نیویارک ټایمز د سه شنبې ورځ د دغې هوکړي اړوند مذاکراتو کې د دخیلو امریکايي او ایراني چارواکو له قوله رپوټ ورکړ چې شاوخوا ۱۰۰ ایرانیان له امریکا څخه بېرته ایران ته اخراج شول.

د رپوټ له مخې، ایراني چارواکو وویل چې یوه امریکايي چارتر الوتکه د دوشنبې په ورځ له لوزیانا څخه پورته شوه چې د پلان له مخې د سه شنبې په ورځ به د قطر له لارې ایران ته ورسیږي.

د رپوټ پر اساس په سملاسي توګه د اخراج شوو ایرانيانو هویت او امریکا ته د هغوی د مهاجرت انګیزه روښانه نه ده.

رويټرز خبري آژانس ليکي چې سپینې ماڼۍ او د امریکا د بهرنیو چارو وزارت په سملاسي توګه په دې هکله د دوی پوښتنو ته ځواب نه دی ورکړی.

له امریکا څخه ایران ته د دغو ایرانیانو اخراج د دواړو هېوادونو ترمنځ د میاشتو خبرو اترو په نتیجه کې عملي کيږي.

د امریکا متحده ایالاتو ولسمشر دونالد ترمپ، پلان لري چې له امریکا څخه د ريکارډ په کچه هغه بهرنیان اخراج کړي چې په دغه هېواد کې د اوسېدو قانوني اسناد نه لري.

زیاته شوې چې د ایران د بهرنیو چارو وزارت د اخراج شوو ایرانیانو په هکله ډاډ ورکړی دی چې هغوی به خوندي وي او له کومې ستونزې سره به نه مخ کيږي.

امریکا متحده ایالاتو د روان کال په فبرورۍ مياشت کې هم د ایران په ګډون د مختلفو هېوادونو ۱۱۹ اتباع د امریکا او پاناما تر منځ د یو تړون پر اساس پاناما ته اخراج کړي ول. هغه وخت ویل شوي ول چې دغه مهاجر به بیا وروسته له پاناما څخه خپلو هېوادونو ته استول کيږي.