولو ماشومانو له ډلې څخه ۷۶ سلنه یې ښوونځي ته نه ځي.
په جنوبي سوډان کې بیا د هغو ماشومانو له ډلي څخه چې ابتدايي ښوونځي ته بايد ولاړ شي، ۷۴ سلنه یې ښوونځي ته نه ځي.
د یونیسف د شمیرو له مخې په لیبریا کې بیا د ابتدايي ښوونځي پر شرایطو د برابر ماشومانو له ډلې څخه ۵۷ سلنه یې ښوونځي ته نه ځي.
یونیسف وايي چې په چاد هیواد کې بیا د ټولو ماشومانو ۵۰ سلنه یې ابتدايي ښوونځیو ته نه ځي.
د ملګرو ملتونو د شمیرو له مخې په نایجر کې بیا د داسې ماشومانو شمېر چې ابتدايي ښوونځي ته نه ځي ۵۰ سلنه ښوول شوی دی.
په بورکینه فاسو کې بیا د دغه شان ماشومانو اندازه ۴۸ سلنه ښوول شوې ده.
په مالي کې هم د ابتدايي ښوونځي پر شرایطو د برابرو ماشومانو له ډلې څخه ۴۷ سلنه یې ښوونځي ته نه ځي.
په گيني کې بیا د ابتدايي ښوونځي پر شرایط د برابر ماشومانو له ډلې څخه ۴۰ سلنه یې ښوونځي ته نه ځي.
په افریقايي استوايي ګیني هیواد کې بیا د ټولو ماشومانو له ډلې څخه ۴۰ سلنه یې ابتدايي ښوونځي ته له تګ څخه محروم دي.
د ګيني بیساو په نامه بل افریقايي هیواد کې بیا د داسې ماشومانو شمېر چې ابتدايي ښوونځي ته نه ځي، ۳۸ سلنه ښوول شوی دی.
په افغانستان کې د ابتدايي ښوونځيو پر شرایطو د برابر ماشومانو له ډلې څخه ۶۳ سلنه یې ابتدايي ښوونځي ته له تګ څخه محروم دي.
په پاکستان کې د ټولو ماشومانو له ډلې څخه ۳۶ سلنه یې ابتدايي ښوونځي ته له تګ څخه محروم دي.
